|
|
||
"ພວກເຮົາກຽມພ້ອມແລ້ວ"ຄຳເວົ້ານີ້,ເຄີຍເວົ້າໃນໄລຍະງານກິລາໂອລິມປິກປັກກິ່ງແລະງານວາງສະແດງໂລກຊຽງໄຮ້, ດຽວນີ້, ໄມ້ແລ່ນຕໍ່ແຮງໄດ້ສົ່ງມາຮອດມືຂອງນັກກິລາເອຊຽນເກມກວາງໂຈ່ວແລ້ວ. ວຽກງານກະກຽມເອຊຽນເກມຮອດຂັ້ນໃດແລ້ວ?ກວາງໂຈ່ວກຽມພ້ອມທຸກຢ່າງແລ້ວບໍ?ພວກເຮົາພາກັນໄປຊອກຫາຄຳຕອບຢູ່ກວາງໂຈ່ວເບິ່ງ.
ຫລາຍມື້ມໍ່ໆມານີ້, ເລາະຕາມຖະໜົນຫົນທາງເມືອງກວາງໂຈ່ວ, ທ່ານກໍຈະໄດ້ຍິນເພງທີ່ຊື່ວ່າ"ມີເພື່ອນມາແຕ່ໄກ"ເຊິ່ງເປັນເພງເອຊຽນເກມກວາງໂຈ່ວ, ເນື້ອຮ້ອງທຳນອງທີ່ມ່ວນຫູຄືກັນກັບວ່າໄດ້ບອກຄວາມໃນໃຈຂອງຊາວກວາງໂຈ່ວ.
ນັກກິລາທີ່ເຂົ້າຮ່ວມເອຊຽນເກມມີທັງໝົດ10156ຄົນ, ເຈົ້າຫນ້າທີ່ຄະນະນັກກິລາມີທັງຫມົດ4202ຄົນ. ຍ້ອນວ່າແຕ່ລະຄົນລ້ວນແຕ່ມີຫນ້າທີ່ໃນການແຂ່ງຂັນແລະຝຶກຊ້ອມ, ບ້ານນັກກິລາໄດ້ກາຍເປັນບ່ອນດຳລົງຊີວິດຊົ່ວຄາວຂອງເຂົ້າເຈົ້າໃນໄລຍະການແຂ່ງຂັນ. ວັນທີ5ພະຈິກນີ້, ບ້ານນັກກິລາເອຊຽນເກມທີ່ສ້າງຂຶ້ນໃຫມ່ໄດ້ເປີດຢ່າງເປັນທາງການ, ໄດ້ເລີ່ມອຳນວຍການບໍລິການຮອບດ້ານເຊັ່ນອາຫານການກິນ, ບ່ອນພັກ, ການເດີນທາງ, ການຊື້ສິນຄ້າ, ການພັກຜ່ອນ, ການແພດແລະອື່ນໆໃຫ້ແກ່ນັກກິລາ, ແລະຈັດພິທີຕ້ອນຮັບຄະນະຜູ້ແທນຈາກປະເທດຕ່າງໆ, ຕ້ອນຮັບປະມຸກລັດ, ຜູ້ນຳລັດຖະບານ, ຜູ້ແທນລາຊະວົງແລະແຂກທີ່ສຳຄັນອື່ນໆ. ທ່ານນາງຂົງຊ້າວສົງ, ຫົວຫນ້າບໍລິຫານບ້ານນັກກິລາກ່າວຢໍ້າຢ່າງເລື້ອຍໆວ່າ, ນັກກິລາທັງຫມົດປຽບເໝືອນຄົນໃນຄອບຄົວດຽວກັນ, ສ້າງບ້ານນັກກິລາໃຫ້ເປັນບ້ານທີ່ອົບອຸ່ນ.
(ສຽງນາງຂົງຊ້າວສົງ) " ຖືນັກກິລາສໍາຄັນທີ່ສຸດ, ເປັນວັດຖຸປະສົງຕົ້ນຕໍຂອງວຽກງານບ້ານນັກກິລາ. ຄະນະບໍລິຫານບ້ານນັກກິລາພວກເຮົາຈະເຮັດສຸດຄວາມສາມາດ, ອຳນວຍຄວາມສະດວກແລະບໍລິການຢ່າງດີທີ່ສຸດ, ຮອບຄອບ, ລະອຽດໃຫ້ແກ່ນັກກິລາ, ເຈົ້າຫນ້າທີ່ແລະແຂກສຳຄັນອື່ນໆ, ສ້າງຄອບຄົວໃຫຍ່ທີ່ປອດໄພ, ສະບາຍ, ອົບອຸ່ນແລະກົມກຽວກັນ."
ເອຊຽນເກມຈະໃຊ້ສະຫນາມກິລາ70ແຫ່ງ, ໃນນັ້ນມີສະຫນາມແຂ່ງຂັນ53ແຫ່ງ, ສະຫນາມຝຶກຊ້ອມສະເພາະ17ແຫ່ງ, ໄດ້ສ້າງສະຖິຕິໃຫມ່ໃນການນຳໃຊ້ສະຫນາມກິລາຫລາຍທີ່ສຸດໃນເອຊຽນເກມທີ່ບໍ່ເຄີຍມີມາໃນປະຫວັດສາດ.
ນອກຈາກນັກກິລາທີ່ເຂົ້າຮ່ວມການແຂ່ງຂັນແລ້ວ, ຈຳນວນຜູ້ຊົມການແຂ່ງຂັນທີ່ມາຈາກປະເທດຕ່າງໆໃນໄລຍະເອຊຽນເກມກໍຈະແມ່ນຕົວເລກທີ່ສູງຫຼາຍ, ຢາກໃຫ້ເຂົາເຈົ້າ ເດີນທາງຢ່າງສະດວກແລະມີຄວາມເປັນລະບຽບຮຽບຮ້ອຍລະຫວ່າງສະໜາມກິລາຕ່າງໆ, ການຄົມມະນາຄົມຂອງນະຄອນກວາງໂຈ່ວກໍຈະໄດ້ຜ່ານການທົດສອບຢ່າງເຄັ່ງຄັດແບບບໍ່ເຄີຍມີມາກ່ອນເຄີຍມີ. ຕໍ່ເລື່ອງນີ້, ທ່ານວ້າງຊິງຫຼຽງ, ເຈົ້າຄອງນະຄອນກວາງໂຈ່ວກ່າວວ່າ, ກວາງໂຈ່ວໄດ້ລົງທຶນປະມານ 70 ຕື້ຢວນສ້າງລົດໄຟໃຕ້ດິນຍາວກວ່າ 200 ກິໂລ. ປະຈຸບັນ, ນະຄອນກວາງໂຈ່ວມີທາງລົດໄຟໃຕ້ດິນ 8 ສາຍ, ສາມາດໄປເຖິງສະນາມກິລາເອຊຽນເກມ 38 ແຫ່ງ, ແລະໄປຮອດສະໜາມບິນ, ສະຖານີລົດໄຟແລະທາງລົດໄຟສາຍດ່ວນໂດຍກົງ. ທ່ານວ້າງຊິ້ງຫຼຽງກ່າວວ່າ:
"ຕາມຄຳໝັ້ນສັນຍາຂອງພວກເຮົາຕໍ່ຄະນະກຳມະການຈັດຕັ້ງໂອລິມປິກອາຊີ, ພວກເຮົາໄດ້ປະຕິບັດມາດຕະການຕ່າງໆເພື່ອປັບປຸງໃຫ້ເງື່ອນໄຂແລະສິ່ງກໍ່ສ້າງຄົມມະນາຄົມໃຫ້ດີຂຶ້ນ. ສາມາດເວົ້າໄດ້ວ່າ, ພວກເຮົາສາມາດຕອບສະໜອງຄວາມຕ້ອງການຂອງເອຊຽນເກມແລະການໝູນເດີນຂອງຕົວເມືອງໃນຂັ້ນພື້ນຖານແລ້ວ."
ຢາກຈັດເອຊຽນເກມທີ່ສຳເລັດຜົນຄັ້ງໜຶ່ງ, ເນື້ອໃນຂອງວຽກງານກະກຽມຍັງຫຼາຍຢູ່, ແຕ່ໃນຫຼາຍມື້ທີ່ເອຊຽນເກມກວາງໂຈ່ວຈະໄຂຂຶ້ນນັ້ນ, ຄົນທັງຫຼາຍໄດ້ຍິນສຽງຈາກທຸກຫົນທາງຂອງນະຄອນກວາງໂຈ່ວແລະດັງຂຶ້ນຢູ່ເທິງແມ່ນ້ຳຈູຈ່ຽງຄື:" ເອຊຽນເກມ 2010, ກວາງໂຈ່ວໄດ້ກຽມພ້ອມແລ້ວ."
© China Radio International.CRI. All Rights Reserved. 16A Shijingshan Road, Beijing, China. 100040 |