ເອຊຽນເກມກວາງໂຈ່ວຝາກຄວາມດີເດັ່ນໄວ້ຈົນນັບບໍ່ຖ້ວນ
(GMT+08:00) 2010-11-29 14:43:33 cri
ຕອນຄ່ຳວັນທີ27 ພະຈິກນີ້, ງານມະຫາກຳກິລາອາຊີຫຼືເອຊຽນເກມຄັ້ງທີ 16 ທີ່ຈັດຂຶ້ນຢູ່ນະຄອນກວາງໂຈ່ວພາກໃຕ້ຂອງຈີນໄດ້ອັດລົງຢ່າງເປັນທາງການ. ໃນຖານະທີ່ເປັນເອຊຽນເກມຄັ້ງທີ່ມີຂະໜາດໃຫຍ່ທີ່ສຸດໃນປະຫວັດສາດ, ເອຊຽນເກມກວາງໂຈ່ວໄດ້ເຮັດໃຫ້ຄົນທັງຫຼາຍປະທັບໃຈຢ່າງເລິກເຊິ່ງໃນຫຼາຍດ້ານ, ໄດ້ຝາກຄວາມດີເດັ່ນໄວ້ຈົນນັບບໍ່ຖ້ວນ. ຕໍ່ໄປເຊີນຟັງລາຍງານລະອຽດ.
ເອຊຽນເກມກາວງໂຈ່ວທີ່ດຳເນີນເປັນເວລາ 16 ວັນນັ້ນແມ່ນງານຄັ້ງທີ່ມີຂະໜາດໃຫຍ່ທີ່ສຸດ, ນັກກິລາ 9700 ກວ່າຄົນທີ່ມາຈາກ 45 ປະເທດແລະເຂດແຄວ້ນຂອງອາຊີໄດ້ເຂົ້າຮ່ວມການແຂ່ງຂັນໃນກິລາ 42 ປະເພດ, ບໍ່ວ່າແມ່ນຈຳນວນຜູ້ເຂົ້າຮ່ວມການແຂ່ງຂັນຫຼືວ່າລາຍການການແຂ່ງຂັນລ້ວນແຕ່ຫຼາຍທີ່ສຸດໃນເອຊຽນເກມທີ່ຜ່ານມາ. ຍິ່ງກ່ວານັ້ນ, ໂດຍຜ່ານການແຂ່ງຂັນທີ່ດຸເດືອດຕື່ນເຕັ້ນເປັນເວລາ 15 ວັນ, ໄດ້ສ້າງສະຖິຕິໃໝ່ທີ່ໜ້າພູມໃຈຄື: ເອຊຽນເກມຄັ້ງນີ້ມີ 2 ຄົນທຳລາຍສະຖິຕິໂລກ 3 ປະເພດ 3 ເທື່ອ, ຜູ້ໜຶ່ງສາມາດບັນລຸສະຖິຕິໂລກໜຶ່ງເທື່ອ, ແລະໄດ້ທຳລາຍສະຖິຕິອາຊີໃນ 12 ລາຍການ. ຜົນງານເຫຼົ່ານີ້ລ້ວນແຕ່ໄດ້ສະແດງໃຫ້ເຫັນວ່າລະດັບການແຂ່ງຂັນກິລາຂອງອາຊີມີຄວາມກ້າວໜ້າຢ່າງບໍ່ຢຸດຢັ້ງ. ໃນເອຊຽນເກມຄັ້ງນີ້, ມີ 36 ປະເທດແລະເຂດແຄວ້ນໄດ້ຮັບຫຼຽນ, ໄດ້ກວມ 80% ຂອງຄະນະນັກກິລາທັງໝົດ.
ເອຊຽນເກມຄັ້ງນີ້ຍັງແມ່ນງານກິລາຄັ້ງໜຶ່ງທີ່ມີຄວາມຍຸດຕິທຳຫຼາຍ, ນັກກິລາຂອງປະເທດແລະເຂດແຄວ້ນຕ່າງໆລ້ວນແຕ່ຍຶດໝັ້ນຫຼັກການສະເໝີພາບ, ຕ້ານການໃຊ້ສານກະຕຸ້ນ. ສົມເດັດເຊັກ ອາມັດ ອານ ຟາຮັດ ອານຊາບາ, ປະທານຄະນະກຳມະການຈັດຕັ້ງງານໂອລິມປິກອາຊີກ່າວວ່າ:
"ເອຊຽນເກມເທື່ອນີ້ໄດ້ກວດຫາສານກະຕຸ້ນ 1000 ກວ່າເທື່ອ, ມີພຽງ 2 ຄົນເທົ່ານັ້ນທີ່ກວດພົບ. ທຽບກັບເອຊຽນເກມໂດຮາທີ່ກວດພົບສານກະຕຸ້ນ 16 ຄົນນັ້ນແມ່ນຄວາມກ້າວໜ້າຂຶ້ນຫຼາຍ."
ວຽກງານການຈັດຕັ້ງການແຂ່ງຂັນເອຊຽນເກມກວາງໂຈ່ວກໍເປັນໄປດ້ວຍດີ. 16ວັນຜ່ານມາ, ເອຊຽນເກມ ກວາງໂຈ່ວໄດ້ດຳເນີນໄປຢ່າງສະດວກ. ການແຂ່ງຂັນທັງໝົດລ້ວນແຕ່ສາມາດຈັດໄດ້ຕາມຕາຕະລາງເວລາທີ່ວາງໄວ້ຢ່າງເຄັ່ງຄັດ. ສະຫນາມກິລາທີ່ທັນສະໄຫມ53ແຫ່ງທີ່ກວາງໂຈ່ວອຳນວຍໃຫ້ແກ່ເອຊຽນເກມກໍ່ໄດ້ມາດຕະຖານດີ, ໃນດ້ານການບໍລິການຄົມມະນາຄົມ, ໄດ້ບັນລຸເປົ້າຫມາຍລວມຢ່າງຮອບດ້ານ, ຄື: ປອດໄພ, ສະດວກ, ຖືກຕາມເວລາ. ສິ່ງເຫຼົ່ານີ້ລ້ວນແຕ່ໄດ້ຢັງຢືນເຖິງຄວາມສາມາດຂອງຄະນະກຳມະການຈັດງານເອຊຽນເກມກວາງໂຈ່ວ.
ງານມະຫາກຳກິລາທີ່ສຳເລັດຜົນສູງແຕ່ລະເທື່ອລ້ວນແຕ່ບໍ່ສາມາດປາສະຈາກການສະຫນັບສະຫນູນຂອງບັນດາອາສາສະຫມັກ.ໃນ16ວັນທີ່ຜ່ານມາ, ອາສາສະຫມັກເອຊຽນເກມກວາງໂຈ່ວ 6 ຫມື່ນກວ່າຄົນໄດ້ໃຫ້ການບໍລິການອັນອົບອຸ່ນຮອບຄອບແກ່ນັກກິລາ, ເຈົ້າຫນ້າທີ່, ຜູ້ຊົມແລະນັກທ່ອງທ່ຽວ. ຮອຍຍິ້ມທີ່ອົບອຸ່ນຂອງອາສາສະຫມັກ, ປຽບເຫມືອນຕົວແທນທີ່ດີທີ່ສຸດຂອງເອຊຽນເກມ. ທ່ານໄພໂຣດ ອາຊາຣຸ້ງໂຣດ, ຄູຝຶກຂອງນັກກິລາເຕະກະຕໍ້ໄທ, ໄດ້ຍ້ອງຍໍຢູ່ບໍ່ເຊົາຕໍ່ການບໍລິການຂອງອາສາສະຫມັກ:
ຖ້າເວົ້າເຖິງການບໍລິການຂອງອາສາສະຫມັກແລ້ວ, ພວກຂ້ອຍໃຫ້ຄະແນນເຕັມເລີຍ, ເພາະວ່າການບໍລິການທຸກເທື່ອຂອງອາສາສະຫມັກລ້ວນແຕ່ດີຫລາຍ, ລວມທັງການຕ້ອນຮັບນຳທາງ, ການແປພາສາ, ໂດຍສະເພາະເມື່ອພວກຂ້ອຍຢາກຮູ້ເວລາລົດນັກກິລາອອກ, ເຂົ້າເຈົ້າກໍໄປສອບຖາມຢ່າງຊັດເຈນ, ແລະບອກໃຫ້ນັກກິລາຮູ້. ໃນເວລາແຂ່ງຂັນ, ເຂົ້າເຈົ້າກໍສົ່ງເຄື່ອງດື່ມໃຫ້ພວກຂ້ອຍ."
ເອຊຽນເກມເປັນງານເຕົ້າໂຮມສາມັກຄີທີ່ມ່ວນຊື່ນສຳລັບຊາວຫນຸ່ມອາຊີ. ພາຍໃຕ້ຫົວຂໍ້ວ່າ, ການແຂ່ງຂັນທີ່ຕື່ນເຕັ້ນ, ອາຊີທີ່ກົມກຽວກັນຫລືThrilling Games, Harmonious Asia, ບັນດາປະເທດແລະນັກກິລາເປັນຄູ່ແຂ່ງຂັນໃນສະຫນາມກິລາ, ແຕ່ເປັນໝູ່ເພື່ອນນອກສະຫນາມ. ສິ່ງເຫຼົ່ານີ້, ຈະເປັນຄວາມຊົງຈຳອັນມ່ວນຊື່ນຕື່ນເຕັ້ນທີ່ເອຊຽນເກມນຳມາໃຫ້ທຸກຄົນ.
