ລາຍການດາວປະດັບຟ້າອອກວັນພະຫັດທີ 13 ມັງກອນ
(GMT+08:00) 2011-01-15 14:30:58 cri
ສະບາຍດີທ່ານຜູ້ຟັງທີ່ເຄົາລົບ, ຍິນດີຕ້ອນຮັບທ່ານເຂົ້າສູ່ລາຍການດາວປະ ດັບຟ້າ. ໃນລາຍການພາກນີ້, ອະລຸນຈະແນະນຳຈົວເວິນຊຽນ, ນັກຮ້ອງຍິງໄຕ້ຫວັນຂອງຈີນສູ່ທ່ານຟັງ. ໃນຕົ້ນຂອງລາຍການ ຈະໃຫ້ທ່ານຟັງເພງ "ຕົ່ງທ່ຽນເຕີຈີຈື" ແປວ່າ ໝາກກ້ຽງຍາມໜາວ ສາກ່ອນ, ແລ້ວອະລຸນຈະແນະນຳນັກຮ້ອງຈົວເວິນຊຽນສູ່ຟັງຕື່ມ.
ຈົວເວິນຊຽນເກີດຢູ່ໄຕ້ຫວັນຂອງຈີນເມື່ອເດືອນມັງກອນ 1986, ນາງມີພອນສະຫວັນທາງດ້ານດົນຕີ. ນັບແຕ່ອາຍຸ 8 ປີ, ນາງກໍເລີ່ມເຂົ້າຮ່ວມການແຂ່ງຂັນຮ້ອງເພງຫຼາຍເທື່ອ, ເມື່ອອາຍຸ 12 ປີ, ໃນການແຂ່ງຂັນຮ້ອງເພງເທື່ອໜຶ່ງ, ຍ້ອນນາງມີການສະແດງທີ່ພົ້ນເດັ່ນ, ຈຶ່ງໄດ້ຮັບການຕີລາຄາທີ່ດີຈາກຄະນະກຳມະການ ແລະ ຜູ້ຊົມທັງຫຼາຍ, ພໍການແຂ່ງຂັນສິ້ນສຸດລົງ, ຜູ້ຈັດການໃນວົງການບັນເທີງໄດ້ເຊັນສັນຍາກັບນາງ ແລ້ວອົບຮົມຄວາມຮູ້ດ້ານດົນຕີໃຫ້ນາງຢ່າງເປັນລະບົບ. ສະນັ້ນ, ນາງຈົວເວິນຊຽນ ໄດ້ສ້າງພື້ນຖານດ້ານດົນຕີມາເປັນຢ່າງດີແຕ່ຍາມຍັງນ້ອຍ, ກໍເປັນເງື່ອນໄຂທີ່ດີຂອງນາງໃນການພັດທະນາໃນວົງການບັນເທີງ. ແຕ່ວ່າ, ເສັ້ນທາງໃນວົງການບັນເທີງຂອງນາງກໍບໍ່ລາບລື່ນປານໃດ, ເມື່ອນາງອາຍຸ 15 ປີ, ນາງໄດ້ອອກອາລະບ້ຳດ່ຽວຊຸດທຳອິດ, ແຕ່ເພງໃນອາລະບ້ຳກໍບໍ່ໄດ້ຮັບຄວາມນິຍົມພໍປານໃດ. ພໍເລີ່ມຕົ້ນກໍປະສົບຄວາມຫຼົ້ມເຫຼວ, ແຕ່ນາງຈົວເວິນຊຽນ ກໍບໍ່ທໍ້ຖອຍໃຈ, ປະສົບການຄັ້ງນີ້ ໄດ້ເຮັດໃຫ້ນາງເຫັນຈຸດອ່ອນຂໍ້ຄົງຄ້າງຂອງຕົນແລະຍິ່ງດຸໝັ່ນກວ່າເກົ່າອີກ. ດ້ວຍຄວາມພະຍາຍາມຢ່າງບໍ່ລົດລະ, ນາງຈົວເວິນຊຽນໄດ້ອອກອາລະບ້ຳຊຸດທີ 2 ເມື່ອເດືອນຕຸລາ 2006 ແລະໄດ້ຮັບຜົນສຳເລັດສູງ.
ທີ່ຟັງມານັ້ນ ແມ່ນເພງ "ເຂີປູເຂີອີ" ຈະໄດ້ບໍ່. ນາງຈົວເວິນຊຽນມີນ້ຳສຽງທີ່ອ່ອນຫວານເສາະໃສ, ເມື່ອຟັງແລ້ວກໍຍັງຢາກຟັງອີກ, ບໍ່ຮູ້ສຶກເບື່ອເລີຍ. ນອກຈາກຮ້ອງເພງແລ້ວ, ນາງຈົວເວິນຊຽນກໍແຕ່ງເພງເອງ, ແຕ່ງເພງທີ່ເຂົ້າກັບບຸກຄະລິກແລະນ້ຳສຽງຂອງຕົນເອງ. ເພງ "ຕູ້ຍໜີເຕີອ້າຍ" ຄວາມຮັກທີ່ມີຕໍ່ເຈົ້າ ທີ່ທ່ານຈະໄດ້ຟັງຕໍ່ໄປນີ້ ກໍແມ່ນເພງທີ່ນາງຂຽນເນື້ອເພງເອງ.
ນາງຈົວເວິນຊຽນມີຄວາມສາມາດໃນຫຼາຍດ້ານ, ນອກຈາກຮ້ອງເພງ, ແຕ່ງເພງ, ເປັນຜູ້ດຳເນີນລາຍການໂທລະພາບແລ້ວ, ນາງຍັງໄດ້ສະແດງລະຄອນ ໂທລະພາບແລະຮູບເງົາຫຼາຍເລື່ອງ. ບໍ່ວ່າເປັນນັກຮ້ອງ ຫຼືວ່າເປັນນັກສະແດງ, ນາງຈົວເວິນຊຽນກໍໄດ້ຮັບຄວາມນິຍົມຊົມຊອບ ແລະ ໄດ້ຮັບການຍ້ອງຍໍເປັນຢ່າງ ດີຈາກຄົນທັງຫຼາຍ. ເພງນຳໃນລະຄອນ ຫຼືຮູບເງົາທີ່ນາງຮ້ອງນັ້ນກໍແຜ່ຫຼາຍໃນແຟນເພງ.
ນັບແຕ່ປີ 2007 ເປັນຕົ້ນມາ, ແຕ່ລະປີ, ນາງຈົວເວິນຊຽນກໍໄດ້ຈັດຄອນເສີດຫຼາຍເທື່ອຢ່າງສຳເລັດຜົນ. ບໍ່ວ່າຄອນເສີດຈະຈັດຢູ່ໃສ ກໍມີແຟນເພງເຂົ້າຊົມຢ່າງຄັບຄາໜາແໜ້ນ. ເດືອນກັນຍາປີ 2010 ຜ່ານມາ, ນາງຈົວເວິນຊຽນໄດ້ມາຈັດຄອນເສີດຢູ່ນະຄອນຫຼວງປັກກິ່ງຢ່າງສຳເລັດຜົນ, ພວກເຮົາມາຟັງເພງຂອງນາງນຳກັນເລີຍ.
ທີ່ຟັງມານັ້ນ ແມ່ນເພງ "ອີເກີ້ເຢີນເຕີຢົງການ" ຄວາມກ້າຫານຂອງຄົນຜູ້ໜຶ່ງ, ໄປພ້ອມໆກັບສຽງເພງນີ້, ລາຍການດາວປະດັບຟ້າກໍຂໍລາທ່ານຜູ້ຟັງໄປກ່ອນ, ພົບກັນໃໝ່ໃນລາຍການໜ້າ. ສະບາຍດີ.
ລາຍການເພງດັງໃນອະດີດອອກວັນອັງຄານທີ 11 ມັງກອນ
ສະບາຍດີທ່ານຜູ້ຟັງທີ່ຮັກແພງ, ຍິນດີຕ້ອນຮັບທ່ານເຂົ້າສູ່ລາຍການເພງດັງໃນອະດີດ. ເລີ່ມແຕ່ອາທິດນີ້ເປັນຕົ້ນໄປ, ອະລຸນຈະເປັນຜູ້ດຳເນີນລາຍການເພງດັງໃນອະດີດທີ່ອອກອາກາດທຸກຄືນວັນອັງຄານສູ່ທ່ານຟັງ, ດີໃຈແລະຮູ້ສຶກມີກຽດຫຼາຍ ທີ່ໄດ້ມີໂອກາດຟັງເພງເກົ່າອະມະຕະຮ່ວມກັນກັບເພື່ອນຜູ້ຟັງທັງຫຼາຍ ແລະຫວນຄືນປະສົບການໃນວຽກງານແລະຊີວິດການເປັນຢູ່ໃນເມື່ອກ່ອນ ໃນຕອນຄ່ຳຄືນທີ່ງຽບສະຫງົບ.
ທີ່ຟັງມານັ້ນແມ່ນເພງ "ຊ່ານຮູຊົ້ງ" ແປວ່າ "ຍ້ອງຍໍຫີນປະກາລັງ", ເປັນເພງທີ່ນີ້ມນວນມ່ວນຫູ, ເມື່ອຕົ້ນຊຸມປີ 1960 ກໍເລີ່ມນິຍົມໃນທົ່ວປະເທດຈີນ ຈົນຮອດຊູ່ມື້ນີ້ຍັງແພ່ຫຼາຍຢູ່ຄືເກົ່າ. ທ່ານຜູ້ຟັງລາວທີ່ເຄີຍໄປຢູ່ຈີນເປັນໄລຍະຍາວໃນໄລຍະນັ້ນ ກໍຄົງເຄີຍຄຸ້ນຫູຫຼາຍເມື່ອໄດ້ຍິນທຳນອງເພງດັ່ງ ກ່າວ, ຄັນຊັ້ນ, ທຳນອງເພງທີ່ມ່ວນຫູນີ້ໄດ້ເຮັດໃຫ້ທ່ານຄິດເຖິງພາບອະດີດທີ່ສວຍ ງາມໃນໄລຍະນັ້ນຢູ່ບໍ…
ຊູ່ມື້ນີ້, ພວກເຮົາໄດ້ກ້າວເຂົ້າສູ່ປີ 2011 ຢ່າງບໍ່ຮູ້ສຶກໂຕ. ວັນເວລາຄືເນື້ອໃນທີ່ຂຽນໃນບົດເພງ, ແຕ່ບໍ່ວ່າທ່ານຈະມັກຫຼືບໍ່ມັກ, ວັນເວລາກໍຄ່ອຍໆຜ່ານໄປຄືສາຍນ້ຳທີ່ບໍ່ຫວນກັບ. ເມື່ອໄດ້ຍິນສຽງເພງທີ່ພວກເຮົາມັກຮ້ອງໃນເວລາຍັງໜຸ່ມນ້ອຍ, ບາງທີພວກເຮົາກໍຮູ້ສຶກຂຶ້ນມາທັນທີໂລດວ່າ, ໂອ… ພວກເຮົາເຄີຍໄດ້ຟັງໄດ້ຮ້ອງເພງນີ້ເລື້ອຍໆໃນເມື່ອກ່ອນ. ທ່ານຜູ້ຟັງທີ່ຮັກແພງ, ໃນທ່າມກາງສຽງເພງທີ່ມ່ວນອອນຊອນນີ້, ທ່ານຮູ້ສຶກຄືໄດ້ຫວນກັບໄປໃນໄລຍະທີ່ຕົນຍັງເປັນໄວລຸ້ນທີ່ມັກຟ້ອນລຳທຳເພງນັ້ນບໍ..
ທີ່ຟັງມານັ້ນແມ່ນເພງ "ຈ້າຍຫຸຍຕ້າວສົງສຽນ" ຫວນຄືນອະດີດ. ເພງເກົ່າໆທີ່ມ່ວນຫູມັກເຮັດໃຫ້ພວກເຮົາຄິດເຖິງຄວາມຊົງຈຳທີ່ສວຍງາມໃນອະດີດ, ສ່ວນໃນເວລາເລີ່ມເຂົ້າສູ່ປີໃໝ່ນັ້ນ, ກໍເຮັດໃຫ້ພວກເຮົາມັກຄິດເຖິງວັນເວລາທີ່ ມ່ວນຊື່ນ ແລະ ຮ່ວມກັນບຸກບືນສູ້ຊົນກັບໝູ່ໃນອະດີດ, ໃນທ່າມກາງສຽງເພງທີ່ມ່ວນຫູນີ້, ຄວາມຄິດຮອດຄິດເຖິງທີ່ບໍ່ມີວັນສິ້ນສຸດຂອງພວກເຮົາ ກໍກາຍເປັນຄວາມອວຍໄຊໃຫ້ພອນແກ່ໝູ່ເພື່ອນທີ່ຢູ່ໄກແສນໄກ…
ທີ່ຟັງມານັ້ນແມ່ນເພງ "ຈູ້ຝູ" ແປວ່າ "ອວຍພອນ", CRI ພວກເຮົາຂໍຖືໂອກາດມອບເພງນີ້ໃຫ້ເພື່ອນຜູ້ຟັງທັງຫຼາຍ ເນື່ອງໃນໂອກາດປີໃໝ່ສາກົນ 2011, ຂໍອວຍພອນໃຫ້ມິດຮັກແຟນແພງທັງຫຼາຍຈົ່ງມີຄວາມສຸກ, ປະສົບຜົນສຳເລັດໃນໜ້າທີ່ວຽກງານຂອງທ່ານ!
ເລີ່ມເຂົ້າສູ່ປີໃໝ່ແລ້ວ, ເວລານີ້, ບາງເທື່ອພວກເຮົາບໍ່ພຽງແຕ່ຈະຄິດຮອດຄິດເຖິງຍາດຕິພີ່ນ້ອງທີ່ຢູ່ໃກ້ແລະໄກເທົ່ານັ້ນ, ຄວາມຮັກທີ່ຫວານຊື່ນທີ່ໄດ້ພາດໄປແລ້ວນັ້ນ, ໄດ້ເປັນສິ່ງທີ່ສະຫຼັກໄວ້ໃນຫົວໃຈ, ເຮັດໃຫ້ລືມບໍ່ລົງ. ເຖິງວ່າເວລາຈະຜ່ານພົ້ນໄປດົນນານແລ້ວກໍຕາມ, ແຕ່ກໍບໍ່ສາມາດເຮັດໃຫ້ຄວາມເຈັບຊ້ຳໃນ ໃຈຈາງຫາຍໄປເລີຍ. ຕໍ່ໄປເຊີນຟັງເພງ "ອ້າຍວໍເຕີເຢີນເຫີວໍອ້າຍເຕີເຢີນ" ຄົນທີ່ຂ້ອຍຮັກແລະຄົນທີ່ຮັກຂ້ອຍ.
ຊີວິດຂອງຄົນເຮົາກໍເປັນແບບນີ້ແຫຼະ, ມີຄວາມມ່ວນຊື່ນ ແລະມີຄວາມໂສກເສົ້າເສຍໃຈ, ມີສຸກ ກໍມີທຸກ, ສຳຄັນແມ່ນພວກເຮົາຈະປະຕິບັດແນວໃດຕໍ່ສິ່ງທີ່ພວມປະເຊີນຢູ່, ຍາມມ່ວນກໍຄວນມ່ວນໃຫ້ເຕັມທີ່, ເວລາພົບກັບບັນຫາຕ້ອງກ້າປະເຊີນຢ່າງບໍ່ຢ້ານກົວ, ຖ້າເຮົາກ້າຜ່ານຜ່າອຸປະສັກຕ່າງໆ ກໍຈະແກ້ໄຂໄດ້ໃນຊີວິດຂອງເຮົາ.
ທ່ານຜູ້ຟັງທີ່ຮັກແພງ, ມາຮອດນີ້ເວລາໃນລາຍການເພງດັງໃນອະດີດກໍໃກ້ຈະສິ້ນສຸດລົງແລ້ວ, ຖ້າເພື່ອນຜູ້ຟັງຢາກຕຳນິຕິຊົມລາຍການນີ້ ຫຼືວ່າຢາກຟັງເພງຫຍັງ, ຜູ້ດຳເນີນລາຍການຄື ອະລຸນ ຈະຕອບສະໜອງແຮງໃດແດ່ມິດລາຍການ, ທ່ານອາດຈະໂທລະສັບໄປຫາພວກເຮົາໂດຍກົງໄດ້ທີ່ໝາຍເລກ: 008610 68892192, ເບີນີ້ຍັງສາມາດສົ່ງ Fax ໄດ້ອີກ, ຫຼືອາດຈະສົ່ງຂໍ້ຄວາມສັ້ນໄປຫາພວກເຮົາໄດ້ທີ່ໝາຍເລກ: 56256600. ສຳລັບມື້ນີ້, ຜູ້ດຳເນີນລາຍ ການ ອະລຸນ ຕ້ອງຂໍລາທ່ານຜູ້ຟັງໄປກ່ອນ, ພົບກັນໃໝ່ໃນມື້ໜ້າ, ສະບາຍດີ!