ທ່ານນາງຍິ່ງລັກຊິນນະວັດ ນາຍົກໄທປະກາດໂຄງຮ່າງບໍລິຫານທາງການເມືອງຂອງລັດຖະບານໃໝ່
(GMT+08:00) 2011-08-23 16:36:47 cri
ຕາມຂ່າວCRI,ວັນທີ23ສິງຫານີ້,ຢູ່ໃນກອງປະຊຸມຂອງສະພາຜູ່ແທນລາຊະດອນຂອງໄທ,ທ່ານນາງຍິ່ງລັກ ຊິນນະວັດ ນາຍົກລັດຖະມົນຕີໄທໄດ້ປະກາດໂຄງຮ່າງບໍລິຫານທາງການເມືອງຂອງລັດຖະບານໃໝ່ໂດຍກ່າວເນັ້ນວ່າລັດຖະບານໃໝ່ຈະຖືການພັດທະນາເສດຖະກິດແລະຊຸກຍູ້ຄວາມປອງດອງຊາດເປັນໜ້າທີ່ສຳຄັນທີ່ສຸດ.
ໂຄງຮ່າງບໍລິຫານທາງການເມືອງທີ່ທ່ານນາງຍິ່ງລັກປະກາດຢູ່ທີ່ກອງປະຊຸມຂອງສະພາຜູ່ແທນລາຊະດອນຂອງໄທໃນຕອນເຊົ້າວັນທີ23ສິງຫານີ້ມີເນື້ອໃນ8ດ້ານຄື: ບັນຫາທີ່ລັດຖະບານໃໝ່ຕ້ອງແກ້ໄຂຢ່າງຮີບດ່ວນໃນປີທຳອິດ,ນະໂຍບາຍຄວາມໝັ້ນຄົງຂອງຊາດ,ນະໂຍບາຍການພັດທະນາເສດຖະກິດ,ນະໂຍບາຍທາງສັງຄົມແລະຊີວິດການເປັນຢູ່ຂອງປະຊາຊົນ,ນະໂຍບາຍກ່ຽວກັບຊັບພະຍາກອນທີ່ດິນແລະສິ່ງແວດລ້ອມ,ນະໂຍບາຍກ່ຽວກັບການຄົ້ນຄວ້າພັດທະນາແລະປະດິດສ້າງໃໝ່ທາງດ້ານວິທະຍາສາດເຕັກໂນໂລຊີ,ນະໂຍບາຍການຕ່າງປະເທດແລະການຄ້າສາກົນແລະນະໂຍບາຍການຄຸ້ມຄອງບໍລິຫານວຽກງານພາຍໃນ.
ທ່ານນາງຍິ່ງລັກຊິນນະວັດກ່າວວ່າ,ປະຈຸບັນ,ປະເທດໄທພວມຢູ່ໃນໄລຍະບາດກ້າວຫົວລ້ຽວຫົວຕໍ່ອັນສຳຄັນ,ບໍ່ວ່າໃນດ້ານການເມືອງ,ເສດຖະກິດກໍ່ຄືອົງປະກອບຂອງປະຊາກອນລ້ວນແຕ່ຕ້ອງການປ່ຽນແປງແລະປັບປຸງຢ່າງຮີບດ່ວນ,ໂດຍສະເພາະແມ່ນຍ້ອນໄດ້ຮັບຜົນກະທົບຈາກວິກິດການເສດຖະກິດໂລກ,ເສດຖະກິດໄທທີ່ອາໃສການສົ່ງອອກຢ່າງຫຼວງຫຼາຍນັ້ນມີທ່າອ່ຽງຂະຫຍາຍຕົວໄປໃນທາງທີ່ບໍ່ດີປານໃດ,ລັດຖະບານຊຸດໃໝ່ຈະສຸມໃສ່ການບັນລຸໃຫ້ອົງປະກອບຂອງເສດຖະກິດພາຍໃນໃຫ້ສະໝ່ຳສະເໝີແລະສັງຄົມມີຄວາມສາມາຄີປອງດອງກົມກຽວກັນ,ແລະສືບຕໍ່ຊຸກຍູ້ ໃຫ້ອາຊຽນບັນລຸການເຊື່ອມໂຍງເຂົ້າກັນກ່ອນປີ2015.
