ທ່ານຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງສປປລາວເດີນທາງໄປຮອດນະຄອນຫຼວງພຽງຢາງເພື່ອຢ້ຽມຢາມສປປເກົາຫຼີ
(GMT+08:00) 2011-09-22 16:37:57 cri
ຕາມຂ່າວສານຊິນຮວາລາຍງານວ່າ,ໂດຍຕອບສະໜອງຕາມຄຳເຊີນຂອງທ່ານກິ່ມເຈີ່ງອິ່ນ ເລຂາທິການໃຫຍ່ພັກແຮງງານເກົາຫຼີ ປະທານຄະນະກຳມະການປ້ອງກັນປະເທດສປປເກົາຫຼີ,ທ່ານຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງສປປລາວເດີນທາງດ້ວຍຖ້ຽວບິນພິເສດໄປຮອດສະໜາມບິນສາກົນຊູນອັນນະຄອນຫຼວງພຽງຢາງໃນວັນທີ21ກັນຍານີ້ຊຶ່ງເປັນການເລີ່ມຕົ້ນການຢ້ຽມຢາມສັນຖະວະໄມຕີສປປເກົາຫຼີຢ່າງເປັນທາງການ.
ຢູ່ສະໜາມບິນໄດ້ຈັດພິທີຕ້ອນຮັບຢ່າງ ສົມກຽດ,ຜູ່ນຳພັກແລະລັດແຫ່ງສປປເກົາຫຼີເຊັ່ນທ່ານກິ່ມຢົງນາມ ປະທານຄະນະກຳມະການປະຈຳສະພາປະຊາຊົນສູງສຸດສປປເກົາຫຼີໄດ້ອອກຕ້ອນຮັບຢູ່ທີ່ສະໜາມບິນ,ປະຊາຊົນນະຄອນຫຼວງພຽງຢາງຖືຊໍ່ດອກໄມ້ຕ້ອນຮັບບັນດາແຂກຜູ່ມີກຽດຈາກປະເທດລາວ.ພາຍຫຼັງເຄົາລົບທຸງຊາດດ້ວຍການບັນເລັງເພງຊາດທັງສອງປະເທດຈາກກອງດຸລິຍາງກອງທັບປະຊາຊົນສປປເກົາຫຼີແລ້ວ,ທ່ານຈູມມາລີ ໄຊຍະສອນໄດ້ກວດແຖວກອງກຽດຕິຍົດຂອງກອງທັບປະຊາຊົນສປປເກົາຫຼີພາຍໃຕ້ການເປັນເພື່ອນຮ່ວມຂອງທ່ານກິ່ມຢົງນາມ.
ຕາມເຈົ້າໜ້າທີ່ກະຊວງການຕ່າງປະເທດສປປເກົາຫຼີແຈ້ງວ່າ,ໃນໄລຍະຢ້ຽມຢາມນັ້ນ,ທ່ານຈູມມາລີ ໄຊຍະສອນຈະພົບປະກັບຜູ່ນຳສປປເກົາຫຼີແລະດຳເນີນການຢ້ຽມຢາມສະຖານທີ່ສຳຄັນຕ່າງໆຈຳນວນໜຶ່ງ,ຄາດວ່າຈະສິ້ນສຸດການຢ້ຽມຢາມແລ້ວອອກຈາກພຽງຢາງໃນວັນທີ23ກັນຍານີ້.
ໜັງສືພິມໂລດົງຊິມມູນ ສຽງຂອງສູນກາງພັກແຮງງານເກົາຫຼີໄດ້ລົງພິມບົດນຳໃນໜ້າທຳອິດພາຍໃຕ້ຫົວຂໍ້ວ່າ:ທູດມິດຕະພາບຂອງປະຊາຊົນລາວ,ໂດຍຂຽນວ່າ,ປະຈຸບັນ,ສະພາບແວດລ້ອມທັງພາຍໃນແລະພາຍນອກຂອງສປປເກົາຫຼີດີຫຼາຍ,ການຢ້ຽມຢາມສປປເກົາຫຼີຂອງທ່ານຈູມມາລີໄຊຍະສອນຈະເປັນເຫດການທີ່ມີຄວາມໝາຍປະຫວັດສາດທີ່ຊຸກຍູ້ການພົວພັນຮ່ວມມືແລະມິດຕະພາບອັນເປັນມູນເຊື້ອລະຫວ່າງປະຊາຊົນສອງຊາດໃຫ້ກ້າວໄປສູ່ໄລຍະໃໝ່.
