ຕາມຂ່າວສານຊິນຮວາ:ໃນເວລາທີ່ເສດຖະກິດໂລກຄ່ອຍໆຟື້ນຕົວຂຶ້ນ,ຄວາມສ່ຽງຫຼຸດລົງຍັງຄົງຕົວ,ໂດລາສະຫະລັດອ່ນຄ່າລົງຢ່າງຕໍ່ເນື່ອງເຮັດໃຫ້ອັດຕາແລກປ່ຽນເງິນຕາສາກົນຂຶ້ນໆລົງໆ,ອັດຕາແລກປ່ຽນເງິນໂດລາອ່ອນຄ່າລົງຢ່າງຕໍ່ເນື່ອງເຮັດໃຫ້ເງິນຕາຫຼາຍສະກຸນແຂງຄ່າຂຶ້ນ,ຄວາມຂັດແຍ່ງດ້ານອັດຕາແລກປ່ຽນນັບມື້ນັບຮ້າຍແຮງຂຶ້ນໃນຄວາມຂັດແຂ່ງຮອບນີ້,ເງິນຢວນຈີນກາຍເປັນຈຸດສຸມອີກທີ່ບາງປະເທດເອີລົບແລະອາເມລິກາແນໃສ່.ນັກວິເຄາະກ່າວວ່າ,ອາເມລິກາຫັນປ່ຽນການຂັດແຍ່ງການຄ້າລະຫວ່າງສອງຝ່າຍອາເມລິກາຈີນເປັນຫົວຂໍ້ທົ່ວໂລກ,ບັງຄັບໃຫ້ເງິນຢວນຈີນແຂ່ງຂ່າຂຶ້ນຢ່າງວ່ອງໄວ,ການກະທຳແບບນີ້ບໍ່ມີຜົນດີຕໍ່ການແລກປ່ຽນທາງເສດຖະກິດການຄ້າລະຫວ່າງສອງຝ່າຍ,ແລະຍັງຈະມີຜົນສະທ້ອນບໍ່ດີຕໍ່ເສດຖະກິດໂລກທີ່ຫາກໍ່ຟື້ນຕົວຂຶ້ນ.
ຈີນແມ່ນຕະຫຼາດອັນໝັ້ນທ່ຽງແລະມີກຳລັງບົ່ມຊ້ອນ,ຖ້າເງິນຢວນຈີນແຂງຄ່າຂຶ້ນຢ່າງຫຼວງຫຼາຍ,ອາດຈະມີຜົນສະທ້ອນບໍ່ດີຕໍ່ຕ່ອງໂສ້ສະໜອງຜະລິດຕະພັນໂລກ."ຈີນແມ່ນຕ່ອງສຳຄັນໃນສາຍໂສ້ຜະລິດຕະກຳໂລກາວິວັດ,ແມ່ນປະເທດເຂົ້າຮ່ວມແລະປະກອບສ່ວນຢ່າງຕັ້ງໜ້າອັນສຳຄັນຂອງເສດຖະກິດໂລກ."ທ່ານບາສູຊົ່ງ ຮອງຫົວໜ້າສະຖາບັນຄົ້ນຄວ້າການທະນາຄານຂອງສູນຄົ້ນຄວ້າການພັດທະນາຂອງລັດຖະບານຈີນກ່າວວ່າ,"ຖ້າເສດຖະກິດຈີນພັດທະນາຢ່າງປອດໃສແລະໝັ້ນທ່ຽງຈະມີຜົນດີຕໍ່ເສດຖະກິດໂລກ;ກົງກັນຂ້າມ,ຖ້າອັດຕາແລກປ່ຽນຂຶ້ນໆລົງໆຫຼາຍໂພດ,ຈະຂົ່ມຂູ່ລະບົບການທະນາຄານ,ແລະຈະກະທົບຂະບວນການເສດຖະກິດໂລກທີ່ກຳລັງຟື້ນຟູ."
ອັດຕາແລກປ່ຽນແຂງຄ່າຂຶ້ນເຮັດໃຫ້ນັກວິຊາການອາເມລິກາຈຳນວນໜຶ່ງເກີດຄວາມເປັນຫ່ວງຄືກັນ. ອົງກອນຕ່າງໆຂອງອາເມລິກາ 36 ອົງກອນລວມທັງຄະນະກຳມະການການຄ້າຈີນອາເມລິກາ, ສະມາຄົມໝາກຖົ່ວເຫຼືອງອາເມລິກາແລະສະມາຄົມຊີ້ນອາເມລິກາໄດ້ຝາກຈົດໝາຍສະບັບໜຶ່ງໃຫ້ແກ່ລັດຖະສະພາອາເມລິກາໃນຫວ່າງກ່ອນນີ້ບໍ່ດົນເນື້ອໃນຈົດໝາຍຂຽນວ່າ, ກ້ຽວໄປວຽນມາກ່ຽວກັບບັນຫາອັດຕາແລກປ່ຽນຂອງເງິນຢວນຈີນ, ຈະທຳລາຍຕະຫຼາດສົ່ງອອກທີ່ເພີ່ມຂຶ້ນໄວກວ່າໝູ່ຂອງອາເມລິກາ. ທ່ານຄູເອີນ, ນັກລົງທຶນອາເມລິກາກ່າວວ່າ, "ບາດກ້າວປະຕິຮູບກົນໄກອັດຕາແລກປ່ຽນເງິນຢວນຈີນແບບຄ່ອຍເປັນຄ່ອຍໄປຈະສົ່ງຜົນສະທ້ອນດີກວ່າເກົ່າໃຫ້ແກ່ຝ່າຍຕ່າງໆ. ຖ້າເງິນຢວນຈີນແຂງຄ່າຂຶ້ນຢ່າງຫຼວງຫຼາຍຈະທຳລາຍເສດຖະກິດແລະສະຖຽນລະພາບຂອງສັງຄົມຈີນຢ່າງໜັກໜ່ວງ, ທຳລາຍການພັດທະນາເສດຖະກິດຢ່າງໃຫຍ່ຫຼວງຂອງໂລກ. ນອກນີ້, ຖ້າເງິນຢວນຈີນແຂງຄ່າຂຶ້ນຢ່າງຫຼວງຫຼາຍຍັງຈະສ້າງຄວາມສ່ຽງໃຫ້ແກ່ວິສາຫະຫິດອາເມລິກາທີ່ລົງທຶນຢູ່ຈີນ."
ຫວ່າງມໍ່ໆມານີ້ໃນເວລາເຂົ້າຮ່ວມກອງປະຊຸມສຸດຍອດອຸດສາຫະກຳການຄ້າຈີນເອີລົບຄັ້ງທີ 6, ທ່ານເວີນເຈ່ຍປາວ, ນາຍົກລັດຖະມົນຕີຈີນກ່າວວ່າ, ຖ້າວ່າອັດຕາແລກປ່ຽນເງິນຢວນຈີນບໍ່ໝັ້ນທ່ຽງ, ຈະສ້າງໄພໃຫ້ແກ່ທົ່ວໂລກ. ທ່ານໂຈ່ວສ້ຽວຊ່ວນ, ຜູ້ວ່າການທະນາຄານປະຊາຊົນຈີນກ່າວວ່າ, ການປະຕິຮູບເງິນຢວນຈີນຈະດຳເນີນໄປຕາມບາດກ້າວຂອງຕົນ, ເງິນຢວນຈີນແຂງຄ່າຂຶ້ນຕ້ອງເປັນເທື່ອລະກ້າວ, ຈີນຈະບໍ່ໃຫ້ເງິນຢວນຈີນແຂງຄ່າຂຶ້ນຢ່າງວ່ອງໄວ.
ສິ່ງທີ່ເປັນຕາເອີ່ຍເຖິງນັ້ນກໍແມ່ນ,ໃນປີ2009, ອັດຕາປະກອບສ່ວນຂອງຈີນທີ່ມີຕໍ່ການເຕີບໂຕຂອງເສດຖະກິດໂລກມີເຖິງ50%. ນັບແຕ່ກົນໄກອັດຕາແລກປ່ຽນເງິນຢວນຈີນໄດ້ມີການປະຕິຮູບໃນເດືອນກໍລະກົດປີ2005ເປັນຕົ້ນມາ, ອັດຕາແລກປ່ຽນເງິນຢວນຈີນຕໍ່ເງິນໂດລາສະຫະລັດແຂງຄ່າຂຶ້ນ22%, ພ້ອມດຽວກັນນີ້, ເງິນຕາສຳຄັນຂອງໂລກລວມທັງເງິນໂດລາພັດອ່ອນຄ່າລົງ.
ທ່ານຊາລສ ດາລາຣາ, ປະທານສະຖາບັນການເງິນສາກົນກ່າວວ່າ, ການຟື້ນຕົວຂອງເສດຖະກິດໂລກຍັງອ່ອນແອຫລາຍ, ປະເທດຕ່າງໆຄວນມີການຮ່ວມມືຄືນໃຫມ່. ຕໍ່ຫນ້າສະພາບການທີ່ເສດຖະກິດໂລກຍັງມີປັດໄຈສ່ຽງທີ່ບໍ່ແນ່ນອນ, ສະນັ້ນ, ການຮ່ວມມືຫລາຍຝ່າຍໃນທົ່ວໂລກຈຶ່ງເປັນສິ່ງສຳຄັນທີ່ສຸດເພື່ອຮັບມືກັບຄວາມທ້າທາຍໃນຂະແຫນງການເສດຖະກິດແລະການເງິນສາກົນ.
