ຕາມຂ່າວcri:ວັນທີ17 ຕຸລານີ້,ກອງປະຊຸມລັດຖະມົນຕີກ່ຽວກັບຄວາມປອດໄພດ້ານທັນຍາຫານຂອງອົງການຮ່ວມມືເສດຖະກິດອາຊີປາຊີຟິກຫຼືAPECທີ່ດຳເນີນມາເປັນເວລາ2ມື້ຢູ່ນີອີກາຕະ ແຫ່ງຜະລິດທັນຍາຫານທີ່ມີຊື່ສຽງຂອງຍີ່ປຸ່ນນັ້ນໄດ້ອັດລົງ.ເວລາທີ່ກອງປະຊຸມຄັ້ງນີ້ຈັດຂຶ້ນພໍດີແມ່ນວັນທັນຍາຫານໂລກ,ນີ້ກໍ່ແມ່ນAPECຈັດກອງປະຊຸມລັດຖະມົນຕີກ່ຽວກັບຄວາມປອດໄພດ້ານທັນຍາຫານເປັນເທື່ອທຳອິດນັບແຕ່APECສ້າງຕັ້ງຂຶ້ນ22ປີເປັນຕົ້ນມາ.ຈະເຮັດແນວໃດເປີດກວ້າງການສະໜອງທັນຍາຫານ,ເພື່ອຕອບສະໜອງຄວາມຕ້ອງການທັນຍາຫານທີ່ເພີ່ມຂຶ້ນຢ່າງຕໍ່ເນື່ອງນັ້ນກາຍເປັນຈຸດສຸມທີ່ຝ່າຍຕ່າງໆສົນໃຈ.ໃນເວລາອັດ,ກອງປະຊຸມຍັງໄດ້ອອກຖະແຫຼງການນີອີກະຕະ.
ຜູ່ແທນປະມານ300ຄົນທີ່ມາຈາກ21ປະເທດແລະເຂດແຄວ້ນເຊັ່ນຈີນ,ອາເມລິກາ,ຍີ່ປຸ່ນເປັນຕົ້ນແລະ7ອົງການຈັດຕັ້ງສາກົນໄດ້ເຂົ້າຮ່ວມກອງປະຊຸມຄັ້ງນີ້.ເປົ້າໝາຍຂອງກອງປະຊຸມຄັ້ງນີ້ແມ່ນຫວັງຢາກໃຫ້ບັນດາສະມາຊິກAPECສ້າງການພົວພັນຮ່ວມມືໃນດ້ານນະໂຍບາຍທັນຍາຫານແລະກະສິກຳ,ປະກອບສ່ວນເຂົ້າໃນຄວາມປອດໄພຂອງທັນຍາຫານໂລກ.
ສື່ມວນຊົນສົນໃຈວ່າ,ວັນທີ16 ຕຸລານີ້ເຊິ່ງເປັນວັນໄຂກອງປະຊຸມຄັ້ງນີ້ພໍດີກົງກັບວັນທັນຍາຫານໂລກທີ່ສະຫະປະຊາຊາດກຳນົດໄວ້.ສະນັ້ນ,ບັນດາສະມາຊິກຕ່າງໆຂອງAPECໄດ້ຍົກຄວາມປອດໄພດ້ານທັນຍາຫານເຖິງລະດັບສູງທີ່ສຸດແລ້ວ.ເຂດອາຊີປາຊີຟິກແມ່ນເຂດທີ່ມີປະຊາກອນອຶດຫິວຫຼາຍກວ່າໝູ່ໃນໂລກ,ມີປະຊາກອນຫຼາຍລ້ານຄົນຍັງອົດຢາກ;ປະຊາກອນທີ່ຂາດສານອາຫານກວມຮອດ62%ຂອງໂລກ,ແຕ່ລະມື້ຍິ່ງກວ່ານັ້ນແຕ່ລະນາທີກໍ່ມີເດັກນ້ອຍເສຍຊີວິດຍ້ອນຂາດສານອາຫານ;25ປະເທດຂອງເຂດອາຊີປາຊີຟິກປະເຊີນກັບບັນຫາຂາດອາຫານລະດັບຕ່າງກັນ.ເຂດອາຊີປາຊີຟິກແມ່ນເຂດທີ່ມີປະຊາກອນຫຼາຍກວ່າໝູ່ໃນໂລກ,ສະນັ້ນຖ້າມີບັນຫາຄວາມບໍ່ປອດໄພດ້ານທັນຍາຫານ,ຈຳນວນຄົນທີ່ຖືກກະທົບຈະຫຼາຍກວ່າເຂດອື່ນໆ.ພຽງແຕ່ອິນເດຍປະເທດດຽວກໍ່ມີເຖິງ231ລ້ານຄົນທີ່ມີບັນຫາຄວາມບໍ່ປອດໄພດ້ານອາຫານ,ຈຳນວນນີ້ຫຼາຍກວ່າເຂດອາຟຼິກາທີ່ຢູ່ໃຕ້ທະເລຊາຍຊາຮາລາ.
ເພື່ອຮັບມືກັບບັນຫາຄວາມປອດໄພດ້ານທັນຍາຫານຢ່າງຂ້ຽວຂາດ, ໃນວັນທີ່ກອງປະຊຸມອັດລົງ, ຝ່າຍຕ່າງໆທີ່ເຂົ້າຮ່ວມກອງປະຊຸມໄດ້ຮ່ວມກັນອອກ"ຖະແຫຼງການນິອີກະຕະ". ຖະແຫຼງການເຫັນວ່າ ຄວາມປອດໄພດ້ານທັນຍາຫານຂອງໂລກພວມປະເຊີນກັບການທ້າທາຍຢ່າງໃຫຍ່ຫຼວງ, ແລະໄດ້ສະເໜີເປົ້າໝາຍທີ່ບັນລຸຜົນຜະລິດສະບຽງອາຫານຂອງໂລກເພີ່ມຂຶ້ນ 1,7 ເທົ່າກ່ອນປີ 2050. ຖະແຫຼງການຂຽນວ່າ, ເພື່ອແກ້ໄຂບັນຫາທັນຍາຫານບໍ່ພຽງພໍຍ້ອນປະຊາກອນເພີ່ມຂຶ້ນແລະການປ່ຽນແປງຂອງດິນຟ້າອາກາດ, ກອງປະຊຸມໄດ້ໄວເປົ້າໝາຍໃຫຍ່ຮ່ວມກັນສອງຢ່າງຄື"ການພັດທະນາແບບຍືນຍົງຂອງກະສິກຳ"ແລະ"ເລັ່ງລັດການລົງທຶນດ້ານການຄ້າ". ໃນດ້ານພັດທະນາກະສິກຳແບບຍືນຍົງ, ຖະແຫຼງການໄດ້ສະເໜີ 4 ທິດທາງລະອຽດຄື: ເພີ່ມຄວາມສາມາດສະໜອງທັນຍາຫານ, ຍົກສູງຄວາມສາມາດໃນການຮັບມືກັບໄພພິບັດຕໍ່ການຜະລິດກະສິກຳ, ພັດທະນາເຂດຊົນນະບົດແລະຮັບມືກັບການປ່ຽນແປງຂອງດິນຟ້າອາກາດ. ໃນດ້ານເລັ່ງລັດລົງທຶນການຄ້າ, ຖະແຫຼງການໄດ້ມີຂໍ້ສະເໜີຫຼາຍຂໍ້, ລວມທັງຊຸກຍູ້ການລົງທຶນດ້ານກະສິກຳ, ຊຸກຍູ້ການຄ້າດ້ານສະບຽງອາຫານແລະຜະລິດຕະພັນກະສິກຳ, ເສີມສ້າງຕະຫຼາດຜະລິດຕະພັນກະສິກຳ, ປັບປຸງສະພາບແວດລ້ອມຂອງວິສາຫະກິດກະສິກຳໃຫ້ດີຂຶ້ນ, ປັບປຸງມາດຕະການປ້ອງຫັນຄວາມປອດໄພດ້ານອາຫານໃຫ້ສົມບູນ. ໂດຍແນໃສ່ແກ້ໄຂປະກົດການຕ່າງໆທີ່ບໍ່ຖືກຕ້ອງໃນການພັດທະນາທີ່ອາດຈະເກີດຂຶ້ນຍ້ອນສະແຫວງຫາຜົນປະໂຫຍດກ່ອນໃນການລົງທຶນຢູ່ກະສິກຳ, ຖະແຫຼງການໄດ້ສະເໜີເປັນພິເສດວ່າຕ້ອງລົງທຶນໃສ່ການກະສິກຳຢ່າງຮັບຜິດຊອບ. ຖະແຫຼງການຍັງກ່າວວ່າຈະສືບຕໍ່ທຳຄວາມພະຍາຍາມເພື່ອຜ່ອນຄວາມອິດຫິວແລະຫຼຸດຄວາມທຸກຍາກ. ເນື້ອໃນຂອງ"ຖະແຫຼງການນິອີກະຕະ"ຈະຂຽນເຂົ້າໃນເອກະສານຂອງກອງປະຊຸມສຸດຍອດອົງການAPECທີ່ຈັດຈັດຂຶ້ນຢູ່ເມືອງໂຢໂກຮາມາໃນເດືອນພະຈິກປີນີ້.
ຄວາມປອດໄພດ້ານທັນຍາຫານບໍ່ພຽງແຕ່ໝາຍຄວາມວ່າຕ້ອງສະໜອງທັນຍາຫານຢ່າງພຽງພໍເທົ່ານັ້ນ, ຍັງຄວນຮັບປະກັນໃຫ້ທຸກຄົນໄດ້ຮັບອາຫານ. ອົງການAPECຫວັງວ່າກອງປະຊຸມເທື່ອນີ້ຈະສາມາດເຮັດໃຫ້ຝ່າຍຕ່າງໆເອົາໃຈໃສ່ນຳບັນຫາຄວາມຄວາມປອດໄພດ້ານທັນຍາຫານຢ່າງຈິງຈັງ, ແລະອອກແຮງເພື່ອລົງທຶນດ້ານກະສິກຳຕື່ມອີກ, ພັດທະນາຕະຫຼາດຜະລິດຕະພັນກະສິກຳແລະປັບປຸງກົນໄກຕະຫຼາດທີ່ກ່ຽວຂ້ອງໃຫ້ສົມບູນຂຶ້ນ.
