ວັນທີ9ສິງຫານີ້, ລັດຖະບານກໍາປູເຈຍໄດ້ປະກາດໂທລະເລກຊົມເຊີຍທີ່ທ່ານຮຸນແຊນ,ນາຍົກລັດຖະມົນຕີກໍາປູເຈຍໄປຍັງທ່ານນາງຍິ່ງລັກ ຊິນນະວັດ,ນາຍົກລັດຖະມົນຕີໄທຄົນໃໝ່ໃນວັນທີ5ສິງຫານີ້ຢ່າງເປັນທາງການ. ນອກຈາກຊົມເຊີຍທ່ານນາງຍິ່ງລັກ ຊິນນະວັດໄດ້ຮັບເລືອກຕັ້ງເປັນນາຍົກລັດຖະມົນຕີໄທແລ້ວ, ທ່ານຮຸນແຊນຍັງໄດ້ສະແດງຄວາມຫວັງໄປໃນທາງທີ່ດີຕໍ່ການແກ້ໄຂບັນຫາຄວາມຂັດແຍ່ງລະຫວ່າງສອງປະເທດດ້ວຍສັນຕິວິທີ, ການຟື້ນຟູການພົວພັນໄມຕີຈິດມິດຕະພາບຖານບ້ານໃກ້ເຮືອນຄຽງທີ່ເປັນມູນເຊື້ອອັນດີຕໍ່ກັນ, ການດໍາເນີນການຮ່ວມມືທີ່ຕິດແທດຕົວຈິງແລະບັງເກີດຜົນ.
ສື່ມວນຊົນຈໍານວນໜຶ່ງເຫັນວ່າ, ຍ້ອນທ່ານຮຸນແຊນກັບອ້າຍຂອງທ່ານນາງຍິ່ງລັກຄືທ່ານທັກສິນ ຊິນນະວັດມີການພົວພັນກັນທີ່ສະໜິດແໜ້ນ, ການພັດທະນາລະດັບການພົວພັນລະຫວ່າງກໍາປູເຈຍກັບໄທກໍ່ຈະມີອະນາຄົດທີ່ສົດໃສ. ເລື່ອງທີ່ສາມາດຢືນຢັນໄດ້ແມ່ນ,ຄວາມພະຍາຍາມຂອງຜູ້ນໍາສອງປະເທດມີຜົນດີຕໍ່ການຊຸກຍູ້ການພັດທະນາການພົວພັນສອງຝ່າຍ.ແຕ່ໃນການພົວພັນທີ່ສົບສົນລະຫວ່າງກໍາປູເຈຍກັບໄທ, ຄວາມໄວ້ເນື້ອເຊື່ອໃຈກັນແລະຄວາມເຂົ້າໃຈກັນລະຫວ່າງສອງປະເທດຈະປະເຊີນໜ້າກັບສິ່ງທ້າທາຍເຖິງສອງດ້ານ.
ກ່ອນອື່ນແມ່ນຄວາມຂັດແຍ່ງດ້ານເຂດຊາຍແດນ. ທີ່ສອງຝ່າຍມີຄວາມເຫັນຕ່າງກັນ, ຝ່າຍໜຶ່ງກ່າວວ່າຄວນເຄົາລົບຫລັກຖານດ້ານປະຫວັດສາດແລະການຕັດສິນຂອງສະຫະປະຊາຊາດ, ອີກຝ່າຍໜຶ່ງພັດສົງໄສຫລັກຖານດ້ານປະຫວັດສາດ. ເວົ້າໄດ້ວ່າ, ການພົວພັນຜູ້ນໍາສອງປະເທດຈະສະໜິດສະໜົມກັນປານໃດ, ກໍ່ບໍ່ສາມາດປ່ຽນແປງສະພາບຄວາມຂັດແຍ່ງທາງດ້ານຊາຍແດນທີ່ບໍ່ສາມາດແກ້ໄຂໄດ້ໃນເວລາອັນສັ້ນໆນີ້ໄດ້. ແຕ່ວ່າ,ອາດມີຄວາມເປັນໄປໄດ້ທີ່ການປະທະກັນຂອງສອງຝ່າຍຈະຫລຸດລົງຍ້ອນຄວາມໄວ້ເນື້ອເຊື່ອໃຈກັນຫລາຍຂຶ້ນ.
ສິ່ງທ້າທາຍອີກຢ່າງໜຶ່ງແມ່ນມາຈາກພາຍໃນປະເທດ,ຄວາມຂັດແຍ່ງລະຫວ່າງສອງປະເທດແມ່ນເກີດຂຶ້ນຍ້ອນຄວາມຕ້ອງການພາຍໃນປະເທດໃນລະດັບໃດໜຶ່ງ. ການປະທະກັນລະຫວ່າງສອງປະເທດຢູ່ເຂດຊາຍແດນທີ່ເກີດຂຶ້ນເຖິງ3ເທື່ອໃນຕົ້ນປີນີ້ແມ່ນເກີດຂຶ້ນໃນໄລຍະກ່ອນການເລືອກຕັ້ງຂອງໄທ,ອິດທິກໍາລັງຝ່າຍຕ່າງໆຢາກຖືການປະທະກັນນັ້ນເປັນໂອກາດ,ເພື່ອຍົກສູງອິດທິພົນຂອງຕົນ. ທ່ານຮຸນມາເນ,ລູກຊາຍຂອງທ່ານຮຸນແຊນກໍ່ຜ່ານການທົດສອບໃນການປະທະກັນຄັ້ງນີ້,ຊຶ່ງມີຜົນດີຕໍ່ການສ້າງຄວາມເຂັ້ມແຂງໃນກອງທັບກໍາປູເຈຍ. ເຖິງແມ່ນວາການເລືອກຕັ້ງຂອງໄທສິ້ນສຸດລົງແລ້ວ,ແຕ່ຍ້ອນວ່າທ່ານນາງຍິ່ງລັກ ຊິນນະວັດບໍ່ທັນມີບົດຮຽນໃນການຂຶ້ນກໍາອໍານາດພໍເທົ່າໃດ,ຊໍ້າຍັງປະເຊີນກັບສິ່ງທີ່ທ້າທາຍກ່ຽວກັບປັບປຸງການພົວພັນກັບພະບໍລົມມະວົງສານຸວົງແລະກອງທັບດັ່ງນີ້ເປັນຕົ້ນ. ໄທຢາກຖອນຕົວອອກຈາກຄະນະກໍາມະການມໍລະດົກໂລກແລະສົນທິສັນຍາມໍລະດົກໂລກໃນເດືອນມີຖຸນາປີນີ້,ແຕ່ຈົນຮອດປະຈຸບັນ,ຍັງບໍ່ທັນມີຜົນ,ນີ້ກໍ່ອາດຈະມີຜົນກະທົບຕໍ່ຄວາມຂັດແຍ່ງດ້ານເຂດຊາຍແດນລະຫວ່າງສອງຝ່າຍ. ກໍາປູເຈຍກໍ່ກ້າວເຂົ້າສູ່ໄລຍະກະກຽມການເລືອກຕັ້ງໃນປີ2013,ທ່ານຮຸນແຊນກໍ່ອາດຈະບໍ່ສາມາດຜ່ອນສັ້ນຜ່ອນຍາວໄດ້ຕໍ່ໄປອີກ.
ແຕ່ວ່າເບິ່ງຈາກທ່າຕັ້ງໜ້າແລ້ວ, ເຖິງແມ່ນວ່າມີຄວາມຫຍຸ້ງຍາກຕ່າງໆນາໆກໍຕາມ, ແຕ່ທ່ານຮຸນແຊນແລະທ່ານນາງຍິ່ງລັກ ຊິນນະວັດມີການພົວພັນທີ່ດີ, ຄວາມໄວ້ເນື້ອເຊື່ອໃຈຫລາຍຂຶ້ນ,ການປະທະກັນຕາມເຂດຊາຍແດນກໍ່ຫລຸດໜ້ອຍຖອຍລົງ.
