ວິທະຍຸສາກົນແຫ່ງປະເທດຈີນ!ສະບາຍດີທ່ານຜູ້ຟັງທີເຄົາລົບ, ວັນທີ22ກັນຍານີ້ຕາມເວລາທ້ອງຖິ່ນ, ທ່ານເວີຍເຈຍປາວນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດສະຫັດສະວັດດ້ານການພັດທະນາຂອງສະຫະປະຊາຊາດແລະກ່າວຄຳປາໄສ, ແນະນຳໝາກຜົນທີ່ໄດ້ຮັບແລະເຈດຈຳນົງຂອງຈີນເພື່ອຊຸກຍູ້ການປະຕິບັດເປົ້າໝາຍສະຫັດສະວັດດ້ານການພັດທະນາ, ປະກາດນະໂຍບາຍແລະມາດຕະການໃໝ່ຕ່າງໆດ ແລະຮຽກຮ້ອງໃຫ້ປະຊາຄົມໂລກຮ່ວມກັນຊຸກຍູ້ການຈັດຕັ້ງປະຕິບັດຂອງເປົ້າໝາຍສະຫັດສະວັດດ້ານການພັດທະນາ.
ທ່ານເວີນເຈຍປາວກ່າວວ່າ, ນັບແຕ່ກອງປະຊຸມສຸດຍອດສະຫັດສະວັດຂອງສະຫະປະຊາຊາດໄຂຂຶ້ນເປັນເວລາ10ປີມານີ້, ພາຍໃຕ້ຄວາມພະຍາຍາມຮ່ວມຂອງປະຊາຄົມໂລກ, ປະຊາຊົນທີ່ອຶກຢາກຢ່າງຫຼວງຫຼາຍໄດ້ແກ້ໄຂບັນຫາກິນອີ່ມແລ້ວ. ໃນເຂດແຄ້ວນແລະຂົງເຂດຕ່າງໆການຈັດຕັ້ງປະຕິບັດເປົ້າໝາຍສະຫັດສະວັດດ້ານການພັດທະນາຍັງບໍ່ດຸນດ່ຽງ, ການບັນລຸເປົ້າໝາຍສະຫັດສະວັດຍັງມີໜ້າທີ່ໜັກໜາ. ທ່ານກ່າວວ່າ, ລັດຖະ ບານຈີນຈະເພີ່ມທະວີແລະປັບປຸງວຽກງານຊ່ວຍເຫຼືອຕ່າງປະເທດຕື່ມອີກ, ປະກອບສ່ວນເທົ່າທີ່ຄວນເຂົ້າໃນການບັນລຸເປົ້າໝາຍສະຫັດສະວັດໂດຍໄວຂອງມວນມະນຸດ. ທ່ານເວີນເຈຍປາວສະເໜີມາດຕະການ 6ຂໍ້ເພື່ອເລື່ອງນີ້.
1, ຊຸກຍູ້ການພັດທະນາວຽກງານຊີວິດການເປັນຢູ່ຂອງປະເທດພວມພັດທະນາ. 2, ຍົກເລີກໜີ້ນສິນຂອງປະເທດດ້ອຍພັດທະນາ. 3, ລົງເລິກການຮ່ວມມືດ້ານການເງິນກັບປະເທພວມພັດທະນາ. 4, ເປີດກວ້າງການພົວພັນດ້ານເສດຖະກິດການຄ້າກັບປະເທດພວມພັດທະນາ. 5, ເພີ່ມທະວີການຮ່ວມມືດ້ານກະສິກຳກັບປະເທດພວມພັດທະນາ. 6, ຊ່ວຍປະເທດພວມພັດທະນາພັດທະນາຊັບພະຍາກອນມະນຸດ.
ທ່ານເວີ່ນເຈຍປາວກ່າວວ່າ, ຈີນຈະຍົກເລີກເງິນກູ້ບໍ່ມີດອກເບ້ຍຂອງລັດຖະບານທີ່ຮອດກຳນົດໃນປີ2010 ຂອງ50ປະເທດທີ່ມີໜີ້ນສິນໜັກໜ່ວງທີ່ສຸດແລະປະເທດດ້ອຍພັດທະນາ, ສືບຕໍ່ສະໜອງເງິນກູ້ທີ່ມີດອກເບ້ຍຕ່ຳຈຳນວນໜຶ່ງແລະສະໜັບສະໜູນການລະດົມທຶນສຳລັບເງິນກູ້ສິນເຊື່ອດອກເບ້ຍຕ່ຳທີ່ນຳເຂົ້າຈາກຈີນ ໃຫ້ປະເທດພວມພັດທະນາ, ສືບຕໍ່ເປີດກວ້າງຂອບເຂດຜະລິດຕະພັນສົ່ງເຂົ້າຈີນທີ່ຍົກເວັ້ນພາສີແລະຂອບເຂດຂອງປະເທດທີ່ໄດ້ຮັບຜົນປະໂຫຍດ, ແລະສົ່ງເສີມໃຫ້ວິສາຫະກິດພາຍໃນປະເທດຈີນເປີດກວ້າງການລົງທຶນຕໍ່ປະເທດພວມພັດທະນາ. ທ່ານຍັງກ່າວເປັນພິເສດວ່າ, ສຳລັບປາກີສະຖານ ທີ່ເປັນປະເທດບ້ານໃກ້ເຮືອນຄຽງທີ່ດີຂອງຈີນທີ່ໄດ້ປະສົບໄພນ້ຳຖ້ວມຢ່າງໜັກໜ່ວງໃນປີນີ້, ບົນພື້ນຖານທີ່ໃຫ້ການຊ່ວຍເຫຼືອດ້ານມະນຸດສະທຳທີ່ມີມູນຄ່າ320ລ້ານຢວນແລ້ວ, ຈີນຍັງຈະໃຫ້ການຊ່ວຍເຫຼືອລ້າທີ່ມີມູນຄ່າ200ລ້ານໂດລາແກ່ປາກີສະຖານ.
ທ່ານເວີ່ນເຈ່ຍປາວກ່າວວ່າ,5ປີຕໍ່ໜ້ານີ້ແມ່ນໄລຍະທີ່ເປັນຂໍກະແຈແຫ່ງການຈັດຕັ້ງປະຕິ ບັດເປົ້າໝາຍສະຫັດສະວັດດ້ານການພັດທະນາ.ສະຫະປະຊາຊາດຄວນຖືການຊຸກຍູ້ໃຫ້ບັນລຸເປົ້າໝາຍສະຫັດສະວັດຕາມກຳນົດເປັນບັນຫາສຳຄັນອັນດັບໜຶ່ງ,ປະຊາຄົມໂລກຄວນຖືການຊ່ວຍເຫຼືອການພັດທະນາຂອງອາຟະລິກາແລະຫຼຸດພົ້ນອອກຈາກຄວາມທຸກຍາກເປັນທິດພະຍາຍາມຕົ້ນຕໍ,ປະເທດພວມພັດທະນາຄວນຖືການກຳຈັດຄວາມທຸກຍາກໂດຍຜ່ານການພັດທະນາເປັນໜ້າທີ່ໃຈກາງ.ທ່ານຊີ້ອອກວ່າ,ປະເທດທີ່ພັດທະນາແລ້ວຄວນຫາບແບກໜ້າທີ່ຕົ້ນຕໍທີ່ຊ່ວຍເຫຼືອປະເທດພວມພັດທະນາ.ທ່ານເວີ່ນເຈ່ຍປາວກ່າວວ່າ:"ປະເທດທີ່ພັດທະນາແລ້ວຄວນປະຕິບັດຕາມຄຳໝັ້ນສັນຍາຢ່າງແທ້ຈິງ,ເຮັດໃຫ້ການຊ່ວຍເຫຼືອຂອງຝ່າຍທາງການເພີ່ມເຖິງລະດັບ0,7%ຂອງລາຍໄດ້ແຫ່ງຊາດ,ສະໜອງເງິນທຶນໄລຍະຍາວ,ໝັ້ນທ່ຽງແລະຄາດຄະເນໄດ້ໃຫ້ແກ່ປະເທດພວມພັດທະນາ,ການຊ່ວຍເຫຼືອຄວນແມ່ນເອື້ອເຟື້ອເຜື່ອແຜ່ແລະບໍ່ມີເງື່ອນໄຂເພີ່ມເຕີມ."
ໃນຕອນສຸດທ້າຍ,ທ່ານເວີ່ນເຈ່ຍປາວຮຽກຮ້ອງໃຫ້ປະຊາຄົມໂລກຈົ່ງໃຊ້ທ່າທີອັນຕັ້ງໜ້າກວ່າເກົ່າແລະຮ່ວມມືຢ່າງຈິງໃຈກວ່າເກົ່າ,ບາກບັ່ນສູ້ຊົນເພື່ອບັນລຸເປົ້າໝາຍສະຫັດສະວັດດ້ານການພັດທະນາຕາມກຳນົດ,ແລະຊຸກຍູ້ການພັດທະນາແລະຄວາມກ້າວໜ້າຂອງມວນມະນຸດ.
