ວັນທີ 3 ທັນວານີ້ ແມ່ນວັນລະລຶກວິທະຍຸສາກົນແຫ່ງປະເທດຈີນຫຼື CRI ສ້າງຕັ້ງຂຶ້ນຄົບຮອບ 70 ປີ. ຫວ່າງມໍ່ໆມານີ້, ຜູ້ນຳປະເທດ, ເຈົ້າໜ້າທີ່ລະດັບສູງຂອງອົງການຈັດຕັ້ງສາກົນ, ທູດຕ່າງປະເທດປະຈຳຈີນແລະບຸກຄົນທີ່ມີຊື່ສຽງໃນສັງຄົມຂອງຫຼາຍປະເທດຕ່າງກໍໄດ້ສະແດງຄວາມອວຍພອນຢ່າງຈິງໃຈຕໍ່ວິທະຍຸ CRI ທີ່ໄດ້ສ້າງຕັ້ງຂຶ້ນຄົບຮອບ 70 ປີ ໂດຍຜ່ານຈົດໝາຍ, ໂທລະເລກຫຼືຄຳເວົ້າ.
ໃນເວລາຢ້ຽມຢາມວິທະຍຸ CRI, ທ່ານຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວໄດ້ຂຽນຄຳອວຍພອນ, ອວຍພອນຜົນສຳເລັດຂອງວິທະຍຸ CRI ທີ່ໄດ້ຮັບໃນ 70 ປີທີ່ຜ່ານມາ, ຫວັງໃຫ້ວິທະຍຸ CRI ຈົ່ງເສີມຂະຫຍາຍບົດບາດຫຼາຍກວ່າເກົ່າໃນການຊຸກຍູ້ການພົວພັນລະຫວ່າງຈີນກັບປະເທດຕ່າງໆ, ໂດຍສະເພາະແມ່ນການພົວພັນມິດຕະພາບລາວຈີນ.
ທ່ານອາຊິຟອາລີ ຊາດາຣີ, ປະທານາທິບໍດີປາກີສະຖານກ່າວວ່າ, ການລາຍງານຂ່າວແລະລາຍການຕ່າງໆທີ່ນັບມື້ນັບດີຂຶ້ນຂອງວິທະຍຸ CRI ມີຜົນດີຕໍ່ການເພີ່ມທະວີການພົວພັນລະຫວ່າງປະເທດຕ່າງໆ, ໄດ້ປະກອບສ່ວນອັນໃຫຍ່ຫຼວງເພື່ອການພົວພັນມິດຕະພາບລະຫວ່າງປາກີສະຖານກັບຈີນ. ອວຍພອນໃຫ້ວິທະຍຸ CRI ຈົ່ງໄດ້ຮັບຜົນສຳເລັດແລະການພັດທະນາທີ່ໃຫຍ່ກວ່າເກົ່າໃນອະນາຄົດ.
ທ່ານກີໂອກີໂອ ນາໂພລີທາໂນ, ປະທານາທິບໍດີອີຕາລີກ່າວວ່າ, ຂອບໃຈນຳພວກທ່ານທີ່ໄດ້ທຳຄວາມພະຍາຍາມຢ່າງບໍ່ລົດລະເພື່ອຊຸກຍູ້ມິດຕະພາບລະຫວ່າງປະຊາຊົນສອງຊາດອີຕາລີຈີນ.
ທ່ານໂຈເຊ ຣາມອສ ໂຮທາ, ປະທານາທິບໍດີຕີມໍເລັສເຕກ່າວວ່າ, ວິທະຍຸ CRI ໄດ້ເຜີຍແຜ່ຄວາມເປັນຈີນທີ່ແທ້ຈິງຕໍ່ໂລກ, ແນະນຳຜົນສຳເລັດຕ່າງໆຂອງຈີນຕໍ່ໂລກດ້ວຍ 61 ພາສາ.
ທ່ານນາຈິບ ຮາຊັກ, ນາຍົກລັດຖະມົນຕີມະເລເຊຍອວຍພອນວິທະຍຸ CRI ທີ່ໄດ້ສ້າງຕັ້ງຂຶ້ນຄົບຮອບ 70 ປີ, ຫວັງວ່າ, ສື່ມວນຊົນສອງປະເທດຈະຮ່ວມມືກັນໃນໄລຍະຍາວນານ.
ທ່ານຄີໂຢ ອາຄາຊາຄາ, ຮອງເລຂາທິການໃຫຍ່ສະຫະປະຊາຊາດກ່າວວ່າ, ວິທະຍຸ CRI ໄດ້ອອກອາກາດໃນຂອບເຂດກວ້າງຂວາງແລະໄດ້ພັດທະນາຢ່າງບໍ່ຢຸດຢັ້ງ, ນຳເອົາສຽງຂອງສະຫະປະຊາຊາດໄປສູ່ຈີນແລະທົ່ວໂລກ. ສະຫະປະຊາຊາດຄອງຄອຍເພື່ອສືບຕໍ່ດຳເນີນການຮ່ວມມືກັບວິທະຍຸ CRI ໃນອະນາຄົດ, ເພີ່ມທະວີແລະລົງເລິກການຮ່ວມມືຢ່າງຕໍ່ເນື່ອງ.
