ເອຊຽນເກມກວາງໂຈວຈະກາຍເປັນເອຊຽນເກມທີ່ອະນຸລັກສິ່ງແວດລ້ອມ
(GMT+08:00) 2010-11-08 16:48:41 cri
ໃນຕະຫລອດຂະບວນການກະກຽມຈັດມະຫະກຳງານກິລາອາຊີຫລືເອຊຽນ ເກມກວາງໂຈວ,ໄດ້ສະແດງໃຫ້ເຫັນເຖິງແນວຄິດທີ່ລະບາຍກາກບອນຕ່ຳ, ປະຢັດພະລັງງານແລະອະນຸລັກສິ່ງແວດລ້ອມ.
ງານເອຊຽນເກມຄັ້ງນີ້ ຈະໃຊ້ສະຫນາມກິລາທັງຫມົດ 53 ແຫ່ງ, ໃນນັ້ນຫລາຍກວ່າ 80% ແມ່ນສະຫນາມກິລາເກົ່າທີ່ປັບປຸງໃຫມ່,ສ່ວນສະ ຫນາມກິລາທີ່ສ້າງໃຫມ່ມີແຕ່ 12 ແຫ່ງເທົ່ານັ້ນ. ທ່ານຊີຢ້ວຍເສິ່ງ,ຮອງເຈົ້າຄອງນະຄອນກວາງໂຈວ,ຮອງເລຂາທິການຄະນະກຳມະການຈັດຕັ້ງງານເອຊຽນເກມກວາງໂຈວກ່າວວ່າ, ໃນການວງແຜນ,ອອກແບບແລະກໍ່ສ້າງສະຫນາມກິລາສຳລັບເອຊຽນເກມ,ໄດ້ສະແດງເຖິງຈຸດພິເສດທີ່ອະນຸລັກສິ່ງແວດລ້ອມແລະປະຢັດພະລັງງານ.ທ່ານກ່າວວ່າ:
ການສ້າງສາສະຫນາມກິລາໄດ້ໃຊ້ຈຸດພິເສດທາງດິນຟ້າອາກາດຂອງເມືອງກວາງໂຈວທີ່ຕັ້ງຢູ່ເຂດໃກ້ແຖບຮ້ອນ,ໄດ້ມີການອອກແບບທີ່ເຮັດໃຫ້ອາກາດລຸລ່ວງແລະນຳໃຊ້ແສງແດດຢ່າງເຕັມທີ່, ແລະພະຍາຍາມບັນລຸເປົ້າຫມາຍທີ່ໃຫ້ສິ່ງກໍ່ສ້າງຫລຸດຈຳນວນລະບາຍກາກບອນໃຫ້ຕ່ຳລົງໂດຍນຳໃຊ້ອຸປະກອນປະຢັດພະລັງງານແລະອະນຸລັກສິ່ງແວດລ້ອມແບບໃຫມມ່ແລະເຕັກນິກພິເສດຕ່າງໆ.
ເຂດຈັດງານເອຊຽນເກມກວາງໂຈວທີ່ມີເນື້ອທີ່ເກືອບ 3 ກິໂລຕາແມັດໄດ້ໂຮມສູນບ້ານພັກສື່ມວນຊົນ,ບ້ານພັກນັກກິລາ, ບ້ານພັກຂອງເຈົ້າຫນ້າທີ່ນາຍຊ່າງ,ສູນຖະແຫລງຂ່າວແລະອື່ນໆ,ໄດ້ຕອບສະຫນອງຄວາມຕ້ອງການໃນການແຂ່ງຂັນ,ທັງສາມາດດັດສ້າງໃຫ້ເປັນເຂດຄຸ້ມຊຸມຊົນແຫ່ງໃຫມມ່ທີ່ມີສະພາບແວດລ້ອມດີງາມແລະມີພື້ນຖານໂຄ່ງລ່າງຢ່າງສົມບູນຫລັງງານແຂ່ງຂັນ.ນາງອິນເຈ,ໂຄສົກບ້ານພັກນັກກິລາກ່າວວ່າ:
ເຂດຈັດງານເອຊຽນເກມໄດ້ໃຊ້ເຕັກນິກໃຫມ່ຫລາຍຢ່າງ, ຕົ້ນຕໍແມ່ນພິຈາລະນາເຖິງການປະຢັດພະລັງງານແລະອະນຸລັກສິ່ງແວດລ້ອມ.ເຊັ່ນ:ຢູ່ເຂດນີ້ໄດ້ອອກແບບທໍ່ແລະຮ່ອງຕ່າງໆຄື,ເອົາສາຍໂທລະສັບ, ສາຍສື່ສານຕ່າງໆໄວ້ຢູ່ໃນຮ່ອງແລະທໍ່ດຽວ, ຫລີກເວັ້ນບໍ່ຂຸດດິນຫລາຍເທື່ອ.ນອກນີ້, ຍັງສາມາດເກັບເອົານ້ຳຝົນມາໃຊ້ຄືນໄດ້,ເມື່ອໄດ້ເກັບເອົານ້ຳຝົນແລ້ວຜ່ານການຊຳລະສາມາດໃຊ້ຄືນໄດ້ໃນຊີວິດປະຈຳວັນ,ຄືໃຊ້ຫົດດອກໄມ້,ໃຊ້ໃນວິດແລະອື່ນໆ.
ສະຫນາມກິລາຫລັກທີ່ຕັ້ງຢູ່ເຂດຈັດງານເອຊຽນເກມກວາງໂຈວຖືວ່າເປັນສິ່ງກໍ່ສ້າງສັນຍະລັກຂອງເອຊຽນເກມກວາງໂຈວຄັ້ງນີ້.ໃນໄລຍະຈັດງານເອຊຽນເກມແລະງານກິລາຄົນພິການອາຊີ,ຢູ່ແຫງນີ້ຈະຈັດການແຂ່ງຂັນກາຍຍະກຳ, ກາຍຍະກຳລວດລາຍ, ຕຽງສະປິງ,ສະນຸກເກີແລະ squash .ສະຫນາມ ກິລາແຫ່ງນີ້ໄດ້ໃຊ້ເຕັກນິກປະຢັດພະລັງງານໃຫມ່ຫລາຍຢ່າງ, ອັດຕາປະຢັດພະລັງງານໄດ້ເຖີງ 60%. ໃນໄລຍະຈັດງານ, ເຂດຈັດງານເອຊຽນເກມຈະມີການບໍລິການໃຫ້ເຊົ່າລົດຖີບແລະລົດແບັດເຕີລີໂດຍບໍ່ເກັບຄ່າ,ເມື່ອຮອດຕອນນັ້ນການອາໄສລົດລາພາຍໃນເຂດເອຊຽນເກມຈະຫລຸດລົງຈາກ 80% ເຫລືອປະມານ 30%.
ເພື່ອໃຫ້ອາກາດໃນໄລຍະຈັດງານບັນລຸມາດຕະຖານ,ອົງການປົກຄອງນະຄອນກວາງໂຈວໄດ້ອອກແຮງປັບປຸງອາກາດ. ນັບແຕ່ປີ 2004 ເປັນຕົ້ນມາ, ນະຄອນກວາງໂຈວໄດ້ວາງຂໍ້ກຳນົດປ້ອງກັນແລະປົວແປງການກໍ່ມົນລະພິດທາງອາກາດຂອງນະຄອນກວາງໂຈວ, ແລະຂໍ້ກຳນົດປ້ອງກັນແລະຫລຸດຜ່ອນການລະບາຍຄວັນພິດຂອງລົດໃນນະຄອນກວາງໂຈວ,ເຊິ່ງເປັນກົດຂໍ້ກຳນົດທ້ອງຖີ່ນສອງສະບັບ,ແລະແຈ້ງການຂອງອົງການປົກຄອງ 18 ສະບັບແລະແຜນການຕ່າງໆ,ໄດ້ສະຫນອງພື້ນຖານຂໍ້ກຳນົດກົດລະບຽບແລະກົນໄກໄລຍະຍາວນານໃຫ້ແກ່ການຮັບປະກັນຄຸນນະພາບທາງອາກາດໃນໄລຍະຈັດງານແລະປັບປຸງຄຸນນະພາບອາກາດຢ່າງຕໍ່ເນຶ່ອງຫລັງງານເອຊຽນເກມ.
ທ່ານຢາງລິວ,ຮອງຫົວຫນ້າພະແນກຮັບປະກັນຄຸນນະພາບອາກາດຂອງຄະນະຈັດງານເອຊຽນເກມກວາງໂຈວ,ທັງເປັນຫວົຫນ້າພະແນກອະນຸລັກສິ່ງແວດລ້ອມນະຄອນກວາງໂຈວກ່າວວ່າ,ຈະຮັບປະກັນຄຸນນະພາບອາກາດຂອງກວາງໂຈວໃນໄລຍະງານເອຊຽນເກມ.ທ່ານກ່າວວ່າ:
ໃນໄລຍະຈັດງານເອຊຽນເກມ,ຈະພະຍາຍາມບໍ່ໃຊ້ມາດຕະການທີ່ຜິດປົກກະຕິຫລືໃຊ້ຫນ້ອຍທີ່ສຸດ,ພະຍາຍາມໃຫ້ຕົວເລກດັດສະນີຂອງການຕິດຕາມກວດກາອາກາດຕ່າງໆເຊັ່ນ:ຊຸນເຟີດີອອກຊິດ,ນີໂຕຼແຊນອອກສິດແລະຄວາມສົດໃສຂອງອາກາດລ້ວນແຕ່ດີກວ່າມາດຕະຖານລະດັບ 2 ຂອງລະດັບຊາດ.
