ຕາມຂ່າວCRI:ທີ່ນີ້ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ່ຟັງທີ່ໂຄລົບ.ວັນທີ28 ກໍລະກົດນີ້,ຄະນະກຳມະການສ້າງມາດຕະຖານຂະແໜງການກິນດື່ມຈີນໄດ້ສ້າງຕັ້ງຂຶ້ນຢູ່ທີ່ປັກກິ່ງ.ອົງການນີ້ປະກອບດ້ວຍບຸກຄົນໃນຂະແໜງການກິນດື່ມ,ຈະສຸມກຳລັງເຂົ້າໃນການວາງແຜນໃຫ້ການສ້າງມາດຕະຖານຂະແໜງການກິນດື່ມຂອງຈີນ,ເຮັດວຽກວາງແລະດັດແປງມາດຕະຖານ.ບຸກຄົນທີ່ກ່ຽວຂ້ອງເຫັນວ່າ,ນີ້ຈະເລັ່ງລັດຂະບວນການສ້າງມາດຕະຖານຂອງຂະແໜງການກິນດື່ມຈີນ.
ຄະນະກຳມະການສ້າງມາດຕະຖານຂະແໜງການກິນດື່ມຈີນປະກອບດ້ວຍຜູ່ຊ່ຽວຊານໃນຫຼາຍຂົງເຂດ,ເຊັ່ນ:ກົດໝາຍ,ການຄຸ້ມຄອງວິສາຫະກິດ,ການປຸງແຕ່ງແລະໂພຊະນາການ,ລວມທັງອາຫານຈີນແລະອາຫານຕາເວັນຕົກ,ນອກຈາກກ່ຽວພັນເຖິງອາຫານຫຼັກ,ມາດຕະຖານຂອງອາຫານໄວກໍ່ຢູ່ໃນຂອບເຂດຄຸ້ມຄອງຂອງຄະນະກຳມະການນີ້.ທ່ານຊູ່ຊິ່ວເຊີງ,ປະທານຄະນະກຳມະການບອກໃຫ້ຮູ້ວ່າ,ຊຸກຍູ້ການສ້າງມາດຕະຖານ,ມີຜົນດີຕໍ່ການພັດທະນາຂອງຂະແໜງການກິນດື່ມຂອງຈີນ.
ໃນຫຼາຍປີມານີ້, ຂະແໜງການກິນດື່ມຂອງຈີນໄດ້ເພີ່ມຂຶ້ນຢ່າງໝັ້ນທ່ຽງແລະໄວສົມຄວນຕະຫຼອດມາ, ໄດ້ກາຍເປັນກຳລັງສຳຄັນທີ່ກະຕຸ້ນຄວາມຕ້ອງການຂອງພາຍໃນແລະຊຸກຍູ້ການບໍລິໂພກ. ໃນ 6 ເດືອນຕົ້ນປີນີ້,ຂະແໜງການກິນດື່ມຂອງທົ່ວປະເທດສ້າງລາຍໄດ້ຫຼາຍກວ່າ 800 ຕື້ຢວນ, ເພີ່ມຂຶ້ນຫຼາຍກວ່າໄລຍະດຽວກັນຂອງປີກາຍນີ້ 16,9%, ຄາດວ່າໃນໝົດປີຈະໄດ້ 2000 ຕື້ຢວນ. ທ່ານນາງຫູຈ້ຽນຜີງ, ເຈົ້າໜ້າທີ່ກະຊວງການຄ້າຈີນກ່າວວ່າ,ຄຽງຄູ່ກັບການພັດທະນະຂອງຂະແໜງການກິນດື່ມ,ການກໍ່ສ້າງມາດຕະຖານທີ່ກ່ຽວຂ້ອງກໍໄດ້ຮັບຄວາມຄືບໜ້າດີເຊັ່ນກັນ.ນາງກ່າວວ່າ:"ປະຈຸບັນມາດຕະຖານຂອງລັດແລະຂອງຂະແໜງການທີ່ກ່ຽວພັນເຖິງຂະແໜງການກິນດື່ມມີ 10 ກວ່າຂໍ້, ປະຈຸບັນທີ່ພວມວາງອອກນັ້ນກໍມີ 10 ກວ່າຂໍ້, ຍັງມີວິສາຫະກິດຫຼາຍແຫ່ງໄດ້ສ້າງມາດຕະຖານຂອງຕົນເອງ, ອັນໄດ້ເສີມຂະຫຍາຍບົດບາດສຳຄັນຕໍ່ການນຳພາການພັດທະນາຂອງຂະແໜງການກິນດື່ມຫັນເຂົ້າສູ່ລະບຽບ"
"ຄະນະກຳມະການນີ້ຈະວາງແຜນການພັດທະນາໃຫ້ການສ້າງມາດຕະຖານຂະແໜງການກິນດື່ມຢ່າງຖືກຫຼັກວິທະຍາສາດ.ປະຈຸບັບນີ້,ຂະແໜງການກິນດື່ມຄວນມີມາດຕະຖານຫຍັງແດ່,ແລະມີຫຍັງແດ່ແມ່ນຕ້ອງສຳເລັດຢ່າງຮີບດ່ວນ,ຕ້ອງມີແຜນການຊີ້ນຳຢ່າງຮອບດ້ານ.ຍັງຈະໂຄສະນາເຜີຍແຜ່ຢ່າງກວ້າງຂວາງກວ່າເກົ່າໂດຍຜ່ານເວັບໄຊ,ໂທລະພາບ,ໜັງສືພິມແລະສື່ອື່ນໆ."
ແຕ່ວ່າ, ຢູ່ຕະຫຼາດຈີນ, ຍັງມີປະກົດການທີ່ເຫດການຄວາມປອດໄພດ້ານອາ ຫານເກີດຂຶ້ນໃນບາງຄັ້ງບາງຄາວແລະຄຸນນະພາບການບໍລິການດ້ານກິນດື່ມບໍ່ເທົ່າທຽມກັນ. ຕໍ່ເລື່ອງນີ້,ນາງຮູຈ້ຽນຜິງເຫັນວ່າ, ເມື່ອທຽບກັບຂະໜາດຂອງຂະແໜງການແລ້ວເຫັນວ່າ,ມາດຕະຖານຂອງຂະແໜງການກິນດື່ມຂອງຈີນໃນປັດ ຈຸບັນ ຍັງມີໜ້ອຍ,ບາງມາດຕະຖານມີເວລາໄດ້ຮັບຜົນດົນສົມຄວນ.ນາງເຫັນວ່າ,ຄຽງຄູ່ກັບອົງການສະເພາະກິດ ຄື ຄະນະກຳມະການກໍ່ສ້າງມາດຕະຖານຂອງຂະແໜງການກິນດື່ມຈີນສ້າງຕັ້ງຂຶ້ນ,ບັນຫາເຫຼົ່ານີ້ສາມາດໄດ້ຮັບການແກ້ໄຂເທື່ອລະກ້າວ.
ນາງຮູຈ້ຽນຜິງສະເໜີວ່າ, ໃນຂະນະທີ່ກໍ່ສ້າງລະບົບມາດຕະຖານຂອງຂະແໜງການກິນດື່ມຂອງຈີນ, ຄະນະກຳມະການດັ່ງກ່າວກໍຄວນຕັ້ງໜ້າເຂົ້າຮ່ວມວຽກງານວາງມາດຕະຖານທີ່ກ່ຽວຂ້ອງຂອງສາກົນ, ເພື່ອຊຸກຍູ້ໃຫ້ມາດຕະຖານຂອງຈີນເຊື່ອມເຂົ້າກັບມາດຕະຖານສາກົນ, ແລະຍົກຄວາມສາມາດແຂ່ງຂັນຂອງຂະແໜງການ.ນາງກ່າວວ່າ: "ຈີນມີລະບົບອາຫານທີ່ມີເອກະລັກຫຼາຍ,ພວກເຮົາກໍສາມາດຕັ້ງໜ້າເຂົ້າຮ່ວມການວາງມາດຕະຖານສາກົນ.ຖ້າເຂົ້າຮ່ວມການວາງມາດຕະຖານສາກົນແລ້ວ ຈະມີປະໂຫຍດຕໍ່ມາດຕະຖານຂອງຈີນກາຍເປັນມາດຕະຖານສາກົນ, ມີປະໂຫຍດຕໍ່ຂະແໜງການກິນດື່ມຂອງຈີນໄປລົງທຶນຢູ່ຕ່າງປະເທດ, ແລະ ຈະມີປະໂຫຍດຫຼາຍຕໍ່ການຍົກຄວາມສາມາດແຂ່ງຂັນຂອງຂະແໜງການດັ່ງກ່າວ."
ຫຼັງຈາກຄະນະກຳມະການ ກໍ່ສ້າງມາດຕະຖານຂອງຂະແໜງການກິນດື່ມ ຂອງຈີນສ້າງສຳເລັດແລ້ວ,ວຽກງານອັນດັບໜຶ່ງກໍແມ່ນຊຸກຍູ້ການຮ່າງແລະປະຕິບັດຫຼາຍ ມາດຕະຖານຄື"ມາດຕະຖານກໍ່ສ້າງວິສາຫະກິດກິນດື່ມແບບປະຢັດແລະ"ມາດຕະຖານປະເມີນລະດັບສິນເຊື່ອຂອງວິສາຫະກິດກິນດື່ມ"ເປັນຕົ້ນ.
