ໃນຕອນເຊົ້າຂອງວັນທີ 2 ກັນຍານີ້, ຢູ່ທີ່ກະຊວງການຕ່າງປະເທດລາວໄດ້ມີພິທີມອບ-ຮັບເງິນຊ່ວຍເຫຼືອຈາກອົງການກາແດງສາທາລະນະລັດປະຊາຊົນຈີນຈຳນວນ 3 ໝື່ນໂດລາສະຫະລັດໃຫ້ແກ່ອົງການກາແດງສາທາລະນະລັດປະຊາທິປະໄຕປະຊາຊົນລາວ, ເພື່ອນຳໄປຊ່ວຍເຫຼືອປະຊາຊົນບັນດາເຜົ່າຢູ່ທາງພາກພາງແລະພາກເໜືອທີ່ໄດ້ຮັບຜົນກະທົບຈາກໄພພິບັດພະຍຸຮາຍມາຢ່າງຮ້າຍແຮງຕໍ່ຊີວິດຊັບສິນແລະໂຄງຮ່າງພື້ນຖານການຜະລິດຂອງປະຊາຊົນ.
ຕາງໜ້າຝ່າຍຈີນກ່າວມອບໂດຍທ່ານນາງປູ່ຈຽນກົວ, ເອກອັກຄະລັດຖະທູດຈີນປະຈຳລາວແລະຕາງໜ້າຝ່າຍລາວກ່າວຮັບໂດຍທ່ານນາງສູນທອນ ໄຊຍະຈັກ, ລັດຖະມົນຕີຊ່ວຍວ່າການກະຊວງການຕ່າງປະເທດ, ຮອງຫົວໜ້າຄະນະພົວພັນຕ່າງປະເທດສູນກາງພັກ. ໂດຍມີພະນັກງານຈາກກະຊວງການຕ່າງປະເທດແລະສະຖານທູດສ.ປ.ຈີນເຂົ້າຮ່ວມຈຳນວນໜຶ່ງ.
ໃນພິທີດັ່ງກ່າວທ່ານນາງປູ່ຈຽນກົວ, ເອກອັກຄະລັດຖະທູດຈີນປະຈຳລາວກໍໄດ້ຕາງໜ້າໃຫ້ລັດຖະບານຈີນ, ສະແດງຄວາມເປັນຫ່ວງເປັນໃຍຕໍ່ປະຊາຊົນລາວທີ່ໄດ້ຮັບຜົນກະທົບຈາກໄພພິບັດພະຍຸຮາຍມາ, ພ້ອມນັ້ນທ່ານກໍຍັງຍົກໃຫ້ເຫັນສາຍພົວພັນມິດຕະພາບຈີນ-ລາວທີ່ນັບມື້ນັບແໜ້ນແຟ້ນຂຶ້ນແລະທ່ານຍັງກ່າວຕື່ມວ່າ:"ພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ, ລັດຖະບານລາວຈະສາມາດຟື້ນຟູຊີວິດການເປັນຢູ່ຂອງປະຊາຊົນໃຫ້ດີຂຶ້ນຢ່າງແນ່ນອນ. ແລະລັດຖະບານສ.ປ.ຈີນຈະສືບຕໍ່ໃຫ້ການຊ່ວຍເຫຼືອລັດຖະບານລາວກໍຄືປະຊາຊົນລາວຕື່ມອີກ"
ໃນຂະນະດຽວກັນນີ້, ທ່ານນາງສູນທອນ ໄຊຍະຈັກ, ລັດຖະມົນຕີຊ່ວຍວ່າການກະຊວງການຕ່າງປະເທດ, ຮອງຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວກໍໄດ້ສະແດງຄວາມຂອບໃຈເປັນຢ່າງຍິ່ງຕໍ່ຄວາມເປັນຫ່ວງເປັນໃຍຈາກລັດຖະບານຈີນກໍຄືອົງການກາແດງຈີນແລະໄດ້ສົ່ງຈົດໝາຍຂອບໃຈໃຫ້ແກ່ອົງການກາແດງຈີນອີກດ້ວຍ.
