ຕາມຂ່າວສານຊິນຮວາ: ວັນທີ 19 ສິງຫານີ້, ຢູ່ນະຄອນຫຼວງເນປີດໍ, ທ່ານອູເທນເຊນ ປະທານາທິບໍດີມຽນມາໄດ້ພົບປະນາງອັອງຊານຊູຈີ ຜູ່ນຳພັນທະມິດປະຊາທິປະໄຕແຫ່ງຊາດມຽນມາ. ນີ້ແມ່ນການພົບປະກັບນາງອັອງຊານຊູຈີ ຜູ່ນຳຝ່າຍຄ້ານເປັນເທື່ອທຳອິດ ນັບແຕ່ທ່ານອູເທນເຊນດຳລົງຕຳແໜ່ງເປັນປະທານາທິບໍດີໃນເດືອນມີນາປີນີ້ເປັນຕົ້ນມາ.
ການພົບປະໃຊ້ເວລາ 1 ຊົ່ວໂມງ,ໂດຍທີ່ສື່ມວນຊົນບໍ່ໄດ້ເຂົ້າຮ່ວມ. ເຈົ້າໜ້າທີ່ລັດຖະບານທີ່ບໍ່ປະສົງອອກນາມທ່ານໜຶ່ງກ່າວວ່າ, ການພົບປະແມ່ນດຳເນີນໄປດ້ວຍມີບັນຍາກາດທີ່ດີ ແລະ ເປັນການເປີດກວ້າງກວ່າເກົ່າ. ຫຼັງຈາກການພົບປະ, ທ່ານອູເທນເຊນໄດ້ແນະນຳພັນລະຍາ ແລະ ຄອບຄົວຂອງທ່ານຕໍ່ນາງອັອງຊານຊູຈີ. ຕອນຄ່ຳມື້ດຽວກັນ, ນາງອັອງຊານຊູຈີໄດ້ພັກຢູ່ນະຄອນຫຼວງເນປີດໍ.
ວັນທີ 20 ສິງຫານີ້, ສື່ມວນຊົນຫຼັກມຽນມາໄດ້ລາຍງານຂ່າວານພົນປະລະຫວ່າງທ່ານອູເທນເຊນກັບ ນາງອັອງຊານຊູຈີ. ຈາກວິດີໂອຂອງໂທລະພາບແຫ່ງຊາດມຽນມາສາມາດເຫັນໄດ້ວ່າ, ພາຍໃນຫ້ອງພົບປະປະດັບດ້ວຍຮູບພາບແຜ່ນໜຶ່ງເຊິ່ງເປັນຮູບບິດາຂອງນາງອັອງຊານຊູຈີ ເຊິ່ງເປັນຜູ່ນຳການເຄື່ອນໄຫວນຳເອົາຄວາມເປັນເອກະລາດມາສູ່ມຽນນາ, ໂທລະພາບແຫ່ງຊາດມຽນມາພັນລະນາເຖິງບັນຍາກາດການພົບປະຊຶ່ງເຕັມໄປດ້ວຍຄວາມເປັນມິດ. "ໜັງສືພິມແສງໃໝ່ມຽນມາ"ກ່າວວ່າ, ສອງຝ່າຍສະແຫວງຫາຫຼັກໝັ້ນຮ່ວມກັນເພື່ອແກ້ໄຂຂໍ້ຂັດແຍ່ງ ທີ່ຄົງຄ້າງ ເພື່ອນຳເອົາຜົນປະໂຫຍດອັນດີມາສູ່ປະເທດຊາດ ແລະ ປະຊາຊົນ.
ວັນທີ 20 ສິງຫານີ້, ນາງອັອງຊານຊູຈີກ່າວວ່າ, ການພົບປະກັບປະທານາທິບໍດີອູເທນເຊນເຮັດໃຫ້ທ່ານຮູ້ສຶກມີກຳລັງໃຈ.
