ການສ້າງສາເຂດການຄ້າເສລີຈີນອາຊຽນຄວນສຸມໃສ່ຕ່າງຝ່າຍຕ່າງໄດ້ຮັບຜົນປະໂຫຍດ
(GMT+08:00) 2010-04-02 10:21:17 cri
ວັນທີ1ມັງກອນປີ2010, ເຂດການຄ້າເສລີຈີນອາຊຽນໄດ້ສ້າງສຳເລັດຢ່າງຮອບດ້ານ, ນີ້ແມ່ນເຫດການສຳຄັນໃນການພົວພັນສອງຝ່າຍ, ມີຄວາມໝາຍປະຫວັດສາດ, ກໍ່ແມ່ນການສະຫຼຸບຂັ້ນຕອນແຫ່ງການຂະຫຍາຍການພົວພັນດ້ານການເມືອງ, ເສດຖະກິດການຄ້າ, ວັດທະນະທຳສັງຄົມໃນ18ປີນັບແຕ່ສອງຝ່າຍເລີ່ມການເຈລະຈາໃນປີ1991ມານີ້. ວັນທີ24ທັນວາປີ2009, ທ່ານນາງເຊ່ຮັ້ນຊີນ, ເອກອັກຄະລັດຖະທູດຈີນປະຈຳອາຊຽນຄົນທຳອິດຂອງຈີນໄດ້ໃຫ້ສຳພາດຕໍ່ນັກຂ່າວCRIກ່ຽວກັບການຂະຫຍາຍການພົວພັນຈີນອາຊຽນ.
ອາຊຽນແມ່ນອົງການຮ່ວມມືພາກພື້ນທີ່ສຳຄັນຢູ່ອາຊີ, ໄດ້ເສີມຂະຫຍາຍບົດບາດໃນການຮັກສາສັນຕິພາບສະຖຽນລະພາບຂອງພາກພື້ນນີ້, ສ້າງຄວາມຈະເລີນຮຸ່ງເຮືອງທາງເສດຖະກິດ, ແລະຊຸກຍູ້ການຮ່ວມມືອາຊີຕາເວັນອອກ. ທ່ານນາງເຊ່ຮັ້ນຊີນກ່າວວ່າ, ປີ1991, ຈີນແລະອາຊຽນໄດ້ເລີ່ມເຈລະຈາກັນຢ່າງເປັນທາງການ. ເມື່ອທຽບກັບອາເມລິກາ, ຍີ່ປຸ່ນ, ແລະສ.ເກົາຫຼີແລ້ວ, ການຮ່ວມມືລະຫວ່າງຈີນກັບອາຊຽນເລີ່ມຕົ້ນຊ້າກວ່າ, ແຕ່ວ່າ18ປີມານີ້, ການພົວພັນສອງຝ່າຍໄດ້ຂະຫຍາຍຕົວໄວຫຼາຍ, ຄວາມໄວ້ເນື້ອເຊື່ອໃຈກັນສູງຂຶ້ນຢ່າງຈະແຈ້ງ, ການຮ່ວມມືໃນຂົງເຂດຕ່າງໆໄດ້ເປີດກວ້າງແລະກ້າວສູ່ລວງເລິກຢ່າງບໍ່ຢຸດຢັ້ງ, ເຊິ່ງໄດ້ສ້າງພື້ນຖານທາງການເມືອງແລະເສດຖະກິດອັນໜັກແໜ້ນແກ່ການສ້າງເຂດການຄ້າເສລີ. ທ່ານນາງເຊ່ຮັ້ນຊີນກ່າວວ່າ,
ໃນ18ປີຜ່ານມານີ້, ການພົວພັນລະຫວ່າງຈີນກັບອາຊຽນໄດ້ຮັບການຂະຫຍາຍຕົວຢ່າງຫຼວງຫຼາຍ, ການພົວພັນສອງຝ່າຍໄດ້ຜ່ານສາມໄລຍະ, ຄື, ໄລຍະທີໜຶ່ງ, ແມ່ນສ້າງການເຈລະຈາ, ໄລຍະທີສອງ, ແມ່ນເພີ່ມຄວາມໄວ້ເນື້ອເຊື່ອໃຈກັນ, ສ້າງການພົວພັນມິດຕະພາບແບບບ້ານໃກ້ເຮືອນຄຽງທີ່ດີ, ແລະໄລຍະທີສາມ, ກໍ່ແມ່ນຍົກລະດັບຂອງການພົວພັນດັ່ງກ່າວຂຶ້ນສູ່ລະດັບການພົວພັນຄູ່ຮ່ວມມືຍຸດທະສາດ. ເຖິງວ່າມີສາມໄລຍະກໍ່ຕາມ, ແຕ່ໄດ້ຂະຫຍາຍຕົວຢ່າງວ່ອງໄວ.
ເມື່ອຫວນຄືນເຖິງການຂະຫຍາຍຕົວຂອງການພົວພັນຈີນອາຊຽນໃນໜຶ່ງປີຜ່ານມາ, ທ່ານນາງເຊ່ຮັ້ນຊີນຮູ້ສຶກພູມໃຈຫຼາຍ, ເພາະວ່າພາຍໃຕ້ສະພາບວິກິດການການເງິນສາກົນ, ສອງຝ່າຍຍັງໄດ້ຮັກສາການໄປມາຫາສູ່ກັນລະຫວ່າງຜູ້ນຳຊັ້ນສູງ, ໃນເດືອນເມສາປີ2009ທີ່ເປັນໄລຍະທີ່ວິກິດການໜັກໜ່ວງທີ່ສຸດ, ທ່ານເວິ່ນເຈ່ຍປາວ, ນາຍົກລັດຖະມົນຕີຈີນໄດ້ສະເໜີແຜນການຕ່າງໆທີ່ຮ່ວມມືກັບປະເທດອາຊຽນດ້ານເສດຖະກິດແລະການເງິນ, ໄດ້ເປັນກຳລັງໃຈໃຫ້ປະເທດອາຊຽນຮັບມືກັບວິກິດການ. ພ້ອມກັນນັ້ນ, ການກໍ່ສ້າງເຂດການຄ້າເສລີຈີນອາຊຽນໄດ້ດຳເນີນໄປຢ່າງໜັກແໜ້ນ, ເດືອນສິງຫາປີ2009, ສອງຝ່າຍໄດ້ເຊັນສັນຍາສຳຄັນສະບັບສຸດທ້າຍໃນ"ສັນຍາຂອບການຮ່ວມມືເສດຖະກິດຮອບດ້ານຈີນອາຊຽນ", ຄື"ສັນຍາການລົງທຶນ", ໄດ້ປູທາງໃຫ້ແກ່ການສ້າງເຂດການຄ້າເສລີຢ່າງຮອບດ້ານ. ທ່ານນາງເຊ່ຮັ້ນຊີນເຫັນວ່າ, ພາຍໃຕ້ວິກິດການ, ການຮ່ວມມືລະຫວ່າງຈີນກັບປະເທດອາຊຽນໄດ້ຮັບໝາກຜົນອັນພົ້ນເດັ່ນ, ເຊີ່ງໄດ້ສະແດງໃຫ້ເຫັນຄວາມໝາຍສຳຄັນທີ່ສອງຝ່າຍດຳເນີນການເຈລະຈາທີ່ມີໄມຕີຈິດມິດຕະພາບແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ປະຈຸບັນ, ອາຊຽນພວມອອກແຮງຊຸກຍູ້ການສ້າງປະຊາຄົມຂອງຕົນ, ຈີນກໍ່ສືບຕໍ່ຊຸກຍູ້ ການສ້າງສັງຄົມທີ່ອິ່ມໜຳສຳລານຢ່າງຮອບດ້ານ, ໃນໄລຍະນີ້, ທ່ານນາງເຊ່ຍ ຮ້ານສິນ, ເອກອັກຄະລັດຖະທູດຈີນປະຈຳອາຊຽນເຫັນວ່າ, ການສ້າງເຂດການຄ້າເສລີຈີນອາຊຽນຢ່າງສຳເລັດຜົນແມ່ນຂີດໝາຍສະແດງໃຫ້ເຫັນວ່າການພົວພັນດ້ານການຮ່ວມມືລະຫວ່າງສອງຝ່າຍໄດ້ກ້າວເຂົ້າສູ່ໄລຍະໃໝ່. ນາງກ່າວວ່າ:
"ໃນຮູບແບບການຮ່ວມມືຕ່າງໆຂອງອາຊີຕາເວັນອອກ, ຂ້າພະເຈົ້າເຫັນວ່າ10ບວກ1ແມ່ນພື້ນຖານ, ໂດຍສະເພາະແມ່ນໃນຂົງເຂດການຮ່ວມມືດ້ານເສດຖະກິດການຄ້າ. ການຊຸກຍູ້ການສ້າງເຂດການຄ້າເສລີບົນພື້ນຖານ10ບວກ1, ຖ້າວ່າການທົດລອງນີ້ສຳເລັດຜົນ, ຈະຊຸກຍູ້ການພັດທະນາເສດຖະກິດສັງຄົມຂອງພາກພື້ນແຫ່ງນີ້ຢ່າງຫຼວງຫຼາຍ. ຈີນພວມຢູ່ໃນໄລຍະພັດທະນາທີ່ສຳຄັນ, ອາຊຽນກໍ່ພວມພະຍາຍາມຊຸກຍູ້ການພັດທະນາເສດຖະກິດສັງຄົມຂອງພາພື້ນ ໂດຍຜ່ານການສ້າງສາການເຊື່ອມໂຍງເຂົ້າເປັນອັນໜຶ່ງອັນດຽວກັນ. ສອງຝ່າຍມີເປົ້າໝາຍທີ່ເປັນເອກະພາບກັນ, ຖ້າວ່າການສ້າງເຂດການຄ້າເສລີຈີນອາຊຽນຈະໄດ້ຮັບການພັດທະນາກ້າວໄປໜ້າຢ່າງຫຼວງຫຼາຍກໍ່ຍ່ອມຈະຊັກນຳການພັດທະນາຂອງພາກພື້ນນີ້, ແລະກໍ່ຈະເສີມຂະຫຍາຍບົດບາດສຳຄັນຕໍ່ການຊຸກຍູ້ການສ້າງສາອາຊຽນໃຫ້ເຊື່ອມໂຍງເຂົ້າເປັນອັນໜຶ່ງອັນດຽວກັນ, ຊຸກຍູ້ການພັດທະນາເສດຖະກິດ, ການປະຕິຮູບແລະເປີດປະຕູສູ່ພາຍນອກຂອງຈີນ. ເບິ່ງຈາກຄວາມໝາຍນີ້ແລ້ວເຫັນວ່າ, ການສ້າງເຂດການຄ້າເສລີມີຄວາມສຳຄັນຫຼາຍ, ຕ້ອງຊຸກຍູ້ໃຫ້ກ້າວໄປໜ້າຢ່າງໝັ້ນທ່ຽງ."
"ຕ່າງຝ່າຍຕ່າງມີຜົນປະໂຫຍດ"ແມ່ນຄໍາທີ່ນາງເຊ່ຍຮ້ານສິນໃຊ້ຫຼາຍທີ່ສຸດໃນການອະພິປາຍກ່ຽວກັບເຂດການຄ້າເສລີຈີນອາຊຽນ. ນາງເຫັນວ່າ, ພາຍຫຼັງເຂດການຄ້າເສລີສ້າງສໍາເລັດແລ້ວ, ການຄ້າຂອງຈີນກັບປະເທດອາຊຽນຄວນເຕີບໂຕຂຶ້ນພ້ອມໆກັນ, ຕ່າງຝ່າຍຕ່າງມີຜົນປະໂຫຍດຈະມີຜົນດີຕໍ່ການພັດທະນາເຂດການຄ້າເສລີຢ່າງປອດໄສ. ນາງກ່າວວ່າ: "ຖ້າເວົ້າໂດຍທາດແທ້ແລ້ວ, ຈີນຂະຫາຍການພົວພັນກັບອາຊຽນແມ່ນການຮ່ວມມືໃຕ້ກັບໃຕ້, ກໍ່ແມ່ນການຮ່ວມມືລະຫວ່າງປະເທດທີ່ພວມພັດທະນາ, ສະນັ້ນ, ການສ້າງເຂດການຄ້າເສລີຈີນອາຊຽນຕ້ອງເອົາໃຈໃສ່ຜົນປະໂຫຍດຂອງປະຊາຊົນຈີນແລະປະຊາຊົນຂອງປະເທດອາຊຽນ, ຕ້ອງແມ່ນສອງຝ່າຍລ້ວນແຕ່ໄດ້ຮັບຜົນປະໂຫຍດ. ໃນການພົວພັນສາກົນ, ພວກຂ້າພະເຈົ້ານັບຖືຫຼັກການທີ່ສະເໝີພາບ, ມິດຕະພາບ, ເປັນບ້ານໃກ້ເຮືອນຄຽງທີ່ດີແລະຕ່າງຝ່າຍຕ່າງມີຜົນປະໂຫຍດ. ສະນັ້ນ, ນັບແຕ່ຈີນຂະຫຍາຍການພົວພັນກັບອາຊຽນເປັນຕົ້ນມາ, ຖ້າມີບັນຫາເກີດຂຶ້ນແລ້ວ, ຈີນກໍ່ແມ່ນພິຈາລະນາວິທີແກ້ໄຂບັນຫາກັບປະເທດອາຊຽນໂດຍຜ່ານວິທີປຶກສາຫາລືທີ່ສະເໝີພາບ, ເພື່ອສະແຫວງຫາການພັດທະນາຮ່ວມກັນ."
ທ່ານນາງເຊ່ຍຮ້ານສິນກ່າວວ່າ, ພາຍຫຼັງເຂດການຄ້າເສລີສ້າງສຳເລັດແລ້ວ, ຍັງມີວຽກຫຼາຍອັນທີ່ຕ້ອງຊຸກຍູ້ຕື່ມອີກ. ໃນຖານະທີ່ເປັນເອກອັກຄະລັດຖະທູດຈີນປະຈຳອາຊຽນ, ນາງຈະສືບຕໍ່ເສີມຂະຫຍາຍບົດບາດດ້ານການຕິດຕໍ່ປະສານງານ, ແລກປ່ຽນ, ແລະໃຫ້ຄວາມເຫັນ, ສົມທົບກັບພາກສ່ວນທີ່ກ່ຽວຂ້ອງ, ຈັດຕັ້ງປະຕິບັດສັນຍາເຂດການຄ້າເສລີ, ຕິດຕາມບັນຫາທີ່ເກີດຂຶ້ນໃນຂະບວນການສ້າງເຂດການຄ້າເສລີ.
ທ່ານຜູ້ຟັງ, ທີ່ທ່ານຟັງໄປນັ້ນແມ່ນຄໍລຳເຂດການຄ້າເສລີຈີນອາຊຽນກ່ຽວກັບການສ້າງເຂດການຄ້າເສລີຈີນອາຊຽນຕ້ອງເອົາໃຈ່ໃສ່ຕ່າງຝ່າຍຕ່າງມີຜົນປະໂຫຍດທີ່ໃຫ້ສຳພາດໂດຍທ່ານນາງເຊ້ຍຮ້ານສິນ ເອກອັກຄະລັດຖະທູດຈີນປະຈຳອາຊຽນ. ລາຍການເທື່ອນີ້ຂໍຈົບລົງພຽງທໍ່ນີ້, ສະບາຍດີ!
