ຄະນະກຳມະການແມ່ນ້ຳຂອງທີ່ປະກອບດ້ວຍ 4 ປະເທດລຸ່ມແມ່ນ້ຳຂອງ ຄື: ລາວ,ໄທ,ຫວຽດນາມແລະກຳປູເຈຍ ຈະຈັດກອງປະຊຸມສຸດຍອດເທື່ອທຳອິດໃນວັນທີ 2 ຫາວັນທີ 5 ເມສານີ້. ປະເທດທີ່ເຂົ້າຮ່ວມຈະປຶກສາຫາລືບັນ ຫາທີ່ລະດັບນ້ຳຂອງຫຼຸດຕ່ຳລົງຢ່າງຜິດປົກກະຕິແລະເຂດລຸ່ມແມ່ນ້ຳຂອງ ປະສົບກັບໄພແຫ້ງແລ້ງຮຸນແຮງ. ແລະຫວັງຢາກຮ່ວມກັບຈີນແລະ ມຽນມາທີ່ຕັ້ງຢູ່ເຂດເຫນືອແມ່ນ້ຳຂອງຄືກັນ ເພີ່ມທະວີການປົກປ້ອງແລະນຳໃຊ້ຊັບພະຍາກອນນ້ຳ.
ກອງປະຊຸມສຸດຍອດປະເທດແມ່ນ້ຳຂອງຄັ້ງທຳອິດ ຈະຈັດຂຶ້ນຢູ່ເມືອງຫົວຫີນຂອງໄທນັບແຕ່ວັນທີ 2 ຫາວັນທີ 5 ເມສານີ້, ເພື່ອຮ່ວມກັນຮັບມືຢ່າງຮີບດ່ວນກັບບັນຫາທີ່ລະດັບນ້ຳຂອງຫຼຸດຕ່ຳລົງຢ່າງຜິດປົກກະຕິແລະເຂດລຸ່ມແມ່ນ້ຳຂອງປະສົບກັບໄພແຫ້ງແລ້ງຢ່າງຮຸນແຮງ. ຜູ່ນຳຂອງ 4 ປະເທດຄື:ລາວ,ໄທ, ຫວຽດນາມແລະກຳປູເຈຍທີ່ເປັນປະເທດສະມາຊິກຂອງຄະນະກຳມະການແມ່ນ້ຳຂອງ ຈະເຂົ້າຮ່ວມ. ຈີນແລະມຽນມາທີ່ຕັ້ງຢູ່ຍ່ານເຫນືອແມ່ນ້ຳຂອງໃນນາມເປັນປະເທດ ສັງເກດການຈະສົ່ງຜູ່ແທນເຂົ້າຮ່ວມ . ນອກນີ້, ຜູ່ແທນຂອງອົງການຈັດຕັ້ງທາງສັງຄົມແລະພາກສ່ວນເອກະຊົນຈຳນວນ ຫນຶ່ງກໍ່ຈະເຂົ້າຮ່ວມ. ກອງປະຊຸມສຸດຍອດເທື່ອນີ້ ຍັງເປັນຂີດຫມາຍສະແດງໃຫ້ເຫັນວ່າ ຄະນະກຳມະການແມ່ນ້ຳຂອງໄດ້ສ້າງຕັ້ງຂຶ້ນຄົບຮອບ 15 ປີແລ້ວ, ບຸກຄົນສຳຄັນ ທັງຫຼາຍທີ່ເຂົ້າຮ່ວມກອງປະຊຸມ ຍັງຈະປຶກສາຫາລືການທ້າທາຍແລະໂອກາດຕ່າງໆທີ່ເຂດລຸ່ມແມ່ນ້ຳຂອງພວມປະເຊີນຢູ່, ໂດຍສະເພາະແມ່ນຜົນກະທົບຍາວນານຈາກການປ່ຽນແປງຂອງດິນຟ້າອາກາດ,ບົດບາດຂອງຄະນະກຳມະການແມ່ນ້ຳຂອງໃນການສຳເລັດເປົ້າໝາຍພັດທະນາສະຫັດສະວັດ ເຊັ່ນວ່າ:ໃນດ້ານຫຼຸດຜ່ອນຄວາມທຸກຍາກແລະອື່ນໆ. ໂດຍອີງຕາມວາລະປະຊຸມຂອງກອງປະຊຸມເທື່ອນີ້, ຜູ່ນຳຂອງຄະນະກຳມະການດັ່ງກ່າວຈະຈັດກອງປະຊຸມສຸດຍອດເປັນເວລາເຄິ່ງວັນໃນວັນທີ 5 ເມສານີ້.
ສ່ວນວັນທີ 2 ແລະວັນທີ 3,ປະເທດເຈົ້າພາບຈະຈັດກອງປະຊຸມສາກົນເປັນເວລາ 2 ວັນກ່ອນ. ຫົວຂໍ້ຂອງກອງປະຊຸມແມ່ນ: "ການຄຸ້ມຄອງຊັບພະຍາກອນນ້ຳທີ່ຂ້າມຊາຍແດນ ພາຍໃຕ້ສະພາບທີ່ດິນຟ້າອາກາດຂອງໂລກມີການປ່ຽນແປງ". ນອກຈາກຜູ່ແທນຂອງຄະນະກຳມະການແມ່ນ້ຳຂອງແລ້ວ, ຜູ່ແທນແລະນັກວິຊາການດ້ານຊົນລະປະທານຂອງອົງການຄຸ້ມຄອງແມ່ນ້ຳສາກົນແລະອົງການຈັດຕັ້ງສາກົນອື່ນໆ ຈະເຂົ້າຮ່ວມກອງປະຊຸມເທື່ອນີ້, ເພື່ອຮ່ວມກັນຫາລືແລະແລກປ່ຽນບົດຮຽນທີ່ດີແລະບັນຫາທີ່ສົນໃຈຮ່ວມກັນຂອງເຂົາເຈົ້າ, ແລະມີຂໍ້ສະເຫນີ ກ່ຽວກັບການຈະເຮັດແນວໃດເພື່ອປັບປຸງການພັດ ທະນາແລະການຄຸ້ມຄອງຊັບພະຍາກອນນ້ຳໃຫ້ດີກວ່າເກົ່າ. ຖະແຫຼງການຂອງກອງປະຊຸມຄັ້ງນີ້ ຈະຍື່ນຕໍ່ກອງປະຊຸມສຸດຍອດ 4 ປະເທດຄະນະກຳມະການແມ່ນ້ຳຂອງ.
ຂໍ້ມູນທີ່ຄະນະກຳມະການແມ່ນ້ຳຂອງ ເຜີຍແຜ່ສະແດງໃຫ້ເຫັນວ່າ, ປະຈຸບັນ, ຢູ່ໃນໂລກ, ມີປະຊາຊົນຫຼາຍກວ່າ 40 % ດຳລົງຊີວິດຢູ່ເຂດລ້ອງແມ່ນ້ຳແລະລຸ່ມແມ່ນ້ຳທີ່ຂ້າມຊາຍແດນຂອງສອງປະເທດຫຼືຫຼາຍປະເທດ, ນີ້ກໍ່ຮຽກຮ້ອງໃຫ້ປະເທດຕ່າງໆໃນເຂດລຸ່ມແມ່ນ້ຳ ເພີ່ມທະວີການຮ່ວມມືທີ່ຂ້າມຊາຍແດນລະຄຸ້ມຄອງຮ່ວມກັນ, ເພື່ອຮັບມືກັບການທ້າທາຍຂອງການພັດທະນາເສດຖະກິດແລະສັງຄົມ.
ແມ່ນ້ຳລ້ານຊ້າງແມ່ນ້ຳຂອງເກີດໄພແຫ້ງແລ້ງໜັກໜ່ວງໃນໄລຍະນີ້, 5ປະເທດອະນຸພາກພື້ນລຸ່ມແມ່ນ້ຳຂອງລວມທັງຈີນແລະໄທລ້ວນແຕ່ໄດ້ຮັບຜົນກະທົບໜັກ, ແຕ່ວ່າ, ໜ່ວຍງານແລະສື່ມວນຊົນຈຳນວນໜຶ່ງເຫັນວ່າລະດັບນ້ຳຂຂອງອງຫຼຸດລົງຫຼາຍຢ່າງຜິດປົກກະຕິແມ່ນຍ້ອນວ່າຈີນສ້າງເຂື່ອນໄຟຟ້ານ້ຳຕົກຢູ່ຍ່ານເໜືອ, ແລ້ວຮຽກຮ້ອງໃຫ້ຈີນຮັບຜິດຊອບຕໍ່ໄພແຫ້ງແລ້ງເທື່ອນີ້. ໃນຖານະທີ່ເປັນປະເທດສັງເກດການຂອງຄະນະກຳມະການແມ່ນ້ຳຂອງ, ຈີນຈະສົ່ງທ່ານຊົ້ງທ່າວ ລັດຖະມົນຕີຊ່ວຍວ່າການກະຊວງການຕ່າງປະເທດຈີນໄປເຂົ້າຮ່ວມກອງປະຊຸມສຸດຍອດແມ່ນ້ຳຂອງເທື່ອນີ້.
ຈີນເຫັນວ່າ, ລະດັບນ້ຳອງຫຼຸດລົງຫຼາຍຜິດປົກກະຕິບໍ່ກ່ຽວກັບການສ້າງເຂື່ອນໄຟຟ້ານ້ຳຕົກຢູ່ແມ່ນ້ຳລ້ານຊ້າງ. ອາກາດແຫ້ງແລ້ງທີ່ສຸດໃນປະຈຸບັນແມ່ນສາເຫດທີ່ແທ້ຈິງທີ່ເຮັດໃຫ້ລະດັບນ້ຳຂອງແມ່ນ້ຳລ້າງຊ້າງແມ່ນ້ຳຂອງຫຼຸດລົງ. ນອກຈາກເຂດລ້ອງແມ່ນ້ຳລ້ານຊ້າງມີປະລິມານຝົນຕົກໜ້ອຍກວ່າໄລຍະດຽວກັນໃນປີຜ່ານມາ 65%ແລ້ວ, ເຂດລ້ອງແມ່ນ້ຳຂອງກໍມີຝົນຕົກໜ້ອຍທີ່ສຸດ, ປະລິມານນ້ຳຫຼຸດລົງຢ່າງຜິດປົກກະຕິ.
ສະນັ້ນ, ລັດຖະບານຈີນໄດ້ແຈ້ງສະພາບການຂາດນ້ຳແລະສະໜອງຂໍ້ມູນອຸທົກກະສາດທີ່ກ່ຽວຂ້ອງຂອງສະຖານີອຸທົກກະສາດຈີນສອງແຫ່ງທີ່ຢູ່ເມືອງຊຽງຮຸ່ງແລະເມືອງມັນທີ່ຢູ່ຕັ້ງແຄມແມ່ນ້ຳລ້ານຊ້າງນັ້ນຢ່າງສຸກເສີນໃຫ້ແກ່ຄະນະກຳມະການແມ່ນ້ຳຂອງເລີ່ມແຕ່ວັນທີ 22 ມີນານີ້, ຫວັງວ່າຈະສາມາດຊ່ອຍເຫຼືອວຽກງານຕ້ານແລະກູ້ໄພແຫ້ງແລ້ງຂອງປະເທດຢູ່ເຂດລຸ່ມແມ່ນ້ຳຂອງ. ຈີນຍັງກ່າວວ່າ, ຍິນດີເພີ່ມທະວີການແລປ່ຽນກັນດ້ານຂໍ້ມູນຂ່າວສານກັບລາວ, ໄທ, ຫວຽດນາມແລະກຳປູເຈຍ, ລົງເລິກການຮ່ວມມືທີ່ໄວ້ເນື້ອເຊື່ອໃຈກັນ, ຮ່ວມກັນເຮັດວຽກວຽກງານຕ້ານໄພແຫ້ງແລ້ງໃຫ້ດີ.
