ຕາມຂ່າວສານຈີນ: ວັນທີ 6 ກັນຍານີ້, ພັກປະຊາທິປັດຂອງໄທໄດ້ປະກາດສ້າງຕັ້ງຄະນະລັດຖະບານເງົາຂຶ້ນ, ເພື່ອຕິດຕາມກວດກາສະພາບການປະຕິບັດວຽກງານຂອງລັດຖະບານຮ່ວມທີ່ນຳໂດຍພັກເພື່ອໄທຢ່າງໃກ້ຊິດ.
ທ່ານອະພິສິດ ເວດຊາຊິວະ ປະທານພັກປະຊາທິປັດ, ອະດີດນາຍົກລັດຖະມົນຕີໄທມີຕຳແໜ່ງເປັນນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນຊາດໃນຄະນະລັດຖະບານເງົານີ້, ເພື່ອຕິດຕາມກວດກາສະພາບການປະຕິບັດວຽກງານຂອງທ່ານນາງຍິ່ງລັກ ຊີນນະວັດ ນາຍົກລັດຖະມົນຕີໄທ ແລະ ທ່ານຍຸດທະສັກ ສັກປຣະພາ ລັດຖະມົນຕີວ່າການກະຊວງປ້ອງກັນຊາດໄທ.
ຄະນະລັດຖະບານເງົາຂອງພັກປະຊາທິປັດໄດ້ຈັດວາງຮອງນາຍົກລັດຖະມົນຕີ 3 ຄົນ, ເພື່ອຕິດຕາມກວດກາການປະຕິບັດວຽກງານຂອງຮອງນາຍົກລັດຖະມົນຕີ 4 ຄົນໃນລັດຖະບານຊຸດປັດຈຸບັນ, ຍັງມີລັດຖະມົນຕີເງົາ 20 ຄົນ ເຊິ່ງລວມທັງລັດຖະມົນຕີທຳນຽບລັດຖະບານ.
