ຫວ່າງມໍ່ໆນີ້,ໃນບົດລາຍງານການປະຕິບັດນະໂຍບາຍຂອງລັດຖະບານຊຸດໃໝ່ຂອງໄທທີ່ນຳໂດຍທ່ານນາງຍິ່ງລັກ ຊິນນະວັດນາຍົກລັດຖະມົນຕີໄທກ່າວວ່າ, ລັດຖະບານຊຸດໃໝ່ຈະປະຕິບັດ"ໂຄງການຮັບປະກັນລາຍຮັບຊາວກະສິກອນ"ໂດຍໄວ, ລາຄາຕ່ຳສຸດທີ່ປ້ອງກັນເຂົ້າສານທຳມະດາແມ່ນ 1 ໝື່ນ 5 ພັນບາດຕໍ່ໂຕນ, ເຂົ້າຫອມມະລິຄຸນນະພາບດີແມ່ນ 2 ໝື່ນບາດຕໍ່ໂຕນ. ລາຄາດັ່ງກ່າວສູງກວ່າລາຄາຕະຫຼາດໃນປັດຈຸບັນປະມານ 40%. ໃນຖານະທີ່ເປັນປະເທດສົ່ງອອກເຂົ້າສານຫຼາຍທີ່ສຸດໃນໂລກ, ນະໂຍບາຍໃໝ່ທາງດ້ານເຂົ້າສານຂອງໄທເຮັດໃຫ້ຕະຫຼາດສາກົນມີຄວາມສົນໃຈໃນລະດັບສູງ.
ກ່ຽວກັບນະໂຍບາຍລາຄາປ້ອງກັນເຂົ້າສານຂອງລັດຖະບານໄທ, ວົງການຕ່າງໆຂອງໄທກໍ່ມີຄວາມເຫັນແຕກຕ່າງກັນ. ພັກກຳອຳນາດກ່າວເນັ້ນວ່າ, ການກະທຳນີ້ແມ່ນເພື່ອຫຼຸດຜ່ອນຄວາມຫຍຸ້ງຍາກຂອງຊາວກະສິກອນ. ແຕ່ນະໂຍບາຍໃໝ່ຕ້ອງການເງິນທຶນຈຳນວນຫຼວງຫຼາຍ, ລັດຖະບານເຂົ້າແຊກແຊງລາຄາເຂົ້າໃນຕະຫຼາດແລ້ວຈະສາມາດໄດ້ຮັບຜົນຕາມຄາດໝາຍຫຼືບໍ່ກໍ່ຍັງທັນແມ່ນອນເທື່ອ, ສະນັ້ນ, ພັກຝ່າຍຄ້ານທີ່ນຳໂດຍພັກປະຊາທິປັດໄດ້ຄັດຄ້ານນະໂຍບາຍໃໝ່ຂອງລັດຖະບານ.
ວົງການສົ່ງອອກເຂົ້າສານຂອງໄທເຫັນວ່າ, ນະໂຍບາຍໃໝ່ຈະຍົກສູງລາຄາເຂົ້າສານພາຍໃນໄທ 25%. ນັກວິເຄາະເຫັນວ່າ, ໄລຍະເຂົ້າສານລາຄາຕ່ຳທີ່ 400 – 500 ໂດລາຕໍ່ໂຕນຂອງໄທໄດ້ສິ້ນສຸດລົງແລ້ວ, ລາຄາໃນອະນາຄົດອາດຈະຍົກສູງເຖິງ 700-800 ໂດລາຕໍ່ໂຕນ.
ຕົວເລກນີ້ສະແດງໃຫ້ເຫັນວ່າ, ປີ2010 ປະລິມານສົ່ງອອກເຂົ້າສານຂອງໄທແມ່ນ 9 ລ້ານ 5 ໝື່ນໂຕນ, ຄາດວ່າປີ2011ຈະບັນລຸ 10 ລ້ານໂຕນ. ນະໂຍບາຍໃໝ່ດ້ານເຂົ້າສານຂອງໄທບໍ່ພຽງແຕ່ເຮັດໃຫ້ລາຄາເຂົ້າສານຂອງໄທຍົກສູງຂຶ້ນເທົ່ານັ້ນ, ຍັງຈະສົ່ງຜົນສະທ້ອນຕໍ່ລາຄາເຂົ້າສານທົ່ວໂລກ. ນັກເສດຖະສາດຈຳນວນໜຶ່ງເປັນຫ່ວງວ່າ, ຍ້ອນວ່າອາຊີບໍລິໂພກເຂົ້າສານກວມເຖິງ 87% ໃນທົ່ວໂລກ, ນະໂຍບາຍໃໝ່ດ້ານເຂົ້າສານຂອງໄທອາດຈະເຮັດໃຫ້ກຳລັງກົດດັນທີ່ອາຊີຈະເກີດມີໄພເງິນເຟີ້ນັ້ນເພິ່ມຂຶ້ນຫຼາຍກວ່າເກົ່າ. ແຕ່ວ່າ, ເຈົ້າໜ້າທີ່ຂອງອົງການອາຫານ ແລະ ກະເສດສະຫະປະຊາຊາດ ຫຼື FAO ປະຈຳພາກພື້ນອາຊີ-ປາຊີຟິກເຫັນວ່າ, ລາຄາເຂົ້າສານໄທຍົກສູງຂຶ້ນ, ໃນດ້ານໜຶ່ງຈະເປັນການຊຸກຍູ້ໃຫ້ປະເທດສົ່ງອອກເຂົ້າສານອື່ນໆເພິ່ມການຜະລິດຂຶ້ນ, ໃນອີກດ້ານໜຶ່ງ, ຜູ່ບໍລິໂພກຈະຫັນປ່ຽນໄປສູ່ອາຫານທົດແທນຊະນິດຕ່າງໆ ເຊັ່ນ, ເຂົ້າບາເລ ແລະ ເຂົ້າສາລີ.
ກະຊວງກະສິກຳອາເມລິກາຄາດຄະເນໃນຫວ່າງມໍ່ໆນີ້ວ່າ, ຍ້ອນໄດ້ຮັບຜົນສະທ້ອນຈາກສະພາບອາກາດທີ່ຮ້າຍແຮງ, ປະລິມານການຜະລິດ ແລະ ສົ່ງອອກເຂົ້າສານອາເມລິກາອາດຈະຫຼຸດລົງໃນລະດັບໃດໜຶ່ງ. ແຕ່ນັກວິເຄາະການຕະຫຼາດຊີ້ອອກວ່າ, ຍ້ອນວ່າເຂດຜະລິດເຂົ້າສານຕົ້ນຕໍ່ອື່ນໆ ເຊັ່ນ,ອິນໂດເນເຊຍ, ກຳປູເຈຍ, ຟິລິບິນ,ມຽນມາ, ອິນເດຍ ແລະ ປາກິສະຖານມີດິນຟ້າອາກາດດີຫຼາຍ, ຖ້າປະລິມານຜະລິດເຂົ້າສານຂອງຫວຽດນາມ ແລະ ໄທຮັກສາໄດ້ລະດັບການຜະລິດທີ່ມີຄວາມໝັ້ນຄົງ, ປະລິມານສະໜອງເຂົ້າສານທົ່ວໂລກໃນປີນີ້ອາດຈະເພິ່ມຂຶ້ນ 1%ເຊິ່ງຈະມີຜົນດີການຮັກສາຄວາມໝັ້ນຄົງຂອງລາຄາເຂົ້າສານສາກົນ.
