ກອງປະຊຸມເປີດກວ້າງລັດຖະມົນຕີກະຊວງປ້ອງກັນປະເທດຂອງອາຊຽນຄັ້ງທຳອິດທີ່ມີຫົວຂໍ້ວ່າ:"ການຮ່ວມມືຍຸດທະສາດ:ເພື່ອສັນຕິພາບ,ສະຖຽນລະພາບແລະການພັດທະນາຂອງພາກພື້ນນີ້"ໄດ້ຕົກລົງຈະຈັດຂຶ້ນຢູ່ນະຄອນຫຼວງຮ່າໂນ້ຍຂອງຫວຽດນາມໃນວັນທີ 12 ຕຸລານີ້. ລັດຖະມົນຕີກະຊວງປ້ອງກັນປະເທດຫຼືຜູ່ຕາງຫນ້າທີ່ມາຈາກ10ປະເທດໃນອາຊຽນແລະ ອົສຕຼາລີ , ຈີນ, ອິນເດຍ, ຍີ່ປຸ່ນ, ນິວຊີແລນ , ຣັດເຊຍ, ສ.ເກົາຫລີແລະອາເມລິກາຈະເຂົ້າຮ່ວມກອງປະຊຸມ.
ພົນເອກລຽງກວ່າງເລ້ຍ, ທີ່ປຶກສາແຫ່ງລັດທັງເປັນລັດຖະມົນຕີວ່າການກະຊວງປ້ອງກັນປະເທດຈີນກໍ່ໄດ້ເຂົ້າຮ່ວມກອງປະຊຸມເທື່ອນີ້ຕາມຄຳເຊີນ,ແລະຈະພົບປະກັບທ່ານໂຣເບີດ ເກສ໌, ລັດຖະມົນຕີວ່າການກະຊວງປ້ອງກັນປະເທດອາເມລິກາຢູ່ແຫ່ງນີ້. ນີ້ແມ່ນການພົບປະເທື່ອທຳອິດລະຫວ່າງເຈົ້າຫນ້າທີ່ລະດັບສູງຂອງສອງກອງທັບຫຼັງຈາກຈີນປະກາດຢຸດຕິການໄປມາຫາສູ່ກັນຂອງເຈົ້າຫນ້າທີ່ລະດັບສູງສອງກອງທັບຍ້ອນອາເມລິກາຂາຍອາວຸດຍຸດໂທປະກອນໃຫ້ໄຕ້ຫວັນໃນໄລຍະຕົ້ນປີນີ້. ມັນຊັດເຈນແລ້ວວ່າ, ໃນຖານະທີ່ເປັນປະເທດໃຫຍ່ທີ່ສຳຄັນໃນໂລກ,ການປໍລະປັກກັນລະຫວ່າງຈີນກັບອາເມລິກາບໍ່ຄວນຍືດເຍືອມາເປັນເວລາດົນນານ, ໂດຍສະເພາະແມ່ນການຢຸດສະງັກໃນການແລກປ່ຽນທາງການທະຫານຍິ່ງບໍ່ມີຜົນດີຕໍ່ຄວາມໄວ້ເນື້ອເຊື່ອໃຈທາງການທະຫານເຊິ່ງກັນແລະກັນລະຫວ່າງສອງຝ່າຍ, ເຊິ່ງຈະເຮັດໃຫ້ປັດໄຈບໍ່ປອດໄພຂອງພາກພື້ນເພີ່ມຂຶ້ນ, ນີ້ລ້ວນແຕ່ແມ່ນສະພາບ ທີ່ສອງປະເທດບໍ່ຫວັງຢາກເຫັນ. ຫຼັງຈາກລັດຖະມົນຕີກະຊວງປ້ອງກັນປະເທດຈີນອາເມລິກາພົບປະເທື່ອນີ້ແລ້ວ,ທ່ານເກສ໌ຍັງມີແຜນຈະຢ້ຽມຢາມຈີນກ່ອນເດືອນມັງ ກອນປີຫນ້າ. ການໄປມາຫາສູ່ກັນຂອງຜູ່ນຳຂັ້ນຕ່າງໆທາງການທະຫານລະຫວ່າງຈີນກັບອາເມລິກາຈະຟື້ນຟູຄືນສູ່ສະພາບປົກກະຕິເທື່ອລະກ້າວ,ນີ້ແມ່ນສຳຄັນທີ່ສຸດຕໍ່ສັນຕິພາບແລະສະຖຽນລະພາບຂອງພາກພື້ນນີ້ແລະໃນໂລກ
ນອກນີ້, ກອງປະຊຸມລັດຖະມົນຕີປ້ອງກັນປະເທດເທື່ອນີ້ຈະປຶກສາຫາລືບັນຫາທະເລຈີນໃຕ້ຫຼືບໍ່ນີ້ກໍ່ເຮັດໃຫ້ຄົນທັງຫຼາຍສົນໃຈນຳ. ຫວ່າງບໍ່ດົນມານີ້, ເຈົ້າພາບຫວຽດນາມເປີດເຜີຍວ່າ, ກອງປະຊຸມລັດຖະມົນຕີປ້ອງກັນປະເທດອາຊຽນ 10+8ເທື່ອນີ້ຈະຢືນຢັນຄວາມສາມັກຄີກັນ, ເອກະພາບກັນແລະຄວາມຕັດສິນໃຈເປີດກວ້າງການຮ່ວມມືດ້ານການປ້ອງກັນປະເທດເພື່ອຮັກສາສັນຕິພາບແລະສະຖຽນລະພາບຂອງພາກພື້ນ. ກອງປະຊຸມຍັງມີຄວາມໝາຍການເມືອງແລະປະຫວັດສາດສຳຄັນ, ເປັນຂີດໝາຍເປີດກົນໄກຮ່ວມມືຄວາມປອດໄພການປ້ອງກັນປະເທດສູງສຸດ. ໃນກອງປະຊຸມເທື່ອນີ້, ປະເທດສາມາຊິກອາຊຽນຕົກລົງ 5 ຂົງເຂດບູລິມະສິດທາງການຮ່ວມມືຄື: ຄວາມປອດໄພທາງທະເລ, ຮັກສາສັນຕິພາບ, ການຮ່ວມມືການແພດທະຫານ, ຕ້ານລັດທິກໍ່ການຮ້າຍແລະການຊ່ອຍເຫຼືອມະນຸດສະທຳແລະການຫຼຸດຄວາມເສຍຫາຍຈາກໄພພິບັດຕ່າງໆ.
ກ່ອນໜ້ານີ້, ເຈົ້າໜ້າທີ່ລະດັບສູງຂອງກະຊວງປ້ອງກັນປະເທດຫວຽດນາມກ່າວວ່າ, ກອງປະຊຸມເທື່ອນີ້ຈະບໍ່ລົງເລິກວເຖິງບັນຫາລະອຽດ, ພຽງແຕ່ແນໃສ່ການຕັດສິນໃຈທາງການເມືອງ, ໂດຍສະເພາະແມ່ນເນື້ອໃນການຮ່ວມມືໃນອະນາຄົດ. ທ່ານຍັງກ່າວວ່າ, ກອງປະຊຸມຈະບໍ່ຈັດບັນຫາທະເລຈີນໃຕ້ເປັນຫົວຂໍ້ຂອງກອງປະຊຸມ,ພ້ອມກັນນັ້ນບັນຫາລະອຽດອື່ນໆກໍຈະບໍ່ຈັດເຂົ້າເປັນເນື້ອໃນທາງການ. ແຕ່ວ່າໃນເວລາປຶກສາຫາລືນະໂຍບາຍຄວາມປອດໄພ, ປະເທດຕ່າງໆລ້ວນແຕ່ສາມາດສະເໜີບັນຫາທີ່ຕົນເອງສົນໃຈນຳໂດຍອີງຕາມເນື້ອໃນຈິດໃຈທີ່ເປັນເອກະພາບກັນເພື່ອເພີ່ມທະວີການຮ່ວມມືໃນອະນາຄົດ
ນັກວິເຄາະເຫັນວ່າ,ເຖິງວ່າບັນຫາທະເລຈີນໃຕ້ບໍ່ແມ່ນຫົວຂໍ້ປຶກສາຫາລືຢ່າງເປັນທາງການຂອງກອງປະຊຸມ,ແຕ່ອາດຈະມີຄົນສະເໜີບັນຫານີ້ອອກມາ.ຫຼັກໝັ້ນຂອງຝ່າຍຈີນແມ່ນ,ບັນຫາທະເລຈີນໃຕ້ບໍ່ແມ່ນບັນຫາຂອງຈີນກັບອາຊຽນ,ຍິ່ງບໍ່ແມ່ນບັນຫາພາຍໃຕ້ຂອບກອງປະຊຸມ10+8ເທື່ອນີ້,ຢູ່ສະຖານທີ່ນີ້ການເປິກສາຫາລືບັນຫາທະເລຈີນໃຕ້ແມ່ນບໍ່ເໝາະສົມ.
ພາຍໃຕ້ຂອບກອງປະຊຸມເທື່ອນີ້,ຄະນະຜູ່ແທນການທະຫານຂອງຈີນ ອາເມລິກາ ຍີ່ປຸ່ນ ອິນເດຍແລະສ.ເກົາຫຼີເປັນຕົ້ນຈະຢ້ຽມຢາມຫວຽດນາມຢ່າງເປັນທາງການ.ນອກນີ້,ບັນດາຄະນະຜູ່ແທນຍັງຈະຈັດການເຈລະຈາສອງຝ່າຍ
ປີນີ້ແມ່ນຈີນກັບຫວຽດນາມສ້າງສາຍພົວພັນການທູດຄົບຮອບ60ປີແລະເປັນປີໄມຕີຈິດມິດຕະພາບຈີນຫວຽດນາມ,ພົນເອກລຽງກວ່າງເລ້ຍ,ທີ່ປຶກສາແຫ່ງລັດທັງເປັນລັດຖະມົນຕີວ່າການກະຊວງປ້ອງກັນປະເທດຈີນນອກຈາກຈະເຂົ້າຮ່ວມກອງປະຊຸມລັດຖະມົນຕີກະຊວງປ້ອງກັນປະເທດແລ້ວຍັງຈະຢ້ຽມຢາມຫວຽດນາມ.ວັນທີ10 ຕຸລານີ້,ພາຍຫຼັງເດີນທາງໄປຮອດຮ່າໂນຍ,ພົນເອກລຽງກວ່າງເລ້ຍກໍ່ໄປເຂົ້າຢ້ຽມທ່ານນົງດຶກມັງ ເລຂາທິການໃຫຍ່ສູນກາງພັກຄອມມູນິດຫວຽດນາມ,ແລະຈະ ເຈລະຈາກັບທ່ານພັງກວາງທັນ ລັດຖະມົນຕີວ່າການກະຊວງປ້ອງກັນປະເທດຫວຽດນາມ,ເພື່ອລົງເລິກແລກປ່ຽນຄວາມເຫັນກ່ຽວກັບການເສີມຂະຫຍາຍການພົວພັນລະຫວ່າງສອງປະເທດໂດຍສະເພາະແມ່ນການພົວພັນລະຫວ່າງພາກສ່ວນຕ່າງໆຂອງກະຊວງປ້ອງກັນປະເທດແລະກອງທັບຫານຂອງສອງປະເທດ. ຈີນຫວັງວ່າໃນໂອກາດທີ່ພົນເອກລຽງກວ່າງເລ້ຍຢ້ຽມຢາມຫວຽດນາມເປັນໂອກາດທີ່ດີ,ໃນການສືບຕໍ່ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລກັນກັບກອງທັບຫວຽດນາມ,ເປີດກວ້າງການແລກປ່ຽນດ້ວຍໄມຕີຈິດມິດຕະພາບ,ລົງເລິກການຮ່ວມມືຕົວຈິງ,ຊຸກຍູ້ໃຫ້ການພົວພັນທາງການທະຫານລະຫວ່າງຈີນກັບຫວຽດນາມກ້າວໄປໜ້າຢ່າງບໍ່ຢຸດຢັ້ງ.
