ສະພາສູງອາເມລິກາໄດ້ຜ່ານການຕົກລົງລົງໂທດອີຣານດ້ານເສດຖະກິດຢ່າງເຂັ້ມງວດ, ສະຫະພາບເອີລົບກໍ່ເພີ່ມທະວີມາດຕະການລົງໂທດຕໍ່ອີຮານຕື່ມອີກ
(GMT+08:00) 2011-12-02 17:14:00 cri
ຕອນຄ່ຳວັນທີ 1 ທັນວານີ້, ສະພາສູງອາເມລິກາໄດ້ຜ່ານການຕົກລົງກ່ຽວກັບການປະຕິບັດການລົງໂທດທາງເສດຖະກິດຢ່າງເຂັ້ມງວດຕໍ່ອີຮານ, ໂດຍມີຈຸດປະສົງເພື່ອຕັດການພົວພັນລະຫວ່າງທະນາຄານກາງອີຣານກັບລະບົບການເງິນທົ່ວໂລກ.
ຕາມການຕົກລົງ, ຕໍ່ອົງການການເງິນທີ່ດຳເນີນທຸລະກິດກ່ຽວກັບນ້ຳມັນເຊື້ອໄຟແລະຜະລິດຕະພັນທີ່ກ່ຽວຂ້ອງຂອງທະນາຄານກາງອີຣານ, ຈະອາຍັດຊັບສິນຂອງອີຣານຢູ່ອາເມລິກາ. ການລົງໂທດເທື່ອນີ້, ບໍ່ໄດ້ລວມເຖິງການຈຳໜ່າຍອາຫານ, ຢຸກຢາແລະອຸປະກອນການປິ່ນປົວ. ຕາມລະບຽບການທີ່ກ່ຽວຂ້ອງຂອງອາເມລິກາ, ແລ້ວມະຕິຕົກລົງດັ່ງກ່າວຈະມີຜົນບັງຄັບໃຊ້ກໍ່ຕໍ່ເມື່ອທ່ານໂອບາມາ, ປະທານາທິບໍດີອາເມລິກາລົງນາມແລ້ວ.
ມື້ດຽວກັນ, ລັດຖະມົນຕີວ່າການກະຊວງການຕ່າງປະເທດຂອງສະຫະພາບເອີລົບກໍ່ເຫັນດີເພີ່ມທະວີມາດຕະການລົງໂທດຕໍ່ອີຣານ, ຕົກລົງປະຕິບັດການລົງໂທດຕໍ່ບໍລິສັດຂອງອີຣານຈຳນວນ 143 ແຫ່ງແລະສ່ວນບຸກຄົນຕື່ມອີກ 37 ຄົນ. ແຕ່ບໍ່ໄດ້ບັນລຸຄວາມເຫັນເອກະສັນກັນກ່ຽວກັບການຫ້າມການນຳເຂົ້ານ້ຳມັນເຊື້ອໄຟຈາກອີຮານ. ສາເຫດແມ່ນຍ້ອນວ່າ, ປະເທດສະມາຊິກຈຳນວນໜຶ່ງຂອງສະຫະພາບເອີລົບຍັງນຳເຂົ້ານ້ຳມັນເຊື້ອໄຟຈຳນວນຫຼວງຫຼາຍຈາກອີຣານ, ຖ້າວ່າຫ້າມດຳເນີນການຄ້ານ້ຳມັນເຊື້ອໄຟກັບອີຣານ, ຈະເຮັດໃຫ້ເອີລົບທີ່ປະເຊີນໜ້າກັບວິກິດການໜີ້ສິນໜັກໜ່ວງຢູ່ແລ້ວນັ້ນຍິ່ງຊຸດໂຊມລົງຕື່ມອີກ.
