|
|
||
ເວລາ20ໂມງຂອງວັນທີ16ພະຈິກນີ້, ໃນການແຂ່ງຂັນວູຊູເພດຊາຍລຸ້ນ58ກິໂລທີ່ຈັດຂຶ້ນໃນສະໜາມກິລານານຊານະຄອນກວາງໂຈ່ວ ຈີນ, ນັກກິລາວູຊູລາວທ້າວໂພໄຊ ອະໄພລາດສູ້ກັບທ້າວຝານ ວັນ ຮຸຍ, ຫວຽດນາມ.ສ່ວນນາງປາລອຍ ບາກຄຳກໍ່ສູ້ກັບນາງຊານດີຢາຣານີ ເດວີ, ນັກກິລາອິນເດຍ. ນັກກິລາລາວທັງ2ຄົນເສຍໄຊຈຶ່ງໄດ້ແຕ່ຫຼຽນທອງໃນການແຂ່ງຂັນວູຊູເພດຊາຍລຸ້ນ56ກິໂລແລະເພດຍິງລຸ້ນ60ກິໂລ.
ໃນການແຂ່ງຂັນລະຫວ່າງທ້າວໂພໄຊກັບນັກກິລາຫວຽດນາມນັ້ນ, ຍ້ອນຮ່າງກາຍຂອງນັກກິລາຫວຽດນາມໃຫຍ່ກວ່າທ້າວໂພໄຊ, ແຕ່ທ້າວໂພໄຊກໍ່ບຸກດ້ວຍການປ້ຳແລະລົງມືຢ່າງວ່ອງໄວ, ຍົກທີ1ຈຶ່ງມີຄະແນນນຳ; ແຕ່ວ່າ, ໃນຍົກທີ2, ນັກກິລາຫວຽດນາມປ່ຽນກົນລະຍຸດໃນການຕໍ່ສູ້, ໃນເວລາທ້າວໂພໄຊປ້ຳ, ນັກກິລາຫວຽດນາມກໍຟຶດອອກແລະບຸກນັກກິລາລາວດ້ວຍການເຕະຂາແລະການຊັດມັດວົງນອກ, ຍົກທີ2ທ້າວໂພໄຊເສຍຄະແນນ; ຮອດຍົກສຸດທ້າຍ, ສອງຄົນຕໍ່ສູ້ຢ່າງສູສີ, ເວລາບຸກຄູ່ແຂ່ງຂັນ, ທັງສອງບໍ່ສາມາດເຮັດໃຫ້ຄູ່ຕໍ່ສູ້ລົ້ມລົງໄດ້. ຫຼັງຈາກການແຂ່ງຂັນທີ່ຕຶ່ນເຕັ້ນ, ຄະແນນສະເໝີກັນ, ແຕ່ວ່າ, ໃນຍົກທີ3, ທ້າວໂພໄຊຖືກເຕືອນຫຼາຍກວ່ານັກກິລາຫວຽດນາມ, ຈຶ່ງເສຍໄຊຢ່າງຫນ້າເສຍດາຍ. ຫຼັງຈາກການແຂ່ງຂັນ, ຍ້ອນເສຍໃຈຫຼາຍທ້າວໂພໄຊຈຶ່ງບໍ່ ໃຫ້ສຳພາດຕໍ່ນັກຂ່າວພວກເຮົາ. ເຖິງຈະໄດ້ແຕ່ຫຼຽນທອງໃນເອຊຽນເກມຄັ້ງນີ້ກໍຕາມ, ກໍຖືວ່າໄດ້ສ້າງກຽດຊື່ສຽງໃຫ້ແກ່ປະເທດຂອງຕົນດີສົມຄວນແລ້ວ.
ໃນການແຂ່ງຂັນວູຊູລຸ້ນ60ກິໂລ, ນາງປາລອຍ ບາກຄຳໄດ້ແຂ່ງຂັນກັບນັກກິລາອິນເດຍ. ໃນການແຂ່ງຂັນ, ຍ້ອນເຂົ້າຮ່ວມການແຂ່ງຂັນລະດັບສາກົນເປັນເທື່ອທຳອິດ, ປະສົບການຍັງບໍ່ຫຼາຍ, ແລະວິທີບຸກບໍ່ທັນດີປານໃດ, ສະນັ້ນ, ຈຶ່ງຖືກຄູ່ແຂ່ງຂັນບຸກຕະຫລອດ, ສຸດທ້າຍຈຶ່ງເສຍໄຊແລະໄດ້ຫຼຽນທອງ. ຫຼຽນທອງຫຼຽນນີ້ແມ່ນຫຼຽນທຳອິດຂອງລາວໃນການແຂ່ງຂັນວູຊູເພດຍິງ, ຍ້ອນກິລາວູຊູເພດຍິງຫາກໍ່ເລີ່ມ ຕົ້ນໃນປີກາຍນີ້, ການເຂົ້າຮ່ວມເອຊຽນເກມເທື່ອນີ້ໄດ້ຮັບຜົນງານດີແນວນີ້ກໍ່ຖືວ່າເປັນເຫດການປະຫວັດສາດຂອງລາວ.
ໃນຕອນບ່າຍມື້ວານນີ້, ນັກຂ່າວວິທະຍຸCRIຍັງໄດ້ສຳພາດການແຂ່ງຊອັບເທັນນິສດ່ຽວລະຫວ່າງນັກກິລາລາວກັບນັກກິລາອິນເດຍ. ໃນການແຂ່ງຂັນ, ຍ້ອນຂາດປະສົບການແລະມີບັນຫາໃນການບັນທຶກຄະແນນ, ທ້າວດອນດີ ແກ້ວດາລາສຸກຈຶ່ງເສຍໄຊໃນການແຂ່ງຂັນດ້ວຍຄະແນນ0ຕໍ່2.
ຫຼັງຈາກການແຂ່ງຂັນສິ້ນສຸດລົງແລ້ວ, ທ່ານຈົງ ລີອູນ ຊອຍ, ຄູເຝິກຊອັບເທັນນິສທິມຊາດລາວທີ່ມາຈາກສ.ເກົາຫຼີບອກນັກຂ່າວວ່າ
ຂ້າພະເຈົ້າຫວັງວ່າໃນຊີເກມປີໜ້າທີ່ຈັດຂຶ້ນໃນອິນໂດເນເຊຍທິມຊອັບເທັນນິສລາວຈະໄດ້ຫຼຽນເງິນຫຼືຫຼຽນຄຳ, 2ເດືອນກ່ອນທິມລາວຈະມາເຂົ້າຮ່ວມເອຊຽນເກມ, ຂ້າພະເຈົ້າກໍ່ໄດ້ມາຮອດລາວເພື່ອເຝິກນັກກິລາລາວໂດຍການຊ່ວຍເຫລືອຂອງສະຫະພັນຊອັບເທັນນິສສ.ເກົາຫຼີ. ເຖິງແມ່ນວ່ານັກກິລາລາວຍັງອ່ອນນ້ອຍ, ແຕ່ວ່າເຂົາເຈົ້າຍັງໜຸ່ມຫຼາຍ, ຍັງມີອະນາຄົດໃນກິລານີ້ອີກຍາວໄກ, ປີໜ້າສະຫະພັນຊອັບເທັນນິສສ.ເກົາຫລີຍັງຈະເຊີນນັກກິລາລາວໄປເຝິກຊ້ອມເປັນເວລາ6ເດືອນ.
ຫຼັງຈາກສຳພາດນັກກິລາຊອັບເທັນນິສລາວ, ຜູ້ລາຍງານຂ່າວຮູ້ສຶກວ່າ,ເຖິງແມ່ນວ່າເສຍໄຊໃນມື້ນີ້, ແຕ່ນັກກິລາລາວທີ່ມີອາຍຸສະເລ່ຍປະມານ20ປີກຸ່ມນີ້ຍັງມີອະນາຄົດໃນກິລາປະເພດນີ້ງົດງາມຫຼາຍ, ຫວັງວ່ານັກກິລາຊອັບເທັນນີສລາວຈະສືບຕໍ່ເຝິກຊ້ອມຢ່າງຕໍ່ເນື່ອງ, ແລະອວຍພອນໃຫ້ມີຄວາມກ້າວໜ້າຕື່ມອີກເມື່ອເຂົ້າຮ່ວມຊີເກມຫຼືວ່າເອຊຽນເກມຄັ້ງໜ້າ.
© China Radio International.CRI. All Rights Reserved. 16A Shijingshan Road, Beijing, China. 100040 |