ປະທານາທິບໍດີອິນໂດເນເຊຍກ່າວວ່າອິນໂດເນເຊຍສາມາດຮັບມືກັບສະຖານະການເສດຖະກິດໂລກເສື່ອມລົງ
(GMT+08:00) 2011-08-17 15:39:58 cri
ຕາມຂ່າວສານຈີນ: ວັນທີ 16 ສິງຫານີ້, ທ່ານຊູຊີໂລ ບຳບັງ, ປະທານາມິບໍດີອິນໂດເນເຊຍກ່າວປາຖະກະຖາໃນລັດຖະສະພາອິນໂດເນເຊຍວ່າ, ເຖິງວ່າວິກິດການໜີ້ສິນອາເມລິກາແລະເອີລົບຍັງມີຄວາມສັບສົນຢ່າງຕໍ່ເນື່ອງຢູ່ກໍຕາມ, ແຕ່ອິນໂດເນເຊຍມີຄວາມໝັ້ນໃຈໃນຕໍ່ການຮັບມືກັບສະຖານະການເສດຖະກິດໂລກເສື່ອມລົງ.
ທ່ານຊູຊີໂລບຳບັງກ່າວເນັ້ນວ່າ, ອິນໂດເນເຊຍໄດ້ວາງແຜນການແລະນະໂຍບາຍຫຼາຍຢ່າງເພື່ອຮັບມືກັບວິກິດການດັ່ງກ່າວແລ້ວຊຶ່ງນະໂຍບາຍທັງໝົດນັ້ນສາມາດປະຕິບັດໄດ້ທຸກເວລາ. ປະຈຸບັນເງິນເຟີ້ຂອງອິນໂດເນເຊຍໄດ້ຮັບການສະກັດກັ້ນແລ້ວ. ທ່ານເຫັນວ່າ, ເສດຖະກິດຂອງອິນໂດເນເຊຍສາມາດເຕີບໂຕ 6,6% ຫາ 7% ໃນປີ 2012.
ກະຊວງການຄ້າອິນໂດເນເຊຍກໍ່ກ່າວວ່າ, ຖ້າວ່າການສົ່ງອອກສິນຄ້າຂອງອິນໂດເນເຊຍບັນລຸຫຼາຍກວ່າ 200 ຕື້ໂດລາໃນປີ 2011, ກໍ່ສະແດງໃຫ້ເຫັນວ່າການສົ່ງອອກສິນຄ້າຂອງອິນໂດເນເຊຍສາມາດເພີ່ມຂຶ້ນໜຶ່ງເທົ່າພາຍໃນເວລາ 5 ປີ.
