ຕາມຂ່າວCRI, ຕອນບ່າຍວັນທີ 15 ກັນຍານີ້, ທ່ານນາງຍິ່ງລັກ ຊິນນະວັດ, ນາຍົກລັດຖະມົນຕີໄທ ໄດ້ຢ້ຽມຢາມສັນທະວະໄມຕີກຳປູເຈຍຢ່າງເປັນທາງການ, ການຢ້ຽມຢາມຂອງທ່ານນາງຍິ່ງລັກ ຊິນນະວັດ ເທື່ອນີ້ ໄດ້ຖືກວົງການພາຍນອກຖືວ່າ ເປັນການຢ້ຽມຢາມເພື່ອປັບປຸງການພົວພັນລະຫວ່າງໄທກັບກຳປູເຈຍທີ່ຕົກຢູ່ໃນສະພາບເຄັ່ງຕຶງຍ້ອນການປະທະກັນຢູ່ຕາມເຂດຊາຍແດນລະຫວ່າງສອງປະເທດ ຫຼັງຈາກລັດຖະບານໄທຊຸດໃໝ່ຂຶ້ນກຳອຳນາດແລ້ວ. ສະນັ້ນ, ການຢ້ຽມຢາມເປັນເວລາສັ້ນໆຂອງ ທ່ານນາງຍິ່ງລັກ ຊິນນະວັດ ເທື່ອນີ້ເປັນເຫດການທີ່ໄດ້ຮັບຄວາມສົນໃຈຈາກຫຼາຍຝ່າຍ, ການພົວພັນລະຫວ່າງໄທກັບກຳປູເຈຍກໍກາຍເປັນບັນຫາຈຸດສຸມຂອງບັນດາປະເທດອາຊີຕາເວັນອອກສຽງໃຕ້ອີກເທື່ອໜຶ່ງ.
ບັນຫາຊາຍແດນແມ່ນບັນຫາຕົ້ນຕໍຂອງການເຈລະຈາລະຫວ່າງຜູ້ນຳຂອງສອງປະເທດ, ກ່ອນ ທ່ານນາງຍິ່ງລັກ ຊິນນະວັດ ຈະເດີນທາງໄປຢ້ຽມຢາມກຳປູເຈຍ, ຢູ່ພາຍໃນປະເທດໄທກໍມີຄວາມເຫັນແຕກຕ່າງກັນກ່ຽວກັບຫຼັກໝັ້ນຂອງ ທ່ານນາງຍິ່ງລັກ ຊິນນະວັດ ແລະລັດຖະບານຊຸດໃໝ່ ຂອງໄທໃນບັນຫາຊາຍແດນລະຫວ່າງສອງປະເທດ, ທ່ານນາງຍິ່ງລັກໄດ້ກ່າວເນັ້ນຫຼາຍເທື່ອແລ້ວວ່າ, ທ່ານເອງຈະຖືສຳຄັນບັນຫາດິນແດນແລະອະທິປະໄຕຂອງຊາດ, ຈະຫ້າມບໍ່ໃຫ້ມີການກະທຳໃດໆທີ່ລ່ວງລ້ຳດິນແດນຂອງຊາດ. ທ່ານສຸຣະພົງ,ໂຕວິສັກໄຊກູນ ລັດຖະມົນຕີວ່າການກະຊວງການຕ່າງປະເທດໄທ ໄດ້ໃຫ້ສຳພາດຕໍ່ສື່ມວນຊົນວ່າ, ໃນເວລາຢ້ຽມຢາມຢູ່ກຳປູເຈຍ ຄື ວັນທີ 15 ກັນຍານີ້, ທ່ານນາງຍິ່ງລັກ ຊິນນະວັດກັບຜູ້ນຳປະເທດກຳປູເຈຍ ໄດ້ເວົ້າເຖິງບົດບັນທຶກຄວາມເຂົ້າໃຈກັນກ່ຽວກັບບັນຫາຊາຍແດນສອງປເທດ, ແລະສອງປະເທດຮ່ວມກັນໃຊ້ມາດຕະ ການຕ່າງໆ, ເຊັ່ນ: ຈັດວາງກອງທະຫານປະຈຳເຂດຊາຍແດນຄືນໃໝ່ ເຊິ່ງປະຕິບັດຕາມການຕັດສິນຂອງສານສາກົນດັ່ງນີ້ເປັນຕົ້ນ, ແຕ່ສອງຝ່າຍຍັງບໍ່ໄດ້ຕົກລົງເວລາການປະຕິບັດມາດຕະການດັ່ງກ່າວຢ່າງລະອຽດ, ລັດຖະສະພາໄທຈະໄດ້ປຶກສາຫາລືກັນກ່ຽວກັບເລື່ອງນີ້ໃນອາທິດໜ້າ.
ເຖິງວ່າທ່ານນາງຍິ່ງລັກ ຊິນນະວັດ ໄປຢ້ຽມຢາມກຳປູເຈຍພຽງແຕ່ເຄິ່ງມື້ເທົ່ານັ້ນ, ແຕ່ພາຍນອກມີຄວາມຫວັງອ່າວສູງຕໍ່ການຢ້ຽມຢາມຂອງ ທ່ານນາງຍິ່ງລັກ ໃນເທື່ອນີ້. ຫຼັງຈາກພັກເພື່ອໄທແລະທ່ານນາງຍິ່ງລັກ ຊິນນະວັດ ໄດ້ຊະນະການເລືອກຕັ້ງໃນເດືອນກໍລະກົດ, ລັດຖະບານແລະກະ ຊວງການຕ່າງປະເທດກຳປູເຈຍ ກໍໄດ້ສົ່ງໂທລະເລກມາອວຍພອນພັກເພື່ອໄທໄດ້ຊະນະການເລືອກຕັ້ງ ແລະ ທ່ານນາງຍິ່ງລັກໄດ້ຮັບການເລືອກຕັ້ງເປັນນາຍົກລັດຖະມົນຕີໄທ. ທ່ານຮູນແຊນ, ນາຍົກລັດຖະມົນຕີກຳປູເຈຍກັບທ່ານທັກສິນ ຊິນນະວັດ, ອະດີດນາຍົກລັດຖະມົນຕີໄທ ມີການພົວພັນຢ່າງສະໜິດສະໜົມໃນຖານະສ່ວນຕົວ, ກ່ອນໜ້ານີ້, ສອງປະເທດເຄີຍເກີດການວິວາດກັນທາງການຕ່າງປະເທດຍ້ອນລັດຖະບານກຳປູເຈຍເຊື້ອເຊີນທ່ານທັກສິນມາເປັນທີ່ປຶກສາດ້ານເສດຖະກິດ. ນັກວິເຄາະເຫັນວ່າ, ການໄປຢ້ຽມຢາມກຳປູເຈຍຂອງທ່ານນາງຍິ່ງລັກ ເທື່ອນີ້ ກໍອາດຈະບົ່ງບອກວ່າ, ການພົວພັນລະຫວ່າງໄທກັບກຳປູເຈຍກ້າວໄປສູ່ຄວາມປອງດອງກັນຄືນໃໝ່.
ນອກນີ້, ສິ່ງທີ່ໜ້າສົນໃຈແມ່ນ ຫຼັງຈາກທ່ານນາງຍິ່ງລັກ ຊິນນະວັດ ສິ້ນສຸດການຢ້ຽມຢາມກຳປູເຈຍໃນວັນທີ 15 ແລະມື້ຕໍ່ມາ, ກໍຄື ວັນທີ 16 ກັນຍານີ້, ທ່ານທັກສິນ ຊິນນະວັດ, ອ້າຍຂອງທ່ານນາງຍິ່ງລັກ ຊິນນະວັດ, ອະດີດນາຍົກລັດຖະມົນຕີໄທ ກໍເດີນທາງໄປຢ້ຽມຢາມກຳປູເຈຍ. ເຖິງວ່າກ່ອນໜ້ານີ້ ທ່ານຮູນແຊນ, ນາຍົກລັດຖະມົນຕີກຳປູເຈຍໄດ້ກ່າວວ່າ, ທ່ານທັກສິນໄປຢ້ຽມຢາມກຳປູເຈຍເທື່ອນີ້ແມ່ນເພື່ອເຂົ້າຮ່ວມກອງປະຊຸມເສດຖະກິດອາຊີ, ບໍ່ໄດ້ກ່ຽວພັນເຖິງການຢ້ຽມຢາມກຳປູເຈຍຂອງທ່ານນາງຍິ່ງລັກ ຊິນນະວັດ, ສ່ວນທ່ານນາງຍິ່ງລັກເອງ ກໍໄດ້ກ່າວເນັ້ນຫຼາຍເທື່ອວ່າ, ຫວັງວ່າພາຍນອກບໍ່ຄວນຖືເອົາການໄປຢ້ຽມຢາມກຳປູເຈຍຂອງທ່ານທັກສິນຊິນນະວັດໄປພົວພັນກັບການໄປຢ້ຽມຢາມຂອງທ່ານເອງ. ແຕ່ທັງສອງຄົນໄດ້ໄປຢ້ຽມຢາມກຳປູເຈຍເກືອບໃນເວລາດຽວກັນ, ການຈັດວາງແບບນີ້ຄຳນຶງເຖິງບັນຫາການເມືອງແນວໃດແດ່, ການຟື້ນຟູການພົວພັນລະຫວ່າງໄທແລະກຳປູເຈຍ ເວົ້າສຳລັບການຂ້າມຜ່ານຢ່າງໝັ້ນທ່ຽງຂອງສະຖານະການການເມືອງຂອງໄທແລ້ວ ແມ່ນມີຜົນດີຫຼືມີຜົນຮ້າຍ, ການສະແດງຕົວຂອງທ່ານທັກສິນ ຊິນນະວັດຈະມີຜົນສະທ້ອນແນວໃດຕໍ່ສະຖານະການການເມືອງຂອງໄທແລະການພົວພັນລະຫວ່າງໄທແລະກຳປູເຈຍ, ທັງໝົດເຫຼົ່ານີ້ກໍຍັງຈະມີການປ່ຽນແປງຫຼາຍຢ່າງ.
