ງານວາງສະແດງສິນຄ້າຈີນອາຊຽນສິ້ນສຸດລົງຢ່າງໄດ້ຮັບຜົນດີ
(GMT+08:00) 2010-11-26 09:44:34 cri
ງານວາງສະແດງສິນຄ້າຈີນອາຊຽນຄັ້ງທີ 7 ແລະກອງປະຊຸມສຸດຍອດ ທຸລະກິດແລະການລົງທຶນຈີນອາຊຽນທີ່ດຳເນີນເປັນເວາ 6 ວັນນັ້ນໄດ້ອັດລົງຢູ່ນະຄອນນານນິງຂອງເຂດກວາງຊີຂອງຈີນໃນວັນທີ 24 ຕຸລານີ້.ງານວາງສະແດງເທື່ອນີ້ມີຫົວຂໍ້ຫລັກວ່າ:ເຂດການຄ້າເສລີກັບໂອກາດໃຫມ່,ໄດ້ຈັດເວທີປຶກສາຫາລືລະດັບສູງໃນ 10 ຂະແຫນງການເຊັ່ນ:ພະລັງງານ, ກະສິກຳ,ການເງິນ, ກົດຫມາຍ,ພະລັງໄຟຟ້າ,ຫລຸດຜ່ອນຄວາມທຸກຍາກ,ແພດສາດແລະຄົມມະນາຄົມຂົນສົ່ງ.ນີ້ແມ່ນງານວາງສະແດງສິນຄ້າຈີນອາຊຽນຄັ້ງທຳອິດພາຍຫລັງໄດ້ສ້າງເຂດການຄ້າເສລີຈີນອາຊຽນສຳເລັດຢ່າງຮອບດ້ານໃນວັນທີ 1 ມັງກອນປີນີ້,ແລະຖືເປັນການທົດສອບເທື່ອຫນຶ່ງຕໍ່ຄວາມມີປະສິດທິຜົນຂອງເຂດການຄ້າເສລີຈີນອາຊຽນ.
ວັນທີ 1 ມັງກອນປີນີ້, ເຂດການຄ້າເສລີຈີນອາຊຽນທີ່ກວມປະຊາຊົນ 1 ຕື້ 900 ລ້ານຄົນໄດ້ສ້າງສຳເລັດຕາມເວລາກຳນົດ,ເຮັດໃຫ້ການຮ່ວມມືລະຫວ່າງຈີນກັບອາຊຽນໄດ້ເປີດສັງກາດໃຫມ່.ແຕ່ເດືອນມັງກອນຫາເດືອນສິງຫາປີນີ້,ມູນຄ່າການຄ້າລະຫວ່າງຈີນກັບອາຊຽນໄດ້ບັນລຸເຖິງ 185 ຕື້ 380 ລ້ານໂດລາ,ເພີ່ມຂຶ້ນຫລາຍກວ່າໄລຍະດຽວກັນຂອງປີກາຍ 47,2%,ອາຊຽນໄດ້ກາຍເປັນຕະ ຫລາດນຳເຂົ້າໃຫຍ່ອັນດັບສາມແລະຕະຫລາດສົ່ງອອກໃຫຍ່ອັນດັບທີສ່ຂອງຈີນແລ້ວ.ການຮ່ວມມືຢ່າງແຫນ້ນແຟ້ນລະຫວ່າງຈີນກັບອາຊຽນໄດ້ກາຍເປັນພະລັງແຮງຊຸກຍູ້ການພັດທະນາເສດຖະກິດພາກພື້ນອາຊີຕາເວັນອອກສຽງໃຕ້.
ໃນງານວາງສະແດງສິນຄ້າຈີນອາຊຽນຄັ້ງທີ 7 ເທື່ອນີ້ໄດ້ມີມູນຄ່າການຄ້າສິນຄ້າສູງກວ່າທຸກຄັ້ງທີ່ຜ່ານມາ, ມາຮອດເວລາ 16 ໂມງຂອງວັນທີ 24 ຕຸລານີ້,ຍອດມູນຄ່າສັນຍາການຄ້າບັນລຸເຖິງ 1 ຕື້ 712 ລ້ານໂດລາ,ເພີ່ມຂຶ້ນຫລາຍກວ່າປີກາຍ 3,5%.10 ປະເທດອາຊຽນລ້ວນແຕ່ໄດ້ສົ່ງວິສາຫະກິດຂອງຕົນໄປຮ່ວມງານ,ເຂດວາງສະແດງສິນຄ້າອາຊຽນໄດ້ກາຍເປັນຈຸດພົ້ນເດັ່ນຂອງງານເທື່ອນີ້.ຜູ່ຕາງຫນ້າປະເທດຕ່າງໆທີ່ຮ່ວມງານໄດ້ຕີລາຄາສູງຕໍ່ບົດບາດທີ່ເປັນເວທີແລກ ປ່ຽນຂອງງານວາງສະແດງສິນຄ້າຈີນອາຊຽນແລະກອງປະຊຸມສຸດຍອດທຸລະກິດແລະການລົງທຶນ.
ທ່ານລົງເດສ ເມດີລິນ,ປະທານສູນວາງສະແດງສິນຄ້າຂອງກະຊວງການຄ້າກັບອຸດສາຫະກຳຟິລິບປິນກ່າວວ່າ,ພວກເຮົານັບມື້ນັບຮັບຮູ້ເຖິງຄວາມສຳຄັນໃນການນຳໃຊ້ນະໂຍບາຍຢ່າງຖືກຕ້ອງ,ນະໂຍບາຍພິເສດຫລາຍຢ່າງຂອງເຂດການຄ້າເສລີພວມລໍຖ້າພວກເຮົາໄປຄົ້ນຄວ້າແລະນຳໃຊ້,ນີ້ຈະເກີດມີສະພາບທີ່ໄດ້ຜົນປະໂຫຍດທັງສອງຝ່າຍ.
ຍ້ອນໄດ້ຮັບຜົນຈາກໂອກາດການຄ້າໃນເຂດການຄ້າເສລີ,ປະເທດອາຊຽນຕ່າງໆກໍ່ໄດ້ເພີ່ມຂະຫນາດການເຂົ້າຮ່ວມງານວາງສະແດງສິນຄ້າຈີນອາຊຽນ,6 ປະເທດຄືລາວ,ອິນໂດເນເຊຍ,ມາເລເຊຍ,ມຽນມາ,ໄທແລະຫວຽດນາມໄດ້ມີຮ້ານໃຫຍ່ສະເພາະຂອງຕົນ,ເພື່ອວາງສະແດງສິນຄ້າທີ່ມີທ່າແຮງຂອງປະເທດຕົນ.ສ່ວນຟິລິບປິນກໍ່ໄດ້ຈັດເຂດວາງສະແດງສິນຄ້າຟິລິບປິນສະເພາະຂອງຕົນຄືກັນ,ແລະອົງການອຸດສາຫະກຳໄທຍັງໄດ້ຈັດງານການຄ້າສະເພາະສອງຮອບ.
ທ່ານຊີນິງໆ,ຮອງເລຂາທິການສະພາການຄ້າຈີນອາຊຽນກ່າວວ່າ, ເຖິງວ່າໄດ້ປະສົບກັບວິກິດການການເງິນທົ່ວໂລກ,ການຄ້າກັບຈີນຂອງປະເທດອາຊຽນບໍ່ຫນ້ອຍກໍ່ໄດ້ຮັກສາຄວາມເຕີບໂຕ,ນີ້ໄດ້ຢືນຢັນຢ່າງເຕັມສ່ວນວ່າຈີນ + ອາຊຽນມີພະລັງງານຢ່າງຫລວງຫລາຍ,ການຮ່ວມມືລະຫວ່າງຈີນກັບອາຊຽນຈະເຮັດໃຫ້ເສດຖະກິດສັງຄົມຂອງເຂດອາຊີຕາເວັນອອກສຽງໃຕ້ມີຄວາມຫມັ້ນຄົງໃນວິກິດການການເງິນ.
ທ່ານຢາງມູ້,ນັກຄົ້ນຄ້າຊັ້ນສູງຂອງສະຖາບັນອາຊີຕາເວັນອອກຂອງມະ ຫາວິທະຍາໄລແຫ່ງຊາດສິງກະໂປກ່າວວ່າ:"ຈີນກັບອາຊຽນພວມສ້າງອະນາຄົດທີ່ໄດ້ຮັບຜົນປະໂຫຍດຫລາຍຝ່າຍໂດຍຜ່ານການຮ່ວມກັນຊົມໃຊ້ໂອກາດແລະມີພັນທະຮ່ວມກັນ."ການສ້າງເຂດການຄ້າເສລີຈີນອາຊຽນສຳເລັດໄດ້ສ້າງໂອກາດຫລາຍກວ່າເກົ່າໃຫ້ແກ່ກາພັດທະນາຂອງພາກພື້ນ, ແລະຫລຸດຄວາມຜິດໂຕນກັນລະຫວ່າງຄວາມທຸກກັບຄວາມຮັ່ງໃນປະເທດທີ່ຕ່າງກັນ, ຊຸກຍູ້ການຄ້າກັບການລົງທຶນຂ້າມຊາດ,ແລະໄດ້ຊຸກຍູ້ການກໍ່ສ້າງເສດຖະກິດອາຊີຕາເວັນອອກໃຫ້ເປັນອັນຫນຶ່ງອັນດຽວກັນ.
ທ່ານບູດີໂຢໂນ,ຮອງປະທານາທິບໍດີອິນໂດເນເຊຍ,ທີ່ເປັນປະເທດກິຕິມະສັກໃນງານເທື່ອນີ້ກ່າວວ່າ:"ວິກິດການການເງິນສາກົນໄດ້ເພີ່ມທະວີການພົວພັນລະຫວ່າງຈີນກັບອາຊຽນ."ໃນຖານະເປັນອົງກອນເສດຖະກິດທີ່ພັດທະນາໄວທີ່ສຸດໃນໂລກ,ຈີນໄດ້ສ້າງໂອກາດຢ່າງຫລວງຫລາຍໄປໃຫ້ອາຊຽນ; ສ່ວນຄວາມຈະເລີນຮຸ່ງເຮືອງແລະຄວາມຫມັ້ນຄົງຂອງອາຊຽນກໍ່ມີຜົນດີຕໍ່ຈີນຄືກັນ,ມີແຕ່ສອງຝ່າຍຮ່ວມມືກັນ,ກໍ່ຈະກາຍເປັນພະລັງອັນແຂງແຮງທີ່ຊຸກຍູ້ໃຫ້ທົ່ວໂລກພັດທະນາ.
