ສະບາຍດີທ່ານຜູ້ຟັງທີ່ເຄົາລົບ, ຍິນດີຕ້ອນຮັບທ່ານເຂົ້າສູ່ລາຍການເພງດັງໃນອະດີດ, ໃນລາຍການພາກນີ້, ຜູ້ດຳເນີນລາຍການ ຄື ອະລຸນ ຈະແນະນຳເມີ້ງຖິງເວີຍ, ນັກຮ້ອງຍິງທີ່ມີຊື່ສຽງໂດ່ງດັງຂອງໄຕ້ຫວັນໃນຊຸມປີ 1990, ເລີ່ມຕົ້ນລາຍການ ຈະໃຫ້ຟັງເພງຂອງເມີ້ງ ຖິງເວີຍ ກ່ອນ, ແລ້ວອະລຸນຈຶ່ງແນະນຳນັກຮ້ອງຍິງທີ່ໄດ້ຮັບຄວາມນິຍົມຈາກແຟນເພງທັງ ຫຼາຍ ແລະຖືກເອີ້ນວ່າເປັນ"ເຈົ້າຍິງແຫ່ງດວງຈັນ"ຜູ້ນີ້ໃຫ້ຟັງ.
ທີ່ຟັງມານັ້ນ ແມ່ນເພງ "ໂສວອີ" ພາສາມື ຂອງເມີ້ງຖິງເວີຍ. ເມີ້ງຖິງເວີຍ ເກີດຢູ່ໄຕ້ຫວັນຂອງຈີນເມື່ອເດືອນທັນວາປີ 1969, ແລະເລີ່ມເປັນນັກຮ້ອງອາຊີບເມື່ອປີ 1990, ນ້ຳສຽງຂອງນາງເສາະໃສ, ໜ້າຮັກ ເບິ່ງຄືເປັນນັກຮຽນມັດທະຍົມ, ພໍປະກົດຕົວໃນເວທີເພງສະໄໝນິຍົມ ກໍໄດ້ຮັບຄວາມນິຍົມຊົມຊອບຈາກແຟນເພງທັງຫຼາຍ, ເພງຂອງນາງກໍໄດ້ຮັບຄວາມນິຍົມເຊັ່ນດຽວກັນ ບໍ່ວ່າຈະຢູ່ແຜ່ນດິນໃຫຍ່ຈີນ ຫຼືວ່າຢູ່ຮົງກົງ ແລະ ໄຕ້ຫວັນ. ເດືອນກັນຍາ ປີ 1991, ເມີ້ງຖິງເວີຍໄດ້ອອກອາລະບ້ຳດ່ຽວຊຸດທີ 3 ທີ່ຊື່ວ່າ "ໜີຄ້ານໜີຄ້ານເຢ້ລ້ຽງເຕີຫຼຽນ"ແປວ່າ ໜ້າດວງຈັນ, ຈຳໜ່າຍໄດ້ຫຼາຍກວ່າ 6 ລ້ານຊຸດ. ຍ້ອນເພງນຳທີ່ມີຊື່ເຊັ່ນດຽວກັນກັບຊື່ອາລະບ້ຳດັ່ງກ່າວ ໄດ້ຮັບຄວາມນິຍົມທີ່ສຸດ, ເມີ້ງຖິງເວີຍກໍເລີຍຖືກເອີ້ນວ່າເປັນ "ເຈົ້າຍິງແຫ່ງດວງຈັນ". ຕໍ່ໄປເຊີນຟັງເພງ"ໜີຄ້ານໜີຄ້ານເຢ້ລ້ຽງເຕີຫຼຽນ" ໜ້າດວງຈັນ.
ໃນວົງການເພງຈີນສະໄໝນິຍົມ, ເມີ້ງຖິງເວີຍໄດ້ພັດທະນາຢ່າງສະດວກ ແລະ ໄດ້ຮັບຜົນສຳເລັດສູງ, ມີແຟນເພງຈຳນວນຫຼວງຫຼາຍ, ອາລະບ້ຳດ່ຽວຂອງນາງ ຊຸດໃດກໍຂາຍດິບຂາຍດີ. ເດືອນພຶດສະພາ ປີ 1992, ເມີ້ງຖິງເວີຍອອກອາລະບ້ຳດ່ຽວຊຸດທີ 4 ທີ່ຊື່ວ່າ "ຕົ່ງຈີ້ຕ້າວຖາຍເປີຍຫຼາຍຄ້ານອີ" ແປວ່າ ລະດູໜາວໄປເບິ່ງຝົນຢູ່ໄຕເປ, ປະລິມານຈຳໜ່າຍຫຼາຍກວ່າ 10 ລ້ານແຜ່ນ, ຄອງອັນດັບສອງໃນຕາຕະລາງປະລິມານຈຳໜ່າຍອາລະບ້ຳດ່ຽວ ໃນຊຸມປີ 1990. ເພງ "ຕົ່ງຈີ້ຕ້າວຖາຍເປີຍຫຼາຍຄ້ານອີ" ລະດູໜາວໄປເບິ່ງຝົນຢູ່ໄຕເປ ແລະ ເພງ "ອູເຊິ່ງເຕີອີ" ຝົນຕົກບໍ່ມີສຽງ ເຮັດໃຫ້ເມີ້ງຖິງເວີຍ ຖືກເອີ້ນວ່າ ເປັນ "ດາລາເພງຮັກ" ທີ່ໄດ້ຮັບຄວາມນິຍົມທີ່ສຸດ. ຕໍ່ໄປອະລຸນຈະເປີດສອງເພງດັ່ງກ່າວສູ່ຟັງ, ກ່ອນອື່ນຈະໃຫ້ຟັງເພງ "ຕົ່ງຈີ້ຕ້າວຖາຍເປີຍຫຼາຍຄ້ານອີ" ແລ້ວຕິດຕາມດ້ວຍເພງ "ອູເຊິ່ງເຕີອີ".
ທ່ານຜູ້ຟັງທີ່ຮັກແພງ, ຮອດເວລາທີ່ອະລຸນຕ້ອງຂໍອຳລາທ່ານຜູ້ຟັງໄປກ່ອນແລ້ວ, ບໍ່ຢາກອຳລາທ່ານຜູ້ຟັງ ກໍຕ້ອງໄດ້ອຳລາ, ຍ້ອນເວລາຂອງເຮົາມີຈຳກັດ, ຫວັງວ່າລາຍການເພງດັງໃນອະດີດຂອງວິທະຍຸສາກົນແຫ່ງປະເທດຈີນ ຫຼື CRI ຈະນຳເອົາຄວາມເບີກບານມ່ວນຊື່ນມາໃຫ້ແກ່ເພື່ອນຜູ້ຟັງທັງຫຼາຍ, ພົບກັນໃໝ່ໃນວັນອັງຄານອາທິດໜ້າ, ສະບາຍດີ.