ຕາມການລາຍງານຂ່າວຈາກຂ່າວສານຕາເວັນອອກກາງຂອງເອຢິບໃນວັນທີ1ທັນວ່ານີ້, ຄະນະກຳມະການສະເພາະກິດໜຶ່ງຂອງສັນນິບາດປະເທດອາຣັບໄດ້ຈັດລາຍຊື່ຂອງລັດຖະມົນຕີວ່າການກະຊວງປ້ອງກັນປະເທດ, ລັດຖະມົນຕີການເງິນ, ຜູ້ຮັບຜິດຊອບຂອງພາກສ່ວນຂ່າວລັບ, ບຸກຄົນທາງທະຫານແລະບຸກຄົນສຳຄັນທາງ ການເມືອງແລະການທະຫານຂອງຊີລີລວມທັງໝົດ17ຄົນເຂົ້າໃນບັນຊີລາຍຊື່ການລົງໂທດ, ຈຳກັດບໍ່ໃຫ້ເຂົາເຈົ້າເດີນທາງໄປປະເທດອາຣັບອື່ນ.
ຄະນະກຳມະການດັ່ງກ່າວຍັງສະເໜີວ່ານັບແຕ່ກາງເດືອນທັນວານີ້ເປັນຕົ້ນໄປໃຫ້ຢຸດເຊົາທາງດ້ານການບິນກັບຊີລີ, ພ້ອມກັນນັ້ນຍັງສະເໜີວ່າຈະບໍ່ຈັດສະບຽງອາຫານ, ຢາປິ່ນປົວພະຍາດ, ອາຍແກັສທຳມະຊາດແລະໄຟຟ້າເຂົ້າໃນຂອບເຂດການຫ້າມບໍ່ໃຫ້ຂົນສົ່ງ. ແລະຍັງຈະຍື່ນບົດລາຍງານວຽກງານໃນກອງປະຊຸມຄະນະກຳມະການລະດັບລັດຖະມົນຕີຂອງປະເທດອາຣັບທີ່ຈະຈັດຂຶ້ນຢູ່ນະຄອນ ຫຼວງໂດຮາປະເທດກາຕາໃນວັນທີ3ທັນວານີ້.
ທ່ານວາລິດ ອານ ມູອາເລມລັດຖະມົນຕີວ່າການກະຊວງການຕ່າງປະເທດຊີລີໄດ້ກ່າວປະນາມຕໍ່ຂໍ້ຕັດສິນໃນການລົງໂທດຂອງສັນນິບາດປະເທດອາຣັບ, ທ່ານກ່າວວ່ານີ້ໝາຍຄວາມວ່າສັນນິບາດປະເທດອາຣັບໄດ້ປິດປ່ອງຢ້ຽມທັງໝົດທີ່ແກ້ໄຂວິກິດການຊີລີ. ທ່ານກ່າວເນັ້ນວ່າ, ລັດຖະບານຊີລີໄດ້ພະຍາຍາມປະຕິບັດຕາມຂໍ້ສະເໜີຂອງປະເທດອາຣັບເພື່ອແກ້ໄຂວິກິດການພາຍໃນຂອງຊີລີ, ຖ້າວ່າສັນນິບາດປະເທດອາຣັບມີເຈດຕະນາທີ່ມີສະຕິສຳປະຊັນຍະອັນຄົບຖ້ວນແລະຄວາມຈິງໃຈເພື່ອຮ່ວມມືກັບຊີລີແທ້, ກໍ່ຄວນຍົກເລີກຂໍ້ຕັດສິນໃນການລົງໂທດດັ່ງກ່າວ.
