ຕອນຄ່ຳວັນທີ12ທັນວານີ້, ງານກິລາຄົນພິການອາຊີຫລືເອຊຽນເກມຄົນພິການກວາງໂຈ່ວ2010ໄດ້ໄຂຂຶ້ນຢູ່ທີ່ສູນກິລາໂອລິມປິກກວາງໂຈ່ວ. ນີ້ເປັນເທື່ອທຳອິດໃນປະຫວັດສາດທີ່ເອຊຽນເກມແລະເອຊຽນເກມຄົນພິການໄຂຂຶ້ນໃນເມືອງດຽວກັນແລະປີດຽວກັນ.
ທ່ານຫລີເຄີ້ຊຽງ, ຮອງນາຍົກລັດຖະມົນຕີຈີນປະກາດໄຂເອຊຽນເກມຄົນພິການຢ່າງເປັນທາງການ. ທ່ານດາຕຸກ ຊາຍເນວ ອະບູ ຊາຣິນ, ປະທານຄະນະກຳມະການໂອລິມປິກຄົນພິການອາຊີ, ທ່ານຟີລິບ ກຣາແວນ, ປະທານຄະນະກຳມະການໂອລິມປິກຄົນພິການສາກົນແລະແຂກສຳຄັນອື່ນໆໄດ້ເຂົ້າຮ່ວມພິທີ. ພິທີໄຂງານດຳເນີນໄປເປັນເວລາປະມານ2ຊົ່ວໂມງ, ປະກອບດ້ວຍການເດີນຂະບວນເຂົ້າສູ່ສະຫນາມ, ການສະແດງສິລະປະແລະການຈູດທວນໄຟ.
ໃນ7ມື້ຕໍ່ຫນ້າ, ນັກກິລາຄົນພິການ2500ຄົນທີ່ມາຈາກ41ປະເທດແລະເຂດແຄວ້ນໃນອາຊີຈະເຂົ້າຮ່ວມການແຂ່ງຂັນທີ່ດຸເດືອດຕື່ນເຕັ້ນແລະເພື່ອມິດຕະພາບ, ຮ່ວມກັນປະຕິບັດທັດສະນະທີ່ວ່າພວກເຮົາເຕົ້າໂຮມກັນ, ແບ່ງປັນກັນແລະໄດ້ຮັບໝາກຜົນຮ່ວມກັນ.
ງານກິລາຄົນພິການອາຊີເທື່ອນີ້ຈະມີການແຂ່ງຂັນ19ປະເພດເຊັ່ນ: ລົດຖີບ, ລອຍນ້ຳ, ແລະຍິງປືນເປັນຕົ້ນ. ຈີນໄດ້ສົ່ງນັກກິລາ400ກວ່າຄົນເຂົ້າຮ່ວມການແຂ່ງຂັນໃນທັງໝົດ19ປະເພດ.
