ກິລາເປຕັງເປັນກິລາແຫ່ງຄວາມຫວັງຂອງທັບນັກກິລາຈາກແຂວງບໍ່ແກ້ວ, ຕະຫຼອດ ການແຂ່ງຂັນຜ່ານມາ 8 ວັນ ຊິງກັນ 9 ຫຼຽນຄຳ, ແຕ່ບໍ່ແກ້ວພາດໂອກາດໄດ້ຫຼຽນຄຳໃນລາຍການຄູ່ປະສົມ ຊາຍ 2 ຍິງ 1 ທີ່ພົບກັບແຂວງຫຼວງພະບາງເຈົ້າພາບ.
ໃນຕອນເຊົ້າວັນທີ 20 ທັນວາທີ່ສະໜາມກິລາໃນຮົ່ມແຂວງຫຼວງພະບາງ ໄດ້ມີການຊິງອີກ 2 ຫຼຽນຄຳສຸດທ້າຍຄືລາຍການເປຕັງທີມຊຸດຊາຍແລະທີມຊຸດຍິງເຊິ່ງທັງສອງຄູ່ແມ່ນເປັນການພົບກັນລະຫວ່າງເຈົ້າພາບຫຼວງພະບາງກັບແຂວງບໍ່ແກ້ວ. ເຖິງແມ່ນວ່າທີມເປຕັງຈາກແຂວງບໍ່ແກ້ວຈະຖືກກົດດັນຈາກແຮງເຊຍຂອງເຈົ້າພາບ ແຕ່ກໍສາມາດລ້າງຕາເຈົ້າພາບໄດ້ສຳເລັດທັງສອງລາຍການຄື: ທີມຊຸດຊາຍແຂວງບໍ່ແກ້ວເອົາຊະນະຫຼວງພະບາງ 13 -8 ຄະແນນ, ແລະທີມຊຸດຍິງແຂວງບໍ່ແກ້ວເອົາຊະນະຫຼວງພະບາງ 13 -5 ຄະແນນ, ຖືວ່າເປັນການຊະນະຢ່າງໜ້າປະທັບໃຈ ແລະເປັນສອງຫຼຽນຄຳປະຫວັດສາດຂອງທັບນັກກິລາຈາກແຂວງບໍ່ແກ້ວ.
ສະຫຼຸບຜົນການການແຂ່ງຂັນເປຕັງທີມຊຸດຍິງ ນັກກິລາຈາກແຂວງບໍ່ແກ້ວ(ປະກອບດ້ວຍ: ນາງ ໂອເດັດ ສົມສຸກ, ນາງ ນາງຈັນສະໝອນ ວົງສະຫວັດ,ນາງ ຄູນຄຳ ສຸກສະຫວັດແລະນາງ ພອນທິບ ມະນີສອນ)ສາມາດຄວ້າໄດ້ຫຼຽນຄຳ, ຫຼຽນເງິນເປັນຂອງທີມເປຕັງຊຸດຍິງຈາກຫຼວງພະບາງເຈົ້າພາບ ແລະຫຼຽນທອງຮ່ວມເປັນຂອງແຂວງເຊກອງແລະກະຊວງປ້ອງກັນຄວາມສະຫງົບ.
ສຳລັບທີມຊຸດຊາຍ ຫຼຽນຄຳເປັນຂອງນັກກິລາຈາກແຂວງບໍ່ແກ້ວ(ປະກອບດ້ວຍທ້າວ ສຸລະສິດ ຄຳວົງສາ, ທ້າວ ພອນປະເສີດ ສຸກຂະພົນ, ທ້າວ ທຸມພັນ ສຸດາວັນແລະທ້າວ ວົງພະຈັນ ລັດຕະນະ), ຫຼຽນເງິນເປັນຂອງນັກກິລາຈາກແຂວງຫຼວງພະບາງເຈົ້າພາບແລະຫຼຽນທອງຮ່ວມເປັນຂອງແຂວງໄຊຍະບູລີແລະກະຊວງສຶກສາທິການແລະກິລາ.