"ເວລາຜ່ານໄປ, ເຫຼືອໄວ້ພຽງສຽງ·ການແຂ່ງຂັນເສັງຄວາມຮູ້ກ່ຽວກັບວິທະຍຸສາກົນແຫ່ງປະເທດຈີນສ້າງຕັ້ງຂຶ້ນຄົບຮອບ 70 ປີ" ພາກທີໜຶ່ງ: ຈາກການກະຈາຍສຽງຄັ້ງທຳອິດຢູ່ຖ້ຳຂອງເມືອງຢຽນອ່ານຫັນເປັນFMຢູ່ທ້ອງຖິ່ນຂອງທ່ານ
(GMT+08:00) 2011-07-07 15:38:00 cri
ທ່ານຜູ້ຟັງທີ່ເຄົາລົບ, ປີນີ້ແມ່ນວິທະຍຸສາກົນແຫ່ງປະເທດຈີນຫຼືCRIສ້າງຕັ້ງຂຶ້ນຄົບຮອບ 70 ປີ. ສະຖານີວິທະຍຸແຫ່ງນີ້ທີ່ກຳເນີດເກີດຂຶ້ນໃນແປວໄຟສົງຄາມຕໍ່ຕ້ານຟັດຊິດໂລກ, ປະຈຸບັນໄດ້ເຕີບໃຫຍ່ກາຍເປັນສື່ມວນຊົນສາກົນທີ່ລາຍງານຂ່າວຕໍ່ທົ່ວໂລກດ້ວຍ 61 ພາສາ. ເລີ່ມແຕ່ວັນທີ 19 ມິຖຸນາເປັນຕົ້ນໄປ, ພວກເຮົາຈະຮ່ວມກັນຮັບຟັງເລື້ອງອັດສະຈັນຂອງວິທະຍຸສາກົນແຫ່ງປະເທດຈີນໂດຍຜ່ານ 4 ລາຍການ, ແລະສຳຜັດກັບບັນຍາກາດການພັດທະນາໃນອະນາຄົດ, ພ້ອມກັນນັ້ນກໍ່ຍິນດີຕ້ອນຮັບເຊີນທ່ານເຂົ້າຮ່ວມການແຂ່ງຂັນເສັງຄວາມຮູ້ກ່ຽວກັບວິທະຍຸສາກົນແຫ່ງປະເທດຈີນສ້າງຕັ້ງຂຶ້ນຄົບຮອບ 70 ປີທີ່ມີຊື່ວ່າ"ເວລາຜ່ານໄປ, ເຫຼືອໄວ້ພຽງສຽງ
ຄຳຖາມໃນລາຍການມື້ນີ້ແມ່ນ:
1. ວິທະຍຸສາກົນແຫ່ງປະເທດຈີນກະຈາຍສຽງຄັ້ງທຳອິດດ້ວຍພາສາຫຍັງ?
2. ວິທະຍຸສາກົນແຫ່ງປະເທດຈີນໄດ້ຕັ້ງFMຢູ່ຕ່າງປະເທດແຫ່ງທຳອິດຢູ່ເມືອງໃດ?
ທ່ານສາມາດຊອກຮູ້ຄຳຕອບໃນລາຍການມື້ນີ້.
ເຊື່ອວ່າຜູ້ຟັງທີ່ຮັບຟັງລາຍການຂອງCRIເລື້ອຍໆຈະຮູ້ສຶກລື້ງຫູຫຼາຍຕໍ່ສຽງດົນຕີດັ່ງກ່າວນີ້. ໃນທຸກເວລາທີ່ສຽງນີ້ດັງຂຶ້ນຈະສົ່ງຂໍ້ມູນອັນອຸດົມສົມບູນແລະມິດຕະພາບອັນຈິງໃຈໃຫ້ແກ່ຜູ້ຟັງທຸກຄົນ. ດົນຕີຕອນນີ້ໄດ້ກາຍເປັນເອກະລັກຂອງCRI ແລ້ວ:
ຢູ່ຊັ້ນໜຶ່ງຂອງຕຶກຫ້ອງການCRI, ຕົວໜັງສືຈີນໂຕໃຫຍ່12ໂຕທີ່ແປວ່າ"ຖືຫຼັກໝັ້ນຂອງຈີນ, ມີສາຍຕາທົ່ວໂລກແລະມີນິດໄສໃຈຄໍຂອງມະນຸດ"ໄດ້ປະຈັກຕາທີ່ສຸດ, ນີ້ແມ່ນທັດສະນະຂອງCRI. ແຕ່ວ່າຫຼັກໝັ້ນຂອງຈີນແມ່ນຫຍັງແດ່?ເປັນຫຍັງຈິ່ງມີສາຍຕາທົ່ວໂລກ?ຈະສະແດງນິດໄສໃຈຄໍຂອງມະນຸດແນວໃດ? ທັງໝົດເຫຼົ່ານີ້ອາດໄດ້ຕົກລົງແລ້ວໃນເວລາທີ່CRIສ້າງຕັ້ງຂຶ້ນ.
ໃນຕົ້ນຊຸມປີ 1940, ປະຊາຊົນຈີນໄດ້ດຳເນີນສົງຄາມຕໍ່ຕ້ານຟັດຊິດດ້ວຍຄວາມທຸກຍາກລຳບາກທີ່ສຸດ, ຄືໄດ້ຕໍ່ຕ້ານການໂຈມຕີຈາກຍີ່ປຸ່ນຜູ້ຮຸກຮານຢ່າງເດັດດ່ຽວໜຽວແໜ້ນ. ເພື່ອໂຄສະນາສົງຄາມຕໍ່ຕ້ານຍີ່ປຸ່ນ, ຢູ່ເມືອງຢຽນອ່ານທີ່ພາກຕາເວັນຕົກສຽງເໜືອຂອງຈີນເຊິ່ງເປັນທີ່ຕັ້ງຂອງສູນກາງພັກຄອມມູນິດຈີນໃນເວລານັ້ນ, ພັກຄອມມູນິດຈີນໄດ້ຕັ້ງສະຖານີວິທະຍຸກະຈາຍສຽງຊິນຮວາຢຽນອ່ານ. ວັນທີ 3 ທັນວາ 1941, ວິທະຍຸແຫ່ງນີ້ເລີ່ມກະຈາຍສຽງດ້ວຍພາສາຍີ່ປຸ່ນ, ຕໍ່ທະຫານຍີ່ປຸ່ນຜູ້ຮຸກຮານຈີນ. ໂຄສົກຜູ້ທຳອິດແມ່ນນາງຮາລາຄີ ໂຢຊີ, ຄົນຍີ່ປຸ່ນທີ່ອາໄສຢູ່ຈີນທີ່ຄັດຄ້ານສົງຄາມຮຸກຮານ.
ວັນທີ 3 ທັນວາ 1941 ກໍ່ຖືກຕົກລົງໃຫ້ເປັນສ້າງຕັ້ງວິທະຍຸສາກົນແຫ່ງປະເທດຈີນ.
ເຖິງວ່າຫ້ອງກະຈາຍສຽງໃນເວລານັ້ນພຽງແຕ່ແມ່ນຖ້ຳນ້ອຍຖ້ຳໜຶ່ງ, ຄວາມແຮງກະຈາຍສຽງກໍ່ມີພຽງແຕ່ 300 ວັດທໍ່ນັ້ນ, ແຕ່ວ່າເລີ່ມແຕ່ມື້ນັ້ນເປັນຕົ້ນມາ, ໃນຈີນມີວິທະຍຸພາສາຕ່າງປະເທດທີ່ຖືຄົນຕ່າງປະເທດເປັນເປົ້າໝາຍ. ທ່ານນາງຮາລາຄີໂຢຊີຫວນຄືນວ່າ:
"ຂ້າພະເຈົ້າເຮັດວຽກກະຈາຍສຽງຢູ່ເມືອງຢຽນອ່ານ, ໃນເວລານັ້ນລຳບາກຫຼາຍ, ຂ້າພະເຈົ້າໄດ້ຮັບການດູແລເບິ່ງແຍ່ງຈາກສະຫາຍທັງຫຼາຍທີ່ຢູ່ຢຽນອ່ານ."
ການກະຈາຍສຽງຂອງນາງຮາລາຄີໂຢຊີຢູ່ຖ້ຳຂອງເມືອງຢຽນອ່ານໄດ້ກາຍເປັນອາວຸດໃຫຍ່ປະເພດໜຶ່ງທີ່ທຳລາຍຂວັນແລະກຳລັງໃຈຂອງທະຫານຍີ່ປຸ່ນ. ພາຍຫຼັງສົງຄາມຕໍ່ຕ້ານຍີ່ປຸ່ນໄດ້ຮັບໄຊຊະນະແລ້ວ, ສະຖານີວິທະຍຸຊິນຮວາຢຽນອ່ານໄດ້ເລີ່ມກະຈາຍສຽງດ້ວຍພາສາອັງກິດໃນປີ 1947. ປະຈຸບັນຢູ່ທຸກບ່ອນໃນໂລກລ້ວນແຕ່ສາມາດຟັງວິທະຍຸCRIພາກພາສາອັງກິດໄດ້.
ເດືອນມິຖຸນາປີ 1949, ໃນເວລາປະເທດຈີນໃໝ່ສະຖາປະນາຂຶ້ນ, ວິທະຍຸສາກົນແຫ່ງປະເທດຈີນທີ່ຍ້າຍໄປຢູ່ປັກກິ່ງໄດ້ເລີ່ມກະຈາຍສຽງຕໍ່ພາກໃຕ້ຂອງຈີນແລະອາຊີອາຄະເນດ້ວຍພາສາແຕຈິວ, ພາສາກວາງຕຸ້ງແລະພາສາຝູຈ້ຽນ, ສຳນຽງບ້ານເກີດໄດ້ດຶງດູດຈິດໃຈຂອງຊາວຈີນຕ່າງດ້າວຢູ່ຕ່າງປະເທດ. ໃນເວລານັ້ນເພື່ອສະໜັບສະໜູນການພັດທະນາຂອງວິທະຍຸກະຈາຍສຽງຕໍ່ຕ່າງປະເທດ, ຊາວຈີນຕ່າງດ້າວຫຼາຍຄົນໄດ້ກັບຄືນສູ່ປະເທດຈີນເຮັດວຽກແລະດຳລົງຊີວິດຢູ່ຈີນ. ນາງໂກ່ວຫຼົງຫົຼງ, ໂຄສົກພາສາຝູຈ້ຽນທີ່ກັບຄືນມາຈາກອິນໂດເນເຊຍກໍ່ແມ່ນຜູ້ໜຶ່ງ, ເພິ່ນກ່າວວ່າ.
"ຂ້າພະເຈົ້າມາວິທະຍຸສາກົນແຫ່ງປະເທດຈີນໃນເດືອນກັນຍາປີ 1949, ໃນເວລານັ້ນສະຖານີວິທະຍຸຫາກໍ່ສ້າງຕັ້ງຂຶ້ນ, ຍັງບໍ່ມີລັດຖະບານປະຊາຊົນສູນກາງຈີນ, ໃນເວລານັ້ນຊື່ວ່າວິທະຍຸກະຈາຍສຽງປະຊາຊົນຊິນຮວາ, ລາຍການພາສາຕ່າງປະເທດກໍ່ມີແຕ່ພາສາຍີ່ປຸ່ນແລະພາສາອັງກິດ, ນອກຈາກນັ້ນກໍ່ມີແຕ່ພາສາທ້ອງຖິ່ນຂອງຈີນເທົ່ານັ້ນ. ໃນເວລານັ້ນກະຈາຍສຽງລ້ວນແຕ່ແມ່ນລາຍການສົດ, ບໍ່ມີການອັດສຽງ, ເພາະວ່າໃນເວລານັ້ນອັດສຽງຕ້ອງໃຊ້ເສັ້ນລວດ."
ປີ 1949 ປະເທດຈີນໃໝ່ສ້າງຕັ້ງຂຶ້ນ, ໃນພິທີສ້າງຕັ້ງປະເທດຈີນໃໝ່, ນາງຕິ່ງອີ່ລັນເປັນຜູ້ດຳເນີນລາຍການຖ່າຍທອດສົດຢູ່ຫໍໄຊທ່ຽນອ່ານເມິນ. ຫຼັງຈາກນັ້ນນາງໄດ້ກາຍເປັນຜູ້ອຳນວຍການໃຫຍ່ຂອງCRI.
ວິທະຍຸຊິນຮວາຢຽນອ່ານກໍ່ຍ້າຍໄປຢູ່ປັກກິ່ງ, ຜ່ານການປ່ຽນຊື່ຫຼາຍເທື່ອ, ໄດ້ກາຍເປັນວິທະຍຸສາກົນແຫ່ງປະເທດຈີນໃນປະຈຸບັນ. ປະຈຸບັນ, CRIໄດ້ໃຊ້ 61 ພາສາລາຍງານຂ່າວຕໍ່ທົ່ວໂລກ, ແມ່ນສື່ມວນຊົນສາກົນທີ່ມີພາສາຫຼາຍທີ່ສຸດໃນໂລກ.
ໃນທ້າຍຊຸມປີ 1970 ຈີນເລີ່ມປະຕິບັດການປະຕິຮູບເປີດປະຕູສູ່ພາຍນອກ, ນີ້ໄດ້ສ້າງເງື່ອນໄຂທີ່ດີໃຫ້ແກ່ການພັດທະນາຂອງCRI. ວິທະຍຸສາກົນແຫ່ງປະເທດຈີນໄດ້ປະຕິຮູບຢ່າງກ້າຫານໃນດ້ານທັດສະນະການລາຍງານຂ່າວ, ເນື້ອໃນລາຍການແລະຮູບແບບການກະຈາຍສຽງເປັນຕົ້ນ. ປະຈຸບັນ, CRIໄດ້ຕັ້ງສຳນັກງານນັກຂ່າວຢູ່ 32 ປະເທດ, ແລະຈະສືບຕໍ່ຕັ້ງສຳນັກນັກງານຂ່າວໃຫຍ່ 8 ແຫ່ງຢູ່ທະວີບອາຟຼິກາ, ຕາເວັນອອກກາງ, ເອີລົບ, ທະວິບອາເມລິກາໃນ 10 ປີຕໍ່ໜ້າ. ໃນຖານະເປັນສື່ມວນຊົນຂອງປະເທດທີ່ພວມພັດທະນາ, CRIຈະລົງເລິກລາຍງານການປ່ຽນແປງໃໝ່ແລະສະພາບການໃໝ່ຂອງແຫ່ງຕ່າງໆໃນໂລກໂລກຢ່າງຮອບດ້ານ.
ຄຽງຄູ່ກັບເຕັກນິກສື່ສານພັດທະນາຢ່າງບໍ່ຢຸດຢັ້ງ, ວິທະຍຸCRIກຊໄດ້ມີການປ່ຽນແປງໃໝ່. ເດືອນກຸມພາປີ 2006, ລະບົບ FM ເລີ່ມກະຈາຍສຽງຢູ່ນະຄອນຫຼວງໄນໂຣບີຂອງເຄັນຢາ, ນີ້ແມ່ນ FM ແຫ່ງທຳອິດຂອງCRI ທີ່ຕັ້ງຢູ່ຕ່າງປະເທດ. ຫຼັງຈາກນັ້ນ 9 ເດືອນ, ລະບົບ FM 93 Mhz ເລີ່ມກະຈາຍສຽງຢູ່ນະຄອນຫຼວງວຽງຈັນຂອງລາວ. ທ່ານຫູຈີນທ່າວ, ປະທານປະເທດຈີນທີ່ພວມຢ້ຽມຢາມລາວແລະທ່ານຈູມມະລີ ໄຊຍະສອນ, ປະທານປະເທດລາວໄດ້ເຂົ້າຮ່ວມພິທີ
ມາຮອດວັນທີ 1 ມິຖຸນານີ້, CRIໄດ້ຕັ້ງ FM 60 ແຫ່ງຢູ່ປະເທດຕ່າງໆໃນໂລກ, FM ເຫຼົ່ານີ້ໄດ້ກະຈາຍລາຍການປະມານ 1200 ຊົ່ວໂມງໃນທຸກວັນ, ໄດ້ຕອບສະໜອງຄວາມຕ້ອງການຂອງຜູ້ຟັງຕ່າງປະເທດທີ່ຢາກຮູ້ປະເທດຈີນ.
ຍ້ອນວ່າCRIນັບມື້ນັບມີຊື່ສຽງຂຶ້ນຢ່າງບໍ່ຢຸດຢັ້ງ, ຊາວຕ່າງປະເທດທີ່ເຮັດວຽກຢູ່ຂະແໜງການສື່ມວນຊົນທີ່ມີຊື່ສຽງກໍມາເຮັດວຽກຢູ່CRI, ຕົວຢ່າງວ່ານາງຊຸຊັນ ອົສມານ, ອະດີດໂຄສົກຂອງBBC. ນັກຄົ້ນຄວ້າວິທະຍາສາດສື່ສານມວນຊົນເຫັນວ່າ, ການທີ່ລາຍການຂອງCRIໄດ້ຮັບຄວາມນິຍົມກໍຍ້ອນວ່າໄດ້ປະຕິບັດຕາມນິໄສໃຈຄໍຂອງມະນຸດແລະທັດສະນະທີ່ຮັບໃຊ້ສາທາລະນະຕະຫຼອດມາ. ທ່ານນາງເຊົາລູ້, ອາຈານສອນຜູ້ຮຽນປະລິນຍາເອກຂອງມະຫາວິທະຍາໄລສື່ສານມວນຊົນຈີນກ່າວວ່າ:
"ປະຈຸບັນສະຖານະການຂອງໂລກໄດ້ມີການປ່ຽນແປງຢ່າງໃຫຍ່ຫຼວງ, ການກະຈາຍສຽງສາກົນຈາກການຂົ່ມຂູ່ຂວັນຂອງສັດຕູຫັນເປັນການດຶງດູດຈິດໃຈຂອງຜູ້ຟັງ, ຈາກ"ສົງຄາມວິທະຍຸ"ຫັນເປັນໃຜຈະເຮັດໃຫ້ປະຊາຊົນຂອງປະເທດເປົ້າໝາຍຄັດເລືອກແລະຍອມຮັບວິທະຍຸຂອງພວກເຮົາທັງນີ້ໄດ້ກາຍເປັນສັນຍະລັກຂອງວິທະຍຸກະຈາຍສຽງຕໍ່ຕ່າງປະເທດສາມາດຄົງຕົວຫຼືບໍ່. ໃນສິບປີມານີ້CRIໄດ້ປະຕິບັດມາດຕະການຫຼາຍຢ່າງທີ່ມີປະສິດທິຜົນໃນດ້ານການລາຍງານຂ່າວທີ່ຖືກຕ້ອງແມ່ນຢ້ຳແລະມີລັກສະນະຕິດແທດກັບປະເທດນັ້ນແລະການບໍລິການທີ່ມີລັກສະນະວິຊາການ. ນີ້ແມ່ນການສະແດງອອກຂອງທັດສະນະສື່ສານມວນຊົນທີ່ທັນສະໄໝ."
ເພື່ອລາຍງານຂ່າວຕໍ່ຕ່າງປະເທດຢ່າງມີປະສິດທິຜົນກວ່າເກົ່າ, CRIຍັງໄດ້ພັດທະນາຮູບການສື່ໃໝ່ຢ່າງບໍ່ຢຸດຢັ້ງ. ປະຈຸບັນ, ທ່ານພຽງແຕ່ໃຊ້ເມົ້າຂອງຄອມພິວເຕີ, ກົດເວັບໄຊ້ຂອງCRIonline, ລາຍການແລະຂ່າວຫຼ້າສຸດຂອງCRIກໍ່ຈະປະກົດຢູ່ເທິງໜ້າຈໍຂອງຄອມທ່ານ.
ໃນຕົ້ນປີ 2011, CRIຍັງໄດ້ປັບປຸງຊັບພະຍາກອນຕື່ມອີກ, ແລ້ວສ້າງເຄືອຂ່າຍການກະຈາຍສຽງສາກົນຈີນຫຼືCIBN. ນີ້ແມ່ນກຸ່ມສື່ມວນຊົນໃຫຍ່ທີ່ມີສື່ໃໝ່ຕ່າງໆເຊັ່ນລາຍການສຽງແລະພາບທາງອິນເຕີເນັດ, ວິທະຍຸໂທລະພາບມືຖື, IPTVແລະໂທລະພາບອິນເຕີເນັດເປັນຕົ້ນ. ທ່ານຫວາງເກີ່ງໜຽນ, ຜູ້ອຳນວຍການໃຫຍ່ວິທະຍຸສາກົນແຫ່ງປະເທດຈີນກ່າວວ່າ, ນີ້ເປັນຂີດໝາຍສະແດງໃຫ້ເຫັນວ່າ, ວິທະຍຸສາກົນແຫ່ງປະເທດຈີນທີ່ມີອາຍຸເກືອບ 70 ປີໄດ້ກ້າວເຂົ້າສູ່ຍຸກສື່ໃໝ່ຢ່າງຮອບດ້ານ. ໃນເວລາເວົ້າເຖິງການພັດທະນາໃນ 5 ປີຕໍ່ໜ້າ, ທ່ານຫວາງເກີ່ງໜຽນກ່າວວ່າ:
"CIBNແມ່ນອົງການວິທະຍຸແລະໂທລະພາບແຫ່ງຊາດໃນຂົງເຂດສື່ໃໝ່, ອາໄສເຕັກນິກສູງ ເຊັ່ນ,ອິນເຕີເນັດແລະຄົມມະນາຄົມເຄື່ອນທີ່ເປັນຕົ້ນ, ສ້າງCIBNເປັນສື່ມວນຊົນໃຫຍ່ສາກົນທີ່ມີອິດທິພົນສູງໃນໂລກ."
ທ່ານຜູ້ຟັງ, ລາຍການມື້ນີ້ກໍ່ຈົບລົງພຽງທໍ່ນີ້, ຂອບໃຈທ່ານສະໜັບສະໜູນວິທະຍຸສາກົນແຫ່ງປະເທດຈີນມາເປັນຍາວນານ. ຕໍ່ໄປຈະຂໍຫວນຄືນຄຳຖາມຂອງລາຍການເທື່ອນີ້:
1. ວິທະຍຸສາກົນແຫ່ງປະເທດຈີນກະຈາຍສຽງຄັ້ງທຳອິດດ້ວຍພາສາຫຍັງ?
2. ວິທະຍຸສາກົນແຫ່ງປະເທດຈີນໄດ້ຕັ້ງFMຢູ່ຕ່າງປະເທດແຫ່ງທຳອິດຢູ່ເມືອງໃດ?