ຕາມCRIລາຍງານວ່າ: ວັນທີ23ກັນຍານີ້,ຢູ່ທີ່ການອະພິປາຍທົ່ວໄປຂອງສະມັດຊາໃຫຍ່ສະຫະປະຊາຊາດຄັ້ງທີ65,ທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ຂຶ້ນກ່າວປາຖະກະຖາພາຍໃຕ້ຫົວຂໍ້ທີ່ວ່າ"ຮູ້ຈີນທີ່ແທ້ຈິງ".ຈາກການວິເຄາະສະພາບຕົວຈິງຂອງຈີນໃນປະຈຸບັນຈົນຮອດການຕອບຄວາມລະແວງສົງໃສແລະຄວາມເປັນຫ່ວງຂອງຝ່າຍຕ່າງໆຕໍ່ການພັດທະນາໃນອະນາຄົດຂອງຈີນ,ທ່ານນາຍົກເວິ່ນເຈ່ຍປາວໄດ້ເລົ່າສູ່ຊາວໂລກຟັງກ່ຽວກັບປະເທດຈີນທີ່ແທ້ຈິງ.
ໃນການເລີ່ມຕົ້ນການກ່າວປາຖະກະຖາ,ທ່ານເວິ່ນເຈ່ຍປາວກໍ່ເວົ້າຢ່າງຊື່ກົງວ່າເຖິງວ່າGDPຂອງຈີນໄດ້ຄອງຖານະອັນດັບທີ3ຂອງໂລກກໍ່ຕາມ,ແຕ່ເມື່ອສະເລ່ຍຕໍ່ຫົວຄົນແລ້ວມີພຽງ10%ຂອງປະເທດທີ່ພັດທະນາແລ້ວ.ການປະຕິຮູບແລະໄຂປະຕູສູ່ພາຍນອກໄດ້ເຮັດຊີວິດການເປັນຢູ່ຂອງປະຊາຊົນຈີນໄດ້ຮັບການປັບປຸງໃຫ້ດີຂຶ້ນຢ່າງຫຼວງຫຼາຍ,ແຕ່ວ່າລະບົບການປະກັນສັງຄົມຂອງຈີນຍັງບໍ່ສົມບູນເທື່ອ,ການປະກອບອາຊີບຍັງມີແຮງກົດດັນຫຼາຍ.ຊີວິດດ້ານການເມືອງແລະສັງຄົມຂອງຈີນນັບມື້ນັບຟົດຟື້ນ,ແຕ່ລະບຽບປະຊາທິປະໄຕແລະກົດໝາຍຍັງບໍ່ສົມບູນເທື່ອ.ທ່ານເວິ່ນເຈ່ຍປາວກ່າວວ່າ:"ຈີນປະຕິບັດນະໂຍບາຍການຫັນເປັນທັນສະໄໝມາຮອດປະຈຸບັນ,ຄວາມກ້າວໜ້າແລະຄວາມຫຼ້າຫຼັງມີຢູ່ພ້ອມກັນ,ຄວາມຂັດແຍ່ງອັນເກົ່າກັບອັນໃໝ່ປົນກັນ,ຈີນພວມປະເຊີນກັບສິ່ງທ້າທາຍຫຼາຍຢ່າງທີ່ບໍ່ເຄີຍມີມາກ່ອນ.ຈີນຍັງຢູ່ໃນສັງຄົມນິຍົມໄລຍະຕົ້ນ,ຍັງຄົງເປັນປະເທດທີ່ພວມພັດທະນາ,ນີ້ແມ່ນສະພາບພື້ນຖານແຫ່ງຊາດຂອງຈີນ,ນີ້ຄືປະເທດຈີນທີ່ແທ້ຈິງ."
ທ່ານເວິ່ນເຈ່ຍປາວກ່າວວ່າ,ເປົ້າໝາຍຍຸດທະສາດຂອງຈີນແມ່ນຮອດກາງສະຕະວັດນີ້ບັນລຸ ທັນສະໄໝໂດຍພື້ນຖານ.ເມື່ອເບິ່ງໃນອະນາຄົດ ຫຼາຍສິບປີຕໍ່ໜ້າແລ້ວ,ປະຊາຊົນຈີນຈະເດັດດ່ຽວກ້າວໄປໜ້າຕາມເສັ້ນທາງປະຕິຮູບແລະໄຂປະຕູສູ່ພາຍນອກ,ສັນຕິພາບແລະການພັດທະນາຢ່າງໝັ້ນໜຽວບໍ່ປ່ຽນແປງ.ທ່ານກ່າວເນັ້ນວ່າ,ເສັ້ນທາງນີ້ໄດ້ປ່ຽນແປງຊະຕາກຳຂອງຈີນ,ໄດ້ນຳເອົາຄວາມສຸກມາໃຫ້ແກ່ປະຊາຊົນຈີນທຸກຖ້ວນໜ້າ,ຕ້ອງຍຶດໝັ້ນແລະບູລະນະເສັ້ນທາງນີ້ໃຫ້ສົມບູນຂຶ້ນ,ບໍ່ມີເຫດຜົນຫຍັງເລີຍທີ່ຈະປ່ຽນແປງເສັ້ນທາງນີ້.ສະນັ້ນ,ຈີນຈະສືບຕໍ່ສຸມກຳລັງເຂົ້າໃນການພັດທະນາເສດຖະກິດ,ລົງເລິກການປະຕິຮູບໂຄງປະກອບ,ເປີດກວ້າງການໄຂປະຕູສູ່ພາຍນອກ,ພັດທະນາການສຶກສາແລະວິທະຍາສາດເຕັກໂນໂລຊີ,ສົ່ງເສີມວັດທະນະທຳທີ່ດີເລີດຂອງປະຊາຊາດຈີນ.
ທ່ານກ່າວວ່າ:"ພວກຂ້າພະເຈົ້າຈະປັບປຸງລະບອບເສດຖະກິດຕະຫຼາດສັງຄົມນິຍົມໃຫ້ສົມບູນຢ່າງບໍ່ຢຸດຢັ້ງ,ປັບປຸງພັດທະນາເສດຖະກິດສ່ວນລວມໃຫ້ໝັ້ນຄົງຢ່າງບໍ່ຫວັ່ນໄຫວຄອນແຄນ,ສົ່ງ ເສີມ,ສະໜັບສະໜູນແລະຊັກນຳການພັດທະນາຂອງເສດຖະກິດທີ່ບໍ່ແມ່ນສ່ວນລວມຢ່າງບໍ່ຫວັ່ນໄຫວຄອນແຄນ,ຍິ່ງເອົາໃຈໃສ່ນຳການຮັບປະກັນແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ,ປະຕິຮູບລະບຽບແບ່ງປັນລາຍໄດ້,ເຮັດໃຫ້ລະບົບປະກັນສັງຄົມຕ່າງໆ ຄື:ການລ້ຽງຜູ່ເຖົ້າແລະປິ່ນປົວພະຍາດເປັນຕົ້ນໃຫ້ສົມຂຶ້ນ,ຫັນປ່ຽນທ່ວງທ່າທີ່ຄວາມຜິດໂຕນກັນລະຫວ່າງຕົວເມືອງກັບຊົນນະບົດ,ລະຫວ່າງທ້ອງຖິ່ນກັບທ້ອງຖິ່ນແລະລະຫວ່າງຄົນທຸກຍາກກັບຄົນຮັ່ງມີນັ້ນຂະຫຍາຍກວ້າງອອກ,ເຮັດໃຫ້ປະຊາຊົນທຸກຄົນສາມາດຮັບຜົນປະໂຫຍດຈາກການປະຕິຮູບ,ການໄຂປະຕູສູ່ພາຍນອກແລະການພັດທະນາ.ໃນຂະ ນະທີ່ລົງເລິກການປະຕິຮູບໂຄງປະກອບເສດຖະກິດ,ຈະຊຸກຍູ້ແລະດຳເນີນການປະຕິຮູບໂຄງປະກອບການເມືອງເປັນຢ່າງດີ.ພວກຂ້າພະເຈົ້າຈະໂຄລົບແລະຮັບປະກັນສິດທິມະນຸດ,ປົກປັກຮັກສາຍຸດຕິທຳແລະຄວາມເປັນທຳຂອງສັງຄົມ,ເຮັດໃຫ້ຄົນສາມາດພັດທະນາຕົນເອງຢ່າງເສລີແລະຮອບດ້ານ."
ໃນຕອນທ້າຍຂອງຄຳປາຖະກະຖາ,ທ່ານເວີ່ນເຈ່ຍປາວຊີ້ອອກວ່າ,ຈີນຈະເດີນຕາມເສັ້ນທາງສັນຕິພາບແລະການພັດທະນາໂດຍສັນຕິຢ່າງໝັ້ນໜຽວບໍ່ປ່ຽນແປງ.ເນື້ອໃນໃຈກາງຂອງສັນຕິພາບແລະການພັດທະນາກໍ່ແມ່ນຍາດແຍ່ງສະພາບແວດລ້ອມສາກົນທີ່ສັນຕິເພື່ອພັດທະນາຕົນເອງ,ແລະໃຊ້ການພັດທະນາຂອງຕົນຊຸກຍູ້ສັນຕິພາບຂອງໂລກ.ທ່ານກ່າວລື້ມວ່າ:"ໃນຂະບວນການທີ່ສະແຫວງຫາການພັດທະນາຂອງຕົນ,ຈີນຈະສືບຕໍ່ຖືການຊຸກຍູ້ການພັດທະນາແລະຄວາມຈະເລີນຮຸ່ງເຮືອງຮ່ວມຂອງມວນມະນຸດເປັນໜ້າທີ່ຂອງຕົນ.ຈີນຈະສືບຕໍ່ສະແຫວງຫາແລະເປີດກວ້າງຜົນປະໂຫຍດຮ່ວມກັບປະເທດຕ່າງໆໃນໂລກ.ການພັດທະນາຂອງຈີນຈະບໍ່ເປັນຜົນຮ້າຍຕໍ່ປະເທດໃດໆ,ກໍບໍ່ຂົ່ມຂູ່ປະເທດໃດໆ.ຈີນຈະບໍ່ເດີນຕາມເສັ້ນທາງທີ່ປະເທດເຂັ້ມແຂງແລ້ວຕ້ອງເປັນມະຫາອຳນາດຢ່າງເດັດຂາດ."
