ທ່ານໂອບາມາປະກາດສິ້ນສຸດ"ໜ້າທີ່ສູ້ຮົບ"ຕາມເວລາກຳນົດ, ທະຫານອາເມລິກາປະຈຳອີຣັກຈະປ່ຽນບົດບາດ
(GMT+08:00) 2010-08-03 17:30:32 cri
CRIລາຍງານວ່າ, ວັນທີ 2 ສິງຫານີ້ຢູ່ອັດລັນຕາລັດຈໍເຈຍຂອງອາເມລິກາ,ທ່ານບາຣັກ ໂອບາມາ, ປະທານາທິບໍດີອາເມລິກາປະກາດວ່າ,ທະຫານອາເມລິກາປະຈຳອີຣັກຈະສິ້ນສຸດ"ໜ້າທີ່ສູ້ຮົບ"ໃນວັນທີ 31 ເດືອນນີ້ຕາມແຜນການ, ແລະຈະຖອນທະຫານສູ້ຮົບຢູ່ອີຣັກອອກໄປ. ນີ້ໝາຍຄວາມວ່າບົດບາດຂອງທະຫານອາເມລິກາປະຈຳອີຣັກຈະປ່ຽນແປງໄປຢ່າງສິ້ນເຊີງ.
ໃນເວລາກ່າວຄຳປາໄສໃນກອງປະຊຸມສະມາຄົມທະຫານພິການຂອງອາເມລິກາທີ່ຈັດຂຶ້ນຢູ່ອັດລັນຕາໃນວັນທີ 2 ສິງຫານີ້, ທ່ານໂອບາມາກ່າວວ່າ, ເຖິງວ່າປະຈຸບັນຍັງບໍ່ຮອດເວລາທີ່ທະຫານອາເມລິກາຖອນອອກຈາກອີຣັກໝົດເທື່ອ, ແຕ່ອາເມລິກາຈະປ່ຽນຈາກໃຊ້ການທະຫານເຂົ້າແຊກວຽກງານອີຣັກຫັນເປັນນຳພາວຽກງານອີຣັກດ້ານການຕ່າງປະເທດ. ທ່ານໂອບາມາກ່າວວ່າ,ປະຈຸບັນການຖອນທະຫານສູ້ຮົບໂດຍກົງອອກຈາກອີຣັກພວມດຳເນີນຢູ່,ອາເມລິກາໄດ້ປິດຫຼືມອບຄ້າຍທະຫານປະຈຳອີຣັກຫຼາຍຮ້ອຍແຫ່ງ, ຂົນສົ່ງອຸປະກອນການທະຫານຫຼາຍລ້ານເຄື່ອງ,ການຖອນທະຫານຈະສຳເລັດກ່ອນວັນທີ 31 ເດືອນນີ້ຕາມເວລາກຳນົດ.
ນັບແຕ່ເກີດສົງຄາມອີຣັກໃນປີ 2003 ມານີ້, ຍ້ອນວ່າບໍ່ໄດ້ຮັບຜົນຕາມທີ່ຕັ້ງໄວ້, ຍິງກວ່ານັ້ນອີຣັກໄດ້ເກີດເຫດການຮຸນແຮງຕະຫຼອດ,ອາເມລິກາໄດ້ເພີ່ມທະຫານໄປອີຣັກຫຼາຍເທື່ອ. ນັບແຕ່ທ່ານໂອບາມາຂຶ້ນຮັບຕຳແໜ່ງມານີ້, ໄດ້ຍ້າຍຈຸດສຸມຂອງສົງຄາມຕໍ່ຕ້ານລັດທິກໍ່ການຮ້າຍຈາກອີຣັກໄປອັຟການີສະຖານ,ສະນັ້ນໄດ້ຖອນທະຫານສູ້ຮົບໂດຍກົງອອກຈາກອີຣັກເທື່ອລະກ້າວ.ປະຈຸບັນ,ທະຫານອາເມລິກາປະຈຳອີຣັກມີປະມານ 8 ໝື່ນຄົນ.ພາຍຫຼັງສິ້ນສຸດໜ້າທີ່ສູ້ຮົບໃນທ້າຍເດືອນນີ້ແລ້ວ,ຍັງຈະມີທະຫານສູ້ຮົບໂດຍກົງ 2 ໝື່ນກວ່າຄົນຈະຖອນອອກຈາກອີຣັກ, ແລະຈະຮັກສາທະຫານປະຈຳອີຣັກປະມານ 5 ໝື່ນຄົນເພື່ອໃຫ້ການຊ່ອຍເຫຼືອກອງທັບອີຣັກ,ປ້ອງກັນຜົນປະໂຫຍດຂອງອາເມລິກາຢູ່ອີຣັກແລະຮັບປະກັນສະໜອງວັດຖຸຕ່າງໆ.
ການວິເຄາະຊີ້ອອກວ່າ, ທ່ານໂອບາມາປະກາດສິ້ນສຸດຫນ້າທີ່ສູ້ຮົບຢ່າງຫມັ້ນໃຈໃນເວລານີ້,ແມ່ນຍ້ອນສາເຫດຫລາຍດ້ານຄື:ກ່ອນອື່ນ,ອາເມລິກາສຳເລັດການຖອນທະຫານຕາມເວລາກຳນົດ,ແມ່ນໄດ້ປະຕິບັດຕາມສັນຍາທີ່ເຊັນກັບລັດຖະບານອີຣັກ,ສາມາດສ້າງພາບພົດທີ່ດີຢູ່ເຂດຕາເວັນອອກກາງ;ອັນທີສອງ, ຕັ້ງແຕ່ທ່ານໂອບາມາຂຶ້ນກຳອຳນາດເປັນຕົ້ນມາ,ໄດ້ຫັນຈຸດສຸມຂອງສົງຄາມຕ້ານການກໍ່ການຮ້າຍໄປສູ່ອັຟການີສະຖານ,ການສິ້ນສຸດຫນ້າທີ່ສູ້ຮົບຢູ່ອີຣັກສາມາດໂອນກຳລັງຄົນແລະວັດຖຸຢ່າງຫລວງຫລາຍຈາກອີຣັກໄປອັຟການີສະຖານ,ສາມາດໂຈມຕີກຸ່ມຕາລີບັນທີ່ຢູ່ໃນອັຟການີສະຖານນັ້ນຢ່າງບັງເກີດຜົນກວ່າເກົ່າ,ນີ້ກໍ່ມີຜນົດີຕໍ່ການສຳເລັດເປົ້າຫມາຍຂອງລັດຖະບານໂອບາມາທີ່ຈະຖອນທະຫານອອກຈາກອັຟການີສະຖານໃນເດືອນກໍລະກົດປີຫນ້າ.ແລະສາເຫດສຳຄັນອີກອັນຫນຶ່ງກໍ່ຄືເປັນການກະກຽມໃຫ້ແກ່ການເລືອກຕັ້ງທົ່ວໄປໄລຍະກາງທີ່ຈະມາຮອດ.
ທ່ານໂອບາມາຫວັງຢາກໃຊ້ການສິ້ນສຸດສົງຄາມອີຣັກເພື່ອກອບກູ້ສຽງສະຫນັບສະຫນູນຂອງປະຊາຊົນຕໍ່ຕົນເອງແລະພັກປະຊາທິປະໄຕຫລືດີໂມແຄຼັດ.
ເຖິງວ່າມີສື່ມວນຊົນບໍ່ໜ້ອຍຖືການສິ້ນສຸດໜ້າທີ່ສູ້ຮົບຢູ່ອີຣັກເປັນຂີດໝາຍສຳຄັນອັນໜຶ່ງ,ແຕ່ມີນັກວິເຄາະຊີ້ອອກວ່າ,ເຖິງວ່າທ່ານໂອບາມາປະກາດສິ້ນສຸດໜ້າທີ່ສູ້ຮົບສາມາດເຮັດໃຫ້ຄຳທີ່ວ່າ"ສົງຄາມອີຣັກ"ກາຍເປັນປະຫວັດສາດໄດ້ກໍ່ຕາມ,ແຕ່ວ່ານີ້ບໍ່ໝາຍຄວາມວ່າອາເມລິກາໄດ້ຮັບໄຊຊະນະຢູ່ອີຣັກແລ້ວ.ຫວ່າງມໍ່ໆມານີ້,ສະພາບຄວາມປອດໄພໃນອີຮັກຊຸດໂຊມລົງຢ່າງກະທັນຫັນ,ເຫດການຫຼອນໂຈມຕີດ້ວຍການລະເບີດແບບສະຫຼະຊີບເກີດຂຶ້ນເລື່ອຍໆ.ໃນຂະນະດຽວກັນນີ້,ພາຍຫຼັງຈັດການເລືອກຕັ້ງສະພາໃນວັນທີ7ມີນານີ້ແລ້ວ,ສະ ພາບການເມືອງຂອງອີຣັກໄດ້ຕົກຢູ່ໃນສະພາບທີ່ບໍ່ມີທາງອອກ,ລັດຖະບານໃໝ່ສ້າງຕັ້ງຂຶ້ນຍາກ.ນອກນີ້,ວົງການຕ່າງປະເທດກໍ່ເຫັນໄປໃນແງ່ບໍ່ດີຕໍ່ສະພາບການຢູ່ສະໜາມຮົບອັຟການິສຖານຂອງອາເມລິກາ.ສະນັ້ນ,ການຖອນທະຫານອອກຈາກອີຣັກພຽງແຕ່ເປັນການເລີ່ມຕົ້ນເທົ່ານັ້ນ,ເວລາໃດທີ່ຈະສິ້ນສຸດສົງຄາມຕ້ານການກໍ່ການຮ້າຍທີ່ແທ້ຈິງ?ນັ້ນຄືບັນຫາທີ່ຄົນອາເມລິກາສົນໃຈແທ້ໆ.
