ຕອນບ່າຍວັນທີ18ພະຈິກນີ້, ຢູ່ເກາະບາຫລີ, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນກ່າວວ່າ, ການຮ່ວມມືໃນອາຊີຕາເວັນອອກກໍາລັງຢູ່ໃນໄລຍະສໍາຄັນ, ຍຶດໝັ້ນໃຫ້ອາຊຽນເປັນຜູ້ນໍາ, ເຮັດໃຫ້ຫົວຂໍ້ "ການພັດທະນາ, ຕ່າງຝ່າຍຕ່າງມີຜົນປະໂຫຍດ"ພົ້ນເດັ່ນຂຶ້ນ, ສືບຕໍ່ຖືອາຊຽນ,ຈີນ, ຍີ່ປຸ່ນ,ສ.ເກົາຫລີຫລື10+3ເປັນຊ່ອງທາງຕົ້ນຕໍເພື່ອຊຸກຍູ້ການສ້າງອາຊີຕາເວັນອອກເຊື່ອມໂຍງເຂົ້າເປັນອັນໜຶ່ງອັນດຽວ, ແມ່ນສອດຄ່ອງກັບຜົນປະໂຫຍດຮ່ວມຂອງປະເທດຕ່າງໆ.
ໃນມື້ດຽວກັນ, ທ່ານເວີ່ນເຈ່ຍປາວໄດ້ເຂົ້າຮ່ວມກອງປະຊຸມສຸດຍອດອາຊຽນ-ຈີນ,ຍີ່ປຸ່ນ,ສ.ເກົາຫລີຄັ້ງທີ14ແລະກ່າວຄໍາປາໄສ. ທ່ານກ່າວວ່າ, ປະຈຸບັນ, ຜົນສະທ້ອນຈາກວິກິດການການເງິນຍັງແຜ່ລາມຢູ່. ປັດໄຈສັບສົມຕ່າງໆເຮັດໃຫ້ອະນາຄົດຂອງເສດຖະກິດໂລກບໍ່ມີຄວາມແນ່ນອນແລະໝັ້ນທ່ຽງ. ປະເທດຕ່າງໃນອາຊີຕາເວັນອອກຄວນນໍາໃຊ້ມາດຕະການທີ່ເຂັ້ມແຂງກວ່າເກົ່າ, ເພີ່ມທະວີຄວາມສາມັກຄີແລະກໍາລັງແຮງແຫ່ງຂອງການພັດທະນາ, ຜ່ານການລົງເລິກການຮ່ວມມື, ຍົກສູງຄວາມສາມາດໃນການຕໍ່ຕ້ານຄວາມສ່ຽງແລະກໍາລັງແຂ່ງຂັນໂດຍລວມ,ຢືນຢູ່ໃນຖານະເປັນເຈົ້າຕົນເອງໃນການປ່ຽນແປງສະຖານະການໂລກ.
ທ່ານເວີ່ນເຈ່ຍປາວກ່າວວ່າ, ໃນອະນາຄົດ, ອາຊຽນບວກ3ຄວນເພີ່ມທະວີການຮ່ວມມືໃນ4ດ້ານ, ອັນທີ1ແມ່ນເລັ່ງລັດຊຸກຍູ້ການຫັນການຄ້າໃນພາກພື້ນເປັນແບບເສລີແລະສະດວກ. ບົນພື້ນຖານທີ່ເຄົາລົບຖານະໃຈກາງຂອງອາຊຽນຢ່າງເຕັມທີ່, ຄ່ອຍເປັນຄ່ອຍໄປ, ຄໍານຶງເຖິງຄວາມສົນໃຈຂອງຝ່າຍຕ່າງໆ, ຊຸກຍູ້ເຂດການຄ້າເສລີອາຊີຕາເວັນອອກແລະການພົວພັນຄູ່ຮ່ວມມືດ້ານເສດຖະກິດຮອບດ້ານອາຊີຕາເວັນອອກ. ອັນທີ2ແມ່ນຍົກສູງລະດັບການຮ່ວມມືດ້ານການເງິນໃນພາກພື້ນ. ຍົກສູງລັກສະນະບັງເກີດຜົນຂອງສັນຍາຫລາຍຝ່າຍຂອງຂໍ້ລິເລີ່ມຊຽງໃໝ່, ເພີ່ມຄວາມສາມາດສະກັດກັ້ນວິກິດການ, ຕັ້ງໜ້າຊຸກຍູ້ການກໍ່ສ້າງຕະຫລາດພັນທະບັດຂອງອາຊີ, ຊຸກຍູ້ການຈໍາໜ່າຍພັນທະບັດສະກຸນເງິນຕົນ, ເພີ່ມທະວີການຄົ້ນຄວ້າໃນຂົງເຂດໃໝ່ເຊັ່ນ, ການຊໍາລະດ້ວຍສະກຸນເງິນຂອງຕົນໃນການຄ້າໃນພາກພື້ນແລະອື່ນໆ. ອັນທີ3ແມ່ນເພີ່ມການລົງທຶນໃນດ້ານການກໍ່ສ້າງເຊື່ອມຕໍ່ກັນໃນອາຊີຕາເວັນອອກ. ສຸດທ້າຍແມ່ນເພີ່ມທະວີການຮ່ວມມືໃນຂົງເຂດຕ່າງໆເຊັ່ນ,ວິທະຍາສາດເຕັກໂນໂລຊີ, ພະລັງງານໃໝ່ແລະອື່ນໆ.
