ຕາມຂ່າວສານຈີນ: ວັນທີ 4 ມັງກອນນີ້, ເລຂາວ່າການກະຊວງການຕ່າງປະເທດໄທກ່າວວ່າ, ກະຊວງການຕ່າງປະເທດໄທພວມໃຊ້ຊ່ອງທາງຕ່າງໆທີ່ໃຊ້ໄດ້, ເພື່ອຊ່ວຍເຫຼືອຄົນໄທ 7 ຄົນທີ່ຖືກກຳປູເຈຍກົກຕົວຈົນຮອດປັດຈຸບັນ. ທ່ານຍັງຮຽກຮ້ອງໃຫ້ຝ່າຍຕ່າງໆພາຍໃນປະເທດໄທຮັກສາຄວາມອົດກັ້ນ,ເພື່ອຫຼີກເວັ້ນບໍ່ໃຫ້ສະພາບການສັບສົນກວ່າເກົ່າ.
ມື້ດຽວກັນ, ທ່ານສຸເທບ ເທືອກສຸບັນ ຮອງນາຍົກລັດຖະມົນຕີໄທທີ່ຮັບຜິດຊອບວຽກງານຄວາມປອດໄພກໍ່ກ່າວວ່າ, ຍ້ອນວ່າໄທ ແລະ ກຳປູເຈຍພວມຢູ່ໃນໄລຍະພັກປີໃໝ່ສາກົນ, ຄວາມພະຍາຍາມຂອງໄທເພື່ອໃຫ້ຝ່າຍທະຫານກຳປູເຈຍປ່ອຍຕົວຄົນໄທ 7 ຄົນນັ້ນຍັງບໍ່ມີຄວາມຄືບໜ້າ. ທ່ານສຸເທບຫວັງໃຫ້ຜູ່ນຳກຳປູເຈຍພິຈາລະນາເຖິງການພົວພັນລະຫວ່າງສອງປະເທດ ໄດ້ຮັບການປັບປຸງໃຫ້ດີຂຶ້ນໃນຫວ່າງມໍ່ໆນີ້, ແກ້ໄຂເຫດການດັ່ງກ່າວນີ້ຢ່າງເໝາະສົມ.
ທ່ານສຸເທບກ່າວວ່າ, ໄທຈະສະແດງຄວາມອົດທົນຫຼາຍກວ່າເກົ່າ ແລະ ຫວັງໃຫ້ຜ່ານການເຈລະຈາມາແກ້ໄຂເຫດການດັ່ງກ່າວ, ທ່ານກໍ່ເຊື່ອວ່າບັນຫາຈະໄດ້ຮັບການແກ້ໄຂໂດຍຜ່ານການເຈລະຈາກັບຝ່າຍກຳປູເຈຍ, ບໍ່ຈຳເປັນໃຫ້ປະເທດອາຊຽນອື່ນໆໄກ່ເກ່ຍ
ຄົນໄທ 7 ຄົນນີ້ແມ່ນຖືກທະຫານກຳປູເຈຍຈັບດ້ວຍຖານໂທດເຂົ້າເມືອງຢ່າງຜິດກົດໝາຍ ໃນເວລາພວກເຂົາເຈົ້າສຳຫຼວດຢູ່ເຂດຊາຍແດນໄທ-ກຳປູເຈຍໃນຕອນບ່າຍວັນທີ 29 ທັນວາປີກາຍນີ້, ຖ້າສານພະນົມເປັນໄດ້ຕັດສິນ7 ຄົນດັ່ງກ່າວມີໂທດທີ່ເຂົ້າເມືອງຢ່າງຜິດກົດໝາຍແລ້ວ, ພວກເຂົາເຈົ້າຈະຖືກຈຳຄຸກ 6 ຫາ 12 ເດືອນ.
