ຕອນບ່າຍວັນທີ 8 ເມສານີ້, ກອງປະຊຸມສຸດຍອດອາຊຽນຄັ້ງທີ16 ໄດ້ຈັດຂຶ້ນຢູ່ນະຄອນຫລວງຮາໂນຍຂອງຫວຽດນາມພາຍໃຕ້ຄຳຂວັນທີ່ວ່າ: " ກ້າວໄປສູ່ປະຊາຄົມອາຊຽນ ຈາກວິໄສທັດ ສູ່ການຈັດ ຕັ້ງປະຕິບັດຕົວຈິງ " .ປະເທດຕ່າງໆໃນອາຊຽນຈະຮ່ວມມືກັນເລັ່ງລັດບັນລຸເປົ້າຫມາຍທີ່ສ້າງຕັ້ງປະຊາຄົມອາຊຽນໃນປີ2015.
ເມື່ອຜູ່ນຳປະເທດຕ່າງໆໃນອາຊຽນໄດ້ເຕົ້າໂຮມກັນອີກເທື່ອຫນຶ່ງ, ສຽງເພງເສັ້ນທາງຂອງອາຊຽນກໍ່ດັງຂຶ້ນອີກ,ເຊິ່ງສະແດງໃຫ້ເຫັນວ່າກອງປະຊຸມສຸດຍອດອາຊຽນຄັ້ງທີ 16 ໄດ້ໄຂຂຶ້ນຢ່າງເປັນທາງການແລ້ວ.
ໃນພິທີໄຂກອງປະຊຸມ, ທ່ານຫງຽນເຕິນຢຸງ,ນາຍົກລັດຖະມນົຕີຫວຽດ ນາມທີ່ເປັນປະເທດປະທານຫມູນວຽນຂອງອາຊຽນໃນປີ 2010ກ່າວວ່າ,ປີ 2010 ມີຄວາມຫມາຍສຳຄັນຫລາຍຕໍ່ອາຊຽນ.ດ້ານຫນຶ່ງປະເທດຕ່າງໆໃນອາຊຽນມີຄວາມເຫັນໄປໃນແງ່ດີຕໍ່ເສດຖະກິດພາກພື້ນກໍ່ຄືທົ່ວໂລກຟື້ນຕົວຄືນ,ໂດຍສະເພາະແມ່ນອົງກອນເສດຖະກິດຕ່າງໆໃນອາຊຽນກໍ່ຟື້ນຕົວຄືນ,ອີກດ້ານຫນຶ່ງ,ການພັດທະນາຮອບດ້ານແບບຍືນຍົງຍັງຕ້ອງການເວລາທີ່ຍາວນານແລະທຳຄວາມພະຍາຍາມຢ່າງບໍ່ລົດລະ, ທິດທາງທີ່ຖືກຕ້ອງແລະມາດຕະການທີ່ແຂງແຮງກໍ່ຍິ່ງສຳຄັນເປັນພິເສດ.ໃນຂະນະດຽວກັນນີ້,ການປ່ຽນແປງຂອງດິນຟ້າອາກາດ, ໄພທຳມະຊາດ,ພະຍາດຕິດແປດແລະສິ່ງທ້າທາຍຕ່າງໆໃນທົ່ວໂລກຍັງມີຜົນກະທົບທາງລົບຢ່າງຫລວງຫລາຍຕໍ່ອາຊຽນ,ຍັງຕ້ອງການອາຊຽນທຳຄວາມພະຍາຍາມຫລາຍກວ່າເກົ່າແລະຮັບມືຢ່າງບັງເກີດຜົນ.ທ່ານກ່າວວ່າ:
"ສິ່ງສຳຄັນທີ່ສຸດສຳລັບບັນດາ(ປະເທດອາຊຽນ)ພວກເຮົາໃນສະເພາະໜ້ານີ້ແມ່ນຮ່ວມມືກັນ, ໃຊ້ບາດກ້າວແລະມາດຕະການແທ້ຈິງເພື່ອບັນລຸເປົ້າໝາຍແລະແຜນການທີ່ໄດ້ຈັດວາງໄວ້. ຄຳຂວັນສຳລັບອາຊຽນໃນໝົດປີນີ້ແມ່ນ" ກ້າວໄປສູ່ປະຊາຄົມອາຊຽນ ຈາກວິໄສທັດ ສູ່ການຈັດ ຕັ້ງປະຕິບັດຕົວຈິງ", ໄດ້ສະແດງໃຫ້ເຫັນເປົ້າໝາຍໃຈກາງຂອງອາຊຽນແລະຄວາມຫວັງທີ່ປະຕິບັດຕົວຈິງໃນອະນາຄົດຢ່າງແຂງແຮງ."
ທ່ານງຽວນເຕັນຢຸງກ່າວວ່າ, ໜ້າທີ່ສຳຄັນຂອງກອງປະຊຸມສຸດຍອດອາຊຽນຄັ້ງທີ 16 ແມ່ນເພື່ອເລັ່ງລັດຈັດວາງທິດທາງແລະມາດຕະການອັນເໝາະສົມເພື່ອເຮັດໃຫ້ອາຊຽນເຊື່ອມໂຍງເຂົ້າກັນ, ແລະເພີ່ມທະວີຄວາມສາມາດຂອງອາຊຽນໃນການຮັບມືກັບການທ້າທາຍຂອງພາກພື້ນແລະທົ່ວໂລກ. ເຖິງວ່າບັນດາປະເທດອາຊຽນໄດ້ຮັບຄວາມຄືບໜ້າສຳຄັນໃນດ້ານການປະຕິບັດ"ກົດບັດອາຊຽນ"ແລະປະຕິບັດ"ແຜນການເສັ້ນນທາງປະຊາຄົມອາຊຽນ", ແຕ່ຍັງມີວຽກງານຢ່າງຫຼວງຫຼາຍຕ້ອງເຮັດ. ທ່ານກ່າວວ່າ:
"ປະຈະບັນຕ້ອງການທຳຄວາມພະຍາຍາມຫຼາຍກວ່າເກົ່າເພື່ອເຮັດໃຫ້"ກົດບັດອາຊຽນ"ມີພະລັງຊີວິດ, ໂດຍສະເພາະແມ່ນເຮັດໃຫ້ກົດໝາຍທີ່ກ່ຽວຂ້ອງສົມບູນຂຶ້ນ, ປັບປຸງແລະເພີ່ມທະວີໃຫ້ອົງການຈັດຕັ້ງໃໝ່ແລະວິທີເຮັດວຽກຂອງອາຊຽນມີຜົນບັງຄັບໃຊ້."
ທ່ານງຽວນເຕິນຢຸງຍັງກ່າວເນັ້ນວ່າ, ການຟູ້ນຟູເສດຖະກິດແລະເສດຖະກິດພັດທະນາແບບຍືນຍົງຄວນເປັນຈຸດສຸມຂອງອາຊຽນກ່ອນ, ພ້ອມກັນນັ້ນກໍແມ່ນສິ່ງທີ່ປະຊາຄົມໂລກສົນໃຈນຳທີ່ສຸດ. ທ່ານກ່າວວ່າ:
"ຍ້ອນວ່າລະຫວ່າງອົງກອນເສດຖະກິດຕ່າງໆຂອງອາຊຽນມີການພົວພັນຢ່າງໃກ້ຊິດແລະອາໄສເຊິ່ງກັນແລະກັນ,ບັນດາປະເທດອາຊຽນຕ້ອງພັດທະນາດ້ວຍຈັງຫວະດຽວກັນຕາມສາມທິດດັ່ງນີ້ຄືອັນທີໜຶ່ງ,ເລັ່ງລັດຊຸກຍູ້ໃຫ້ເສດຖະກິດອາຊຽນເຊື່ອມໂຍງເຂົ້າກັນ,ຈໍ່ຕົວຂຶ້ນເປັນເບົ້າແບບທີ່ສອດຄ່ອງກັບການພັດທະນາແບບຍືນຍົງ;ອັນທີສອງແມ່ນເພີ່ມທະວີການຮ່ວມມືກັບອາຊີຕາເວັນອອກໃນດ້ານເສດຖະກິດແລະການທະນາຄານ,ໃນນັ້ນ,ອາຊຽນຕ້ອງຮັກສາຖານະແກນກາງຂອງຕົນ;ອັນທີສາມແມ່ນພ້ອມກັນທຳຄວາມພະຍາຍາມກັບປະຊາຄົມໂລກເພື່ອແກ້ໄຂບັນຫາທົ່ວໂລກ.
"ທ່ານຫງວຽນເຕິນຢຸງກ່າວວ່າ,ນອກຈາກເລັ່ງລັດຊຸກຍູ້ຂະບວນການເຊື່ອມໂຍງເຂົ້າກັນພາຍໃນອາຊຽນແລ້ວ,ອົງການຈັດຕັ້ງອາຊຽນຍັງຄວນເພີ່ມທະວີການພົວພັນກັບພາຍນອກຕື່ມອີກ,ເພື່ອສະແຫວງຫາການສະໜັບສະໜູນຫຼາຍກວ່າເກົ່າໃຫ້ການສ້າງສາປະຊາຄົມອາຊຽນ,ແລະຍົກຖານະໃນສາກົນຂອງອາຊຽນໃຫ້ສູງຂຶ້ນຢ່າງບໍ່ຢຸດຢັ້ງ.ດ້ວຍເຫດນີ້,ອາຊຽນຄວນເພີ່ມທະວີການຮ່ວມມືກັບຄູ່ສົນທະນາ,ໂດຍຜ່ານກົນໄກສົນທະນາລະດັບຜູ່ນຳແລະລະດັບລັດຖະມົນຕີກະຊວງ.ນອກນີ້,ລະດັບການຮ່ວມມືຂອງກົນໄກຕ່າງໆທີ່ຊຸກຍູ້ໂດຍອາຊຽນ ຄື:ອາຊຽນບວກ3,ກອງປະຊຸມສຸດຍອດອາຊີຕາເວັນອອກແລະເວທີປຶກສາຫາລືພາກພື້ນອາຊຽນເປັນຕົ້ນກໍ່ຄວນຍົກສູງຂຶ້ນຕື່ມອີກ.ຜູ່ນຳຂອງ9ປະເທດອາຊຽນນອກຈາກທ່ານອະພິສິດ ເວດຊາຊີວະ ນາຍົກລັດຖະມົນຕີໄທໄດ້ເຂົ້າຮ່ວມພິທີໄຂປະຊຸມ.
ໃນມື້ນັ້ນ,ທ່ານອະພິສິດໄດ້ປະກາດປະລະການເຂົ້າຮ່ວມປະ ຊຸມຍ້ອນການປະທ້ວງຕ້ານລັດຖະບານຂອງກຸ່ມເສື້ອແດງນັບມື້ນັບຮຸນແຮງ,ແລະໃຫ້ທ່ານກະສິດ ພິລົມ,ລັດຖະມົນຕີກະຊວງການຕ່າງປະເທດໄທຕາງໜ້າທ່ານເຂົ້າແທນ.ພາຍຫຼັງ ພິທີໄຂກອງປະຊຸມ,ຜູ່ນຳຂອງບັນດາປະເທດອາຊຽນໄດ້ຈັດກອງປະຊຸມຄົບຄະນະ.ກອງປະຊຸມສຸດຍອດຄັ້ງນີ້ຈະອັດລົງໃນຕອນບ່າຍວັນທີ9ເມສານີ້,ຄາດວ່າຈະອອກຖະແຫຼງການຮ່ວມກ່ຽວກັບການສ້າງສາເສດຖະກິດອາຊຽນຄືນໃໝ່,ການພັດທະນາແບບຍື່ນຍົງແລະການຮ່ວມກັນຮັບມືກັບການປ່ຽນແປງຂອງດິນຟ້າອາກາດ.
