ທີ່ນີ້ວິທະຍຸສາກົນແຫ່ງປະເທດຈີນ！ທ່ານຜູ້ຟັງທີ່ເຄົາລົບ, ກອງປະຊຸມລັດຖະມົນຕີ ຕ່າງປະເທດອາຊຽນທີ່ອັດລົງໃນວັນທີ20ກໍລະກົດນີ້ໄດ້ອອກຖະແຫຼງການຮ່ວມ, ສະແດງຄວາມຍິນດີຕ້ອນຮັບຕໍ່ອາເມລິກາແລະຣັດເຊຍທີ່ຢາກເຂົ້າເປັນສະມາຊິກຂອງກອງປະຊຸມສຸດຍອດອາຊີຕາເວັນອອກ.ຕອນບ່າຍວັນທີ21ກໍລະກົດນີ້,ກອງປະຊຸມ ລັດຖະມົນຕີການຕ່າງປະເທດອາຊຽນບວກ3 ຄືຈີນ,ຍີ່ປຸ່ນແລະສ.ເກົາຫຼີ,ການປຶກສາຫາລືບໍ່ເປັນທາງການລະຫວ່າງລັດຖະມົນຕີຕ່າງປະເທດເພື່ອກອງປະຊຸມສຸດຍອດອາຊີຕາເວັນອອກໄດ້ຈັດຂຶ້ນຢູ່ຮາໂນ້ຍ.
ຂ່າວທີ່ອາເມລິກາແລະຣັດເຊຍຈະເຂົ້າຮ່ວມກອງປະຊຸມສຸດຍອດໄດ້ກາຍເປັນຫົວຂໍ້ຈຸດເດັ່ນຂອງກອງປະຊຸມອາຊຽນຕ່າງໆ.ວັນທີ 21 ກໍລະກົດນີ້ໃນເວລາໃຫ້ສຳພາດຕໍ່ນັກຂ່າວ,ທ່ານຈ໋ອດ ຢັອງບູນຢ້ຽວ,ລັດຖະມົນຕີວ່າການກະຊວງການຕ່າງປະເທດສີງກະໂປກ່າວວ່າ:"ພວກຂ້າພະເຈົ້າເປັນເອກະສັນກັນ, ຍິນດີຕ້ອນຮັບອາເມລິກາແລະຣັດເຊຍທີ່ຢາກເຂົ້າຮ່ວມກອງປະຊຸມສຸດຍອດອາຊີຕາເວັນອອກ, ແຕ່ວ່າພວກຂ້າພະເຈົ້າຕ້ອງພິຈາລະນາເຖິງວຽກງານບູລິມະສິດໃນປະຈຸບັນ. ສິ່ງທີ່ສຳຄັນແມ່ນຄວນຮັບປະກັນວຽກງານທີ່ພວມເຮັດໃນປະຈຸບັນເຊັ່ນວຽກງານຂອງເຂດການຄ້າເສລີໃຫ້ສາມາດດຳເນີນໄປຢ່າງດີ, ກອງປະຊຸມຈະຈັດຂຶ້ນໃນທຸກປີ, ຈັດຂຶ້ນຢູ່ປະເທດອາຊຽນ, ແລະນຳພາໂດຍອາຊຽນ, ເຖິງວ່າອາຊຽນຍັງບໍ່ທັນເຂັ້ມແຂວງເທົ່າກັບປະເທດເຫຼົ່ານີ້ກໍຕາມ."
ວັນທີ 21 ກໍລະກົດນີ້, ກອງປະຊຸມລັດຖະມົນຕີຕ່າງປະເທດອາຊຽນບວກ 3 ແລະການປຶກສາຫາລືບໍ່ເປັນທາງການລະດັບລັດຖະມົນຕີການຕ່າງປະເທດເພື່ອກອງປະຊຸມສຸດຍອດອາຊີຕາເວັນອອກໄດ້ຈັດຂຶ້ນຕາມລຳດັບ.ປະຈຸບັນ,ນອກຈາກ10ປະເທດອາຊຽນຈະເຂົ້າຮ່ວມກອງປະຊຸມສຸດຍອດອາຊີຕາເວັນອອກ,ຍັງລວມມີປະເທດຄູ່ເຈລະຈາຂອງອາຊຽນຄື:ຈີນ,ຍີ່ປຸ່ນ,ສ.ເກົາຫຼີ,ອິນເດຍ,ອົສຕຼາລີແລະນູແວັນເຊລັງ. ການທີ່ 6 ປະເທດຄູ່ເຈລະຈາອາຊຽນເຫັນດີໃຫ້ອາເມລິກາແລະຣັດເຊຍເຂົ້າຮ່ວມກອງປະຊຸມສຸດຍອດອາຊີຕາເວັນອອກຫຼືບໍ່ນັ້ນໄດ້ເຮັດໃຫ້ຝ່າຍຕ່າງໆສົນໃຈນຳຫຼາຍ.ໃນເວລາທ່ານສຸລິນ ພິດສຸວັນ,ເລຂາທິການໃຫຍ່ອາຊຽນໃຫ້ສຳພາດຕໍ່ນັກຂ່າວ,ທ່ານກ່າວວ່າ,ປະເທດຄູ່ເຈລະຈາບໍ່ໄດ້ສະແດງຄວາມເຫັນທີ່ແຕກຕ່າງກັນຕໍ່ເລື່ອງນີ້.
"6ປະເທດຄູ່ເຈລະຈາລ້ວນແຕ່ຈະສະຫນັບສະຫນູນການຕັດສິນໃຈຂອງອາຊຽນ, ແລະກໍ່ຈະປຶກສາຫາລືກັນກັບອາຊຽນກ່ຽວກັບບັນຫານີ້,ແລ້ວຈະຕົກລົງກັນໃນກອງປະຊຸມສຸດຍອດອາຊຽນແລະກອງປະຊຸມສຸດຍອດອາຊີຕາເວັນອອກທີ່ຈະຈັດຂຶ້ນຢູ່ແຫ່ງນີ້ໃນເດືອນຕຸລາປີນີ້."
ຕາມຂ່າວຈາກຄະນະຜູ່ແທນຈີນ,ໃນເວລາທ່ານຢາງເຈຍສື,ລັດຖະມົນຕີວ່າການກະຊວງການຕ່າງປະເທດຈີນເຂົ້າຮ່ວມການປຶກສາຫາລືບໍ່ເປັນທາງການລະດັບ ລັດຖະມົນຕີການຕ່າງປະເທດເພື່ອກອງປະຊຸມສຸດຍອດອາຊີຕາເວັນອອກ,ທ່ານກ່າວວ່າ,ການປ່ຽນແປງຂອງໂຄງປະກອບເຂດອາຊີຕາເວັນອອກ ຄວນມີຜົນດີຕໍ່ການຊຸກຍູ້ສັນຕິພາບ,ການພັດທະນາ,ການຮ່ວມມືແລະຄວາມຈະເລີນຮຸ່ງເຮືອງຂອງອາຊີຕາເວັນອອກ,ຄວນສອດຄ່ອງກັບຈຸດພິເສດທີ່ມີລັກສະນະຫຼາກຫຼາຍຂອງອາຊີຕາເວັນອອກ. ກົນໄກຮ່ວມມືຕ່າງໆຂອງພາກພື້ນນີ້ຄວນເພີ່ມຕື່ມເຊິ່ງກັນແລະກັນ,ຊຸກຍູ້ກັນແລະກັນ,ແລະພັດທະນາຮ່ວມກັນ;ໂຄງປະກອບພາກພື້ນທີ່ມີການປ່ຽນແປງນັ້ນ ຄວນຍຶດຖືບົດບາດນຳຫນ້າຂອງອາຊຽນ.ທ່ານກ່າວວ່າ, ຈີນຍິນດີຮັບຟັງແລະເຄົາລົບຄວາມເຫັນທີ່ເປັນເອກະສັນກັນຂອງອາຊຽນ,ເພື່ອແລກປ່ຽນກັບທຸກຝ່າຍກ່ຽວກັບບັນຫານີ້.
ກ່ຽວກັບການຮັບເອົາສອງປະເທດໃຫຍ່ຄື:ອາເມລິກາແລະຣັດເຊຍເຂົ້າຮ່ວມກອງປະຊຸມສຸດຍອດອາຊີຕາເວັນອອກ,ຢູ່ພາຍໃນປະເທດສະມາຊິກອາຊຽນກໍ່ມີຄວາມວິຕົກກັງວົນຈຳນວນໜຶ່ງ.ຖ້າວ່າມີປະເທດໃຫຍ່ໃນພາກພື້ນແລະປະເທດໃຫຍ່ໃນໂລກເຂົ້າຮ່ວມກອງປະຊຸມຕ່າງໆຂອງອາຊຽນ,ອາຊຽນຍັງຈະຮັກສາຖານະບົດບາດທີ່ເປັນໃຈກາງນັ້ນໄດ້ຫຼື ບໍ່?ທ່ານກະສິດ ພິລົມ,ລັດຖະມົນຕີວ່າການກະຊວງການຕ່າງປະເທດໄທກ່າວວ່າ:"ນີ້ບໍ່ແມ່ນບັນຫາທີ່ໜ້າເປັນຫ່ວງ,ແມ່ນບັນຫາທີ່ຕ້ອງເປັນໄປ.ນີ້ແມ່ນຫຼັກການຂອງອາຊຽນ.ສະນັ້ນ,ພວກຂ້າພະເຈົ້າຕ້ອງເຮັດໃຫ້ອາຊຽນພວກເຮົາເຂັ້ມແຂງຂຶ້ນ,ມີການພົວພັນແໜ້ນແຟ້ນກວ່າເກົ່າແລະເຊື່ອມໂຍງເຂົ້າກັນ,ໂຄລົບນ້ຳໃຈຂອງກົດບັດອາຊຽນ,ປະຕິບັດກົດບັດອາຊຽນຢ່າງແທ້ຈິງ,ສ້າງຕະຫຼາດທີ່ເຊື່ອມໂຍງເຂົ້າກັນ,ສ້າງປະຊາຄົມອາຊຽນ,ຮັບປະກັນສິດທິມະນຸດແລະເຮັດໃຫ້ປະຊາຊົນມີສ່ວນຮ່ວມ."
ອີງຕາມລະບຽບການ,ຄະນະກຳມະການປະສານງານຂອງອາຊຽນຈະດຳເນີນການຄົ້ນ ຄວ້າຕື່ມອີກກ່ຽວກັບການຮັບເອົາອາເມລິກາແລະຣັດເຊຍເຂົ້າຮ່ວມກອງປະຊຸມສຸດຍອດ ອາຊີຕາເວັນອອກ,ແລະຈະສະເໜີຄວາມເຫັນກ່ຽວກັບເລື່ອງນີ້ຢ່າງເປັນທາງການກ່ອນກອງປະຊຸມສຸດຍອດອາຊຽນແລະກອງປະຊຸມສຸດຍອດອາຊີຕາເວັນອອກທີ່ຈະຈັດຂຶ້ນຢູ່ ຮ່າໂນ້ຍໃນເດືອນຕຸລາປີນີ້,ເພື່ອເຮັດໃຫ້ກອງປະຊຸມທຳການຕັດສິນເທື່ອສຸດທ້າຍ.
