ຕາມລາຍງານຂອງນັກຂ່າວcriແລະນັກຂ່າວໜັງສືພິມປະຊາຊົນລາຍວັນ:ວັນທີ12 ຕຸລານີ້,ກອງປະຊຸມເປິດກວ້າງຂອງລັດຖະມົນຕີປ້ອງກັນປະເທດອາຊຽນຄັ້ງທຳອິດໄດ້ຈັດຂຶ້ນຢູ່ສູນປະຊຸມແຫ່ງຊາດທີ່ຮ່າໂນຍຫວຽດນາມ.ລັດຖະມົນຕີປ້ອງກັນປະເທດແລະຜູ່ແທນທີ່ມາຈາກ10ປະເທດອາຊຽນກັບອົສຕຼາລີ ຈີນ ອິນເດຍ ຍີ່ປຸ່ນ ນູແວນເຊລັງ ຣັດເຊຍ ສ.ເກົາຫຼີແລະອາເມລິກາໄດ້ເຂົ້າຮ່ວມກອງປະຊຸມ.ໃນພິທີໄຂກອງປະຊຸມ,ທ່ານຟຸງກວາງຕັງ ລັດຖະມົນຕີວ່າການກະຊວງປ້ອງກັນປະເທດຫວຽດນາມກ່າວຄຳປາໄສວ່າ,"ລັດຖະມົນຕີປ້ອງກັນປະເທດຫຼືຜູ່ແທນຂອງ18ປະເທດນັ່ງຮ່ວມກັນ,ບໍ່ສົນທະນາກ່ຽວກັບສົງຄາມ,ຮ່ວມກັນຊອກຫາຊ່ອງທາງການຮ່ວມມືໃນການປ້ອງກັນປະເທດແລະຄວາມປອດໄພທີ່ຊຸກຍູ້ສັນຕິພາບ ສະຖຽນລະພາບແລະການພັດທະນາຢ່າງແທ້ຈິງ,ສະພາບແບບນີ້ເຫັນໜ້ອຍໃນປະຫວັດສາດສະໄໝໃໝ່ຂອງໂລກ."ມີຄຳວິເຄາະຊີ້ອອກວ່າ,ກອງປະຊຸມເປີດກວ້າງຂອງລັດຖະມົນຕີປ້ອງກັນປະເທດອາຊຽນຄັ້ງທຳອິດຈັດຂຶ້ນໝາຍຄວາມວ່າກົນໄກຄວາມປອດໄພພາກພື້ນອັນໃໝ່ພວມເປັນຮູບເປັນຮ່າງຂຶ້ນ.
ຫົວຂໍ້ຂອງກອງປະຊຸມຄັ້ງນີ້ທີ່ດຳເນີນເປັນເວລາ1ວັນແມ່ນ"ການຮ່ວມມືຍຸດທະສາດເພື່ອສັນຕິພາບ ສະຖຽນລະພາບແລະການພັດທະນາຂອງພາກພື້ນ".ເປົ້າໝາຍອັນສໍາຄັນຂອງກອງປະຊຸມຄັ້ງນີ້ແມ່ນຊຸກຍູ້ການສ້າງຕັ້ງກົນໄກຮ່ວມມືທີ່ມີຜົນດີຕໍ່ສັນຕິພາບ ຄວາມປອດໄພແລະຄວາມຈະເລີນຮຸ່ງເຮືອງຮ່ວມຂອງພາກພື້ນ. ຝ່າຍທີ່ເຂົ້າຮ່ວມກອງປະຊຸມຈຸດໜ້າແມ່ນໄດ້ເປິກສາຫາລືກ່ຽວກັບເນື້ອໃນ3ດ້ານ.ອັນທີໜຶ່ງແມ່ນໃຫ້ການຕັດສິນໃຈທາງການເມືອງຂອງບັນດາລັດຖະມົນຕີປ້ອງກັນປະເທດເປັນໄປໃນທິດທາງດຽວກັນ,ດຳເນີນການຮ່ວມມືໃນການຮັບມືກັບການທ້າທາຍຕໍ່ຄວາມປອດໄພທີ່ມີຢູ່ແລ້ວແລະການທ້າທາຍແບບໃໝ່.ສອງແມ່ນກ້າວເຖິງຄວາມເຫັນເປັນເອກະສັນກັນໃນ5ຂົງເຂດຮ່ວມມືທີ່ກອງປະຊຸມສະເໜີອອກເຊັ່ນຄວາມປອດໄພເທິງທະເລ ແພດທະຫານ ການກູ້ໄພພິບັດແລະການຊ່ອຍເຫຼືອມະນຸດສະທຳ ການເຄື່ອນໄຫວຮັກສາສັນຕິພາບແລະຕ້ານການກໍ່ການຮ້າຍ.ອັນທີສາມແມ່ນຄົ້ນຄວ້າຮູບແບບໝູນເດີນຂອງກົນໄກກອງປະຊຸມລັດຖະມົນຕີປ້ອງກັນປະເທດ10+8.
ລັດຖະມົນຕີປ້ອງກັນປະເທດແລະຜູ່ແທນບັນດາປະເທດທີ່ເຂົ້າຮ່ວມໄດ້ແລກປ່ຽນບົດຮຽນໃນການປ້ອງກັນປະເທດແລະຄວາມປອດໄພ,ເພີ່ມທະວີຄວາມຮັບຮູ້ແລະຄວາມໄວ້ເນື້ອເຊື່ອໃຈເຊິ່ງກັນແລະກັນ,ໄດ້ສ້າງພື້ນຖານໃຫ້ການຮ່ວມມືຢ່າງແທ້ຈິງໃນຕໍ່ໜ້າ.ບັນດາລັດຖະມົນຕີຍັງເປິກສາຫາລືກ່ຽວກັບກຳລັງບົ່ມຊ້ອນ,ອະນາຄົດແລະທິດຂອງການຮ່ວມມືແທ້ຈິງພາຍໃຕ້ກົນໄກກອງປະຊຸມລັດຖະມົນຕີປ້ອງກັນປະເທດ10+8,ຊອກຮູ້ບັນຫາຕົ້ນຕໍທີ່ບັນດາປະເທດສົນໃຈ,ແລກປ່ຽນຄຳຄິດຄຳເຫັນແລະຂໍ້ສະເໜີໃນການຮ່ວມມືແທ້ຈິງໃນຕໍ່ໜ້າ.ຖະແຫຼງການຮ່ວມທີ່ຮັບຮອງເອົາພາຍຫຼັງກອງປະຊຸມກາຍເປັນເອກະສານທາງການສະບັບທຳອິດທີ່ກົນໄກກອງປະຊຸມລັດຖະມົນຕີປ້ອງກັນປະເທດ10+8ເປັນຮູບເປັນຮ່າງຂຶ້ນ.ຄືທ່ານພຸງກວາງຕັງ ລັດຖະມົນຕີວ່າການກະຊວງປ້ອງກັນປະເທດຫວຽດນາມກ່າວວ່າ,ກອງປະຊຸມເປິດກວ້າງຂອງລັດຖະມົນຕີກະຊວງປ້ອງກັນປະເທດອາຊຽນຈັດຂຶ້ນເປັນຂີດໝາຍໃນຂະບວນການພັດທະນາຂອງອາຊຽນ,ມີຄວາມໝາຍຍຸດທະສາດອັນສຳຄັນຕໍ່ສັນຕິພາບ,ສະຖຽນລະພາບແລະການພັດທະນາຂອງພາກພື້ນກໍຄືຂອງໂລກ.
ລັດຖະມົນຕີປ້ອງກັນປະເທດອາເມລິກາແລະຣັດເຊຍເຂົ້າຮ່ວມກອງປະຊຸມ,ເຮັດໃຫ້ກອງປະຊຸມທີ່ອັນໄດ້ຮັບຄວາມສົນໃຈຈາກສາກົນ.ກ່ອນກອງປະຊຸມ,ທ່ານຫງວນຈີວິງ,ລັດຖະມົນຕີຊ່ວຍວ່າການກະຊວງປ້ອງກັນປະເທດຫວຽດນາມຢ້ຽມຢາມອາເມລິກາໄລຍະສັ້ນ,ເພື່ອເຊີນລັດຖະມົນຕີປ້ອງກັນປະເທດອາເມລິກາໄປເຂົ້າຮ່ວມກອງປະຊຸມຢ່າງເປັນທາງການຢູ່ຮ່າໂນ້ຍ.ໃນໄລຍະຢູ່ຮ່າໂນ່ຍ,ລັດຖະມົນຕີປ້ອງກັນປະເທດຈີນແລະອາເມລິກາຈັດການເຈລະຈາລະຫວ່າງສອງຝ່າຍແລະລັດຖະມົນຕີປ້ອງກັນປະເທດຈີນຍີ່ປຸ່ນດຳເນີນການສົນທະນາເປັນເວລາສັ້ນ,ກໍ່ກາຍເປັນຈຸດໜັກທີ່ສື່ມວນຊົນລາຍງານ.
ກອງປະຊຸມເທື່ອນີ້ແມ່ນໝາກຜົນໃຫຍ່ອັນໜຶ່ງໃນໄລຍະທີ່ຫວຽດນາມເປັນປະເທດປະທານໝູນວຽນຂອງອາຊຽນໃນປີ 2010. ສື່ມວນຊົນຫວຽດນາມລາຍງານວ່າ, ນີ້ແມ່ນກອງປະຊຸມສຳຄັນທີ່ຫວຽດນາມລິເລີ່ມແລະຈັດຕັ້ງທີ່ເປີດກວ້າງການຮ່ວມມືພາຍນອກຂອງອາຊຽນ, ມີຄວາມໝາຍການເມືອງແລະປະຫວັດສາດສຳຄັນ, ແມ່ນຈຸດເລີ່ມຕົ້ນຂອງກົນໄກຮ່ວມມືໃໝ່ທີ່ປ້ອງກັນປະເທດແລະຄວາມປອດໄພຂອງພາກພື້ນ, ຈະຊຸກຍູ້ບັນລຸເປົ້າໝາຍທີ່ສ້າງປະຊາຄົມຄວາມປອດໄພການເມືອງອາຊຽນໃຫ້ສຳເລັດໃນປີ 2015.
ໃນເວລາປະກອບຄຳເຫັນໃນກອງປະຊຸມ, ພົນເອກລຽງກວ່າງເລ້ຍ, ທີ່ປຶກສາແຫ່ງລັດຈີນທາງເປັນລັດຖະມົນຕີວ່າການກະຊວງປ້ອງກັນປະເທດຈີນກ່າວວ່າ, ການສ້າງກົນໄກກອງປະຊຸມລັດຖະມົນຕີປ້ອງກັນປະເທດອາຊຽນໄດ້ສະໜອງເວທີໃໝ່ໃຫ້ແກ່ການເພີ່ມທະວີການຮ່ວມມືໃນຂົງເຂດຄວາມປອດໄພແລະວຽກງານປ້ອງກັນປະເທດລະຫວ່າງອາຊຽນກັບປະເທດຄູ່ເຈລະຈາ, ປະເທດຕ່າງໆຄວນເພີ່ມທະວີຄວາມໄວ້ເນື້ອເຊື່ອໃຈກັນແລະການປະສານສົມທົບ, ຮ່ວມກັນຊຸກຍູ້ສະຖຽນລະພາບແລະຄວາມຈະເລີນຂອງພາກພື້ນ. ຈີນມີທ່າທີເປີດປະຕູຢ່າງຕັ້ງໜ້າຕໍ່ການຮ່ວມມືຄວາມປອດໄພຂອງພາກພື້ນ, ສະໜັບສະໜູນອາຊຽນເສີມຂະຫຍາຍບົດບາດນຳພາໃນກົນໄກໃໝ່ດັ່ງກ່າວ.
ກອງປະຊຸມໄດ້ຕົກລົງເຫັນດີຈັດກອງປະຊຸມລັດຖະມົນຕີປ້ອງກັນປະເທດອາຊຽນຄັ້ງທີສອງຢູ່ບຼູໄນໃນປີ 2013. ກອງປະຊຸມລັດຖະມົນຕີປ້ອງກັນປະເທດອາຊຽນຈະຈັດຂຶ້ນທຸກໆ 3 ປີ.
