ຕາມຂ່າວສານຊິນຮວາ: ຕອນບ່ອຍວັນທີ 10 ສິງຫານີ້, ກອງປະຊຸມລັດຖະມົນຕີການເງິນອາຊຽນຄັ້ງທີ 43 ໄດ້ຈັດຂຶ້ນຢູ່ເມືອງມານາໂດຂອງອິນໂດເນເຊຍ, ຫົວຂໍ້ຂອງກອງປະຊຸມເທື່ອນີ້ແມ່ນ"ປະຊາຄົມອາຊຽນໃນຂະບວນການໂລກາພິວັດ". ລັດຖະມົນຕີການເງິນ, ການຄ້າແລະການລົງທຶນຂອງ 10 ປະເທດອາຊຽນແລະປະເທດຄູ່ເຈລະຈາຂອງອາຊຽນຈະເຂົ້າຮ່ວມກອງປະຊຸມ.
ທ່ານໂປຕິໂອໂນ, ຮອງປະທານາທິບໍດີອິນໂດເນເຊຍເຊິ່ງເປັນປະເທດປະທານໝູນວຽນຂອງອາຊຽນໄດ້ເຂົ້າຮ່ວມພິທີໄຂປະຊຸມແລະກ່າວຄຳປາໄສ, ທ່ານກ່າວວ່າ, ບັນຫາໜີ້ສິນຂອງອາເມລິກາແລະລະດັບສິນເຊື່ອຂອງອາເມລິກາຖືກປັບຕ່ຳລົງແລະວິກິດການໜີ້ສິນຂອງເອີລົບທີ່ເກີດຂຶ້ນໃນຫວ່າງມໍ່ໆມານີ້ສະແດງໃຫ້ເຫັນວ່າອາເມລິກາແລະເອີລົບບໍ່ແມ່ນກຳລັງແຮງຕົ້ນຕໍທີ່ເຮັດໃຫ້ເສດຖະກິດໂລກເຕີບໂຕ, ແຕ່ໃນເວລາເສດຖະກິດໂລກປະເຊີນກັບປັດໄຈບໍ່ໝັ້ນທ່ຽງ, ເສດຖະກິດອາຊຽນຫາກພັດທະນາເປັນຢ່າງດີ.
ທ່ານກ່າວວ່າ, ບັນດາປະເທດອາຊຽນຄວນກຽມປັບປຸງນະໂຍບາຍແຫ່ງຊາດແລະນະໂຍບາຍພາກພື້ນໃນທຸກເວລາ, ເພີ່ມທະວີການຮ່ວມມືພາກພື້ນ, ຍຶດໝັ້ນພາກພື້ນເຊື່ອມໂຍງເຂົ້າກັນ, ຮັບປະກັນໃຫ້ເສດຖະກິດຂອງປະເທດອາຊຽນຕ່າງໆແລະພາກພື້ນອາຊຽນເຕີບໂຕຢ່າງດຸ່ນດ່ຽງ, ຍຸດຕິທຳແລະແບບຍືນຍົງ, ແລະບັນລຸການເພີ່ມທະວີຄວາມສາມາດແຂ່ງຂັນຂອງອົງກອນເສດຖະກິດອາຊຽນໃນຖານະເປັນອົງກອນດຽວ.
