ຕາມຂ່າວCRI: ວັນທີ 29 ມີນານີ້, ລັດຖະບານໄທໄດ້ເຈລະຈາກັບກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທຫຼືກຸ່ມເສື້ອແດງຄັ້ງທີ 2, ລັດຖະບານໄທໄດ້ຜ່ອນສັ້ນຜ່ອນຍາວໃນບັນຫາຈະຍຸບສະພາຜູ້ແທນລາຊະດອນຫຼືບໍ່, ແຕ່ສອງຝ່າຍຍັງຕົກລົງກັນບໍ່ໄດ້ກ່ຽວກັບວັນເວລາຍຸບສະພາ. ຄວາມຫວັງຈະມີສັນຕິພາບຂອງສະພາບການເມືອງໄທທີ່ຫາກໍ່ສະແດງວີ່ແວວອອກມານັ້ນໄດ້ສູນຫາຍໄປອີກ, ສອງຝ່າຍໄດ້ຕົກຢູ່ໃນສະພາບຂັດແຍ່ງໜັກອີກເທື່ອໜຶ່ງ.
ເລີ່ມແຕ່ວັນທີ 14 ມີນານີ້, ກຸ່ມເສື້ອແດງໄດ້ຈັດການໂຮມຊຸມນຸມປະທ້ວງຕໍ່ຕ້ານລັດຖະບານຂະໜາດໃຫຍ່ທີ່ສຸດຢູ່ບາງກອກນັບແຕ່ທ່ານອະພິສິດ ເວດຊາຊີວະ, ນາຍົກລັດຖະມົນຕີໄທຂຶ້ນຮັບຕຳແໜ່ງເປັນຕົ້ນມາ, ທວງໃຫ້ລັດຖະບານຍຸບສະພາຜູ້ແທນລາຊະດອນໃນທັນທີ. ພາຍຫຼັງແຫ່ຂະບວນໜຶ່ງອາທິດແລ້ວ, ລັດຖະບານກ່າວວ່າຍອມເຈລະຈາກັບກຸ່ມເສື້ອແດງ.
ຕອນບ່າຍວັນທີ 29 ມີນານີ້, ຜູ້ຕາງໜ້າລັດຖະບານ 3 ຄົນທີ່ທ່ານອະພິສິດເປັນຫົວນ້າໄດ້ເຈລະຈາກັບຄະນະນຳ 3 ຄົນຂອງກຸ່ມເສື້ອແດງ. ເພື່ອແກ້ໄຂຄວາມຂັດແຍ່ງກັນລະຫວ່າງສອງຝ່າຍໂດຍໄວແລະຟື້ນຟູຄວາມເປັນລະບຽບຮຽບຮ້ອຍຂອງສັງຄົມ, ໂດຍຜ່ານການປຶກສາຫາລືພາຍໃນລັດຖະບານ, ທ່ານອະພິສິດເຫັນດີຈະຈັດການເລືອກຕັ້ງທົ່ວໄປໃນທ້າຍປີນີ້. ແລະກ່ອນຈະເຖິງວັນນັ້ນຜູ້ປະທ້ວງຄວນຮ່ວມມືກັບລັດຖະບານສ້າງພື້ນຖານທີ່ດີໃຫ້ແກ່ປະເທດ, ລັດຖະບານຈະພະຍາຍາມພັດທະນາເສດຖະກິດ, ດັດແກ້ມາດຕາທີ່ມີຂໍ້ຂັດແຍ່ງຂອງລັດຖະທຳມະນູນແລະຟື້ນຟູຄວາມເປັນລະບຽບຮຽບຮ້ອຍຂອງຊາດແລະສັງຄົມໂດຍໄວພາຍໃນ 9 ເດືອນ, ເພື່ອເຮັດໃຫ້ສະພາບການຂອງໄທເຂົ້າສູ່ປົກກະຕິກ່ອນຈັດການເລືອກຕັ້ງທົ່ວໄປ. ຫຼັງຈາກນັ້ນ, ຄະນະນຳ 3 ຄົນຂອງກຸ່ມເສື້ອແດງໄດ້ສະເໜີຄວາມເຫັນທີ່ຕ່າງກັນກ່ຽວກັບບັນຫາທີ່ດັດແກ້ລັດຖະທຳມະນູນ, ແລະສະແດງຄວາມບໍ່ພໍໃຈຕໍ່ເວລາ 9 ເດືອນທີ່ລັດຖະບານສະເໜີ, ໃນທີ່ສຸດ ທ່ານຈະຕຸພອນ ພົມພັນ, ໜຶ່ງໃນຜູ້ນຳຂອງກຸ່ມເສື້ອແດງໄດ້ປະຕິເສດເວລາກຳນົດ 9 ເດືອນທີ່ລັດຖະບານສະເໜີອອກມາໂດຍກ່າວວ່າຄວາມຮຽກຮ້ອງຂອງກຸ່ມເສື້ອແດງທີ່ໃຫ້ຍຸບສະພາລາຊະດອນພາຍໃນເວລາ 15 ວັນບໍ່ໄດ້ຮັບການເຫັນດີຈາກລັດຖະບານ.
ການເຈລະຈາທີ່ຍືດເຍື້ອເປັນເວລາສອງຊົ່ວໂມງປາຍນັ້ນໄດ້ສິ້ນສຸດລົງໃນສະພາບການທີ່ສອງຝ່າຍຕົກລົງຫຍັງກັນບໍ່ໄດ້ເລີຍ.ຕໍ່ຈາກນັ້ນ,ຢູ່ຂົວຜ່ານຟ້າລີລາດທີ່ເປັນບ່ອນໂຮມຊຸມ ນຸມປະທ້ວງຕົ້ນຕໍຂອງກຸ່ມເສື້ອແດງ,ທ່ານນັດທະວຸດໃສເກື້ອ,ໜຶ່ງໃນຜູ່ນຳຂອງກຸ່ມເສື້ອແດງປະກາດຕໍ່ປະຊາຊົນຜູ່ປະທ້ວງວ່າ,ມາຮອດນີ້,ການເຈລະຈາລະຫວ່າງກຸ່ມເສື້ອແດງກັບລັດຖະບານໄດ້ຢຸດຕິແລ້ວ,ການໂຮມຊຸມນຸມປະທ້ວງຂອງກຸ່ມເສື້ອແດງຈະດຳເນີນຕໍ່ໄປ.ພາຍຫຼັງການເຈລະຈາສິ້ນສຸດລົງແລ້ວ,ທ່ານອະພິສິດໄດ້ສະແດງຄວາມເສຍດາຍທີ່ສຸດຕໍ່ຜົນການເຈລະຈາ.ທ່ານກ່າວວ່າ,ເຊື່ອໝັ້ນວ່າຄົນຈຳນວນຫຼວງຫຼາຍລ້ວນແຕ່ຫວັງຢາກໃຫ້ ການເຈລະຈາໄດ້ຮັບໝາກຜົນຈຳນວນໜຶ່ງ,ສາເຫດທີ່ລັດຖະບານເຫັນດີຈັດການເລືອກຕັ້ງໃນທ້າຍປີນີ້ກໍ່ແມ່ນຢາກໃຫ້ປະເທດຟື້ນຟູຄວາມໝັ້ນຄົງໂດຍໄວ,ແຕ່ຄວາມໝັ້ນຄົງຂອງປະເທດຕ້ອງການໃຫ້ສອງຝ່າຍມີຄວາມເຫັນເປັນເອກະສັນກັນຈຶ່ງຈະປະກົດເປັນຈິງໄດ້. ທ່ານຫວັງທີ່ຢາກໃຫ້ການເຈລະຈາດຳເນີນຕໍ່ໄປແລະສາມາດຕົກລົງກັນໄດ້ໃນທີ່ສຸດ.
ຫາງສຽງທົ່ວໄປສັງເກດເຫັນວ່າ,ໃນການເຈລະຈາເທື່ອນີ້, ທ່ານວິລະ ມຸສິກະພົງ, ຫນຶ່ງໃນຜູ່ນຳຂອງ＂ກຸ່ມເສື້ອແດງ＂ໄດ້ສະແດງທ່າທີທີ່ບໍ່ຮຸນແຮງປານໃດເມື່ອທຽບກັບຕົວແທນເຈລະຈາຂອງກຸ່ມເສື້ອແດງຜູ່ອື່ນ. ຄືເມື່ອ ຮອດຕອນທ້າຍຂອງການເຈລະຈາເທື່ອນີ້,ທ່ານຈະຕຸພອນ ພົມພັນ,ຫນຶ່ງໃນຜູ່ນຳຂອງ＂ກຸ່ມເສື້ອແດງ＂ ພັດບໍ່ເຫັນດີຢ່າງສິ້ນເຊີງໃນການເຫັນດີຮ່ວມກັນຈຳນວນຫນຶ່ງ ກ່ອນຫນ້ານີ້, ແລ້ວໄດ້ເຮັດໃຫ້ການເຈລະຈາທີ່ອາດຈະໄດ້ຮັບຄວາມຄືບຫນ້ານັ້ນ ເຂົ້າສູ່ສະພາບຫຍຸ້ງຍາກອີກເທື່ອຫນຶ່ງ. ເມື່ອສັງເກດຈາກທ່າທີທີ່ຕ່າງກັນ ທີ່ຄະນະນຳ 2 ຄົນຂອງ＂ກຸ່ມເສື້ອແດງ＂ ສະແດງອອກໃນການເຈລະຈາ ກໍ່ເຫັນໄດ້ວ່າ,ໃນເວລາທີ່ດຳເນີນການໂຮມຊຸມນຸມປະທ້ວງເຖິງວັນທີ 16 ນັ້ຣ, ຄະນະນຳຂອງ＂ກຸ່ມເສື້ອແດງ＂ມີຄວາມເຫັນທີ່ ບໍ່ເປັນເອກະພາບກັນ. ນັກວິເຄາະເຫັນວ່າ, ການເຈລະຈາຮອບໃຫມ່ອາດຈະຈັດຂຶ້ນອີກຫຼືບໍ່＂ກຸ່ມເສື້ອແດງ＂ ຈະດຳເນີນການໂຮມຊຸມນຸມປະທ້ວງຕໍ່ໄປຈົນບໍ່ແລ້ວບໍ່ທົ່ວຫຼື ຈະໃຊ້ຄວາມຮຸນແຮງ ບັງຄັບໃຫ້ລັດຖະບານຍຸບສະພາຜູ່ແທນລາດຊະດອນໂດຍໄວຫຼືບໍ,ຫຼື ພັກຮ່ວມລັດຖະບານ ຈະປະກາດຍຸບຕົວຍ້ອນສະພາບທີ່ບໍ່ໄປບໍ່ມາທາງການເມືອງ, ທັງຫມົດເຫຼົ່ານີ້ປະຈຸບັນລ້ວນແຕ່ຍັງບໍ່ທັນແນ່ນອນ, ສະຖານະການການເມືອງຂອງໄທ ຈະຂະຫຍາຍໄປສູ່ທິດໃດ, ຍັງຕ້ອງຕິດຕາມຕໍ່ໄປ.
ທ່ານຜູ່ຟັງທີ່ໂຄລົບ,ທີ່ຟັງມານັ້ນແມ່ນCRI ເຈາະຂ່າວທີ່ພາດຫົວເລື່ອງວ່າ: ການເຈລະຈາລະຫວ່າງລັດຖະບານໄທ ກັບກຸ່ມເສື້ອແດງສິ້ນສຸດລົງ,ສະຖານະການການເມືອງຕົກຢູ່ໃນສະພາບທີ່ຂັດແຍ່ງກັນຫນັກອີກ. ສະເຫນີໂດຍແກ້ວມະນີ.
