ຕາມຂ່າວCRI: ວັນທີ 24 ກັນຍານີ້, ເຈົ້າໜ້າທີ່ຊັ້ນສູງຂອງລັດຖະບານ ພ້ອມດ້ວຍສະມາຊິກສະພາແຫ່ງຊາດໄທ ແລະ ກຳປູເຈຍໄດ້ຈັດການແຂ່ງຂັນເຕະບານມິດຕະພາບຢູ່ນະຄອນຫຼວງພະນົມເປັນຂອງກຳປູເຈຍ, ເພື່ອເປັນການເລິ່ມຕົ້ນບາດກ້າວໃໝ່ໃນການປັບປຸງຟື້ນຟູການພົວພັນລະຫວ່າງສອງປະເທດໃຫ້ດີຂຶ້ນ.
ໃນການແຂ່ງຂັນເຕະບານມິດຕະພາບລະຫວ່າງເຈົ້າໜ້າທີ່ຂັ້ນສູງລະຫວ່າງກຳປູເຈຍ-ໄທທີ່ຈັດຂຶ້ນຢູ່ສະໜາມກິລາໂອລິມປິກພະນົມເປັນ, ທ່ານຮຸນແຊນ ນາຍົກລັດຖະມົນຕີກຳປູເຈຍລົງສະໜາມດ້ວຍການໃສ່ເສື້ອສີແດງທີ່ມີຕົວເລກໂຕ 9ໄດ້ ນຳພາທິມAທີ່ປະກອບດ້ວຍເຈົ້າໜ້າທີ່ສອງປະເທດ 11 ຄົນເອົາຊະນະທິມBທີ່ປະກອບດ້ວຍເຈົ້າໜ້າທີ່ສອງປະເທດເຊັ່ນດຽວກັນ ເຊິ່ງນຳພາໂດຍທ່ານສົມຊາຍ ວົງສະຫວັດ ອະດີດນາຍົກລັດຖະມົນຕີໄທໄປເຖິງ 10 ຕໍ່ 7. ໃນນັ້ນ,ທ່ານຮຸນແຊນເຕະບານເຂົ້າປະຕູຂອງທິມBເຖິງ 4 ລູກ, ໃນນັ້ນ 1 ພັນກວ່າຄົນແມ່ນຜູ່ສະໜັບສະໜູນ"ກຸ່ມເສື້ອແດງ"ທີ່ເດີນທາງໄປຈາກປະເທດໄທ.
ເຖິງວ່າໃນເດືອນກຸມພາ ແລະ ເດືອນເມສາປີນີ້, ໄທ ກັບ ກຳປູເຈຍໄດ້ເກີດການປະທະກັນຢ່າງຮຸນແຮງຫຼາຍເທື່ອຍ້ອນບັນຫາຊາຍແດນ, ເຮັດໃຫ້ຫຼາຍຄົນເສຍຊີວິດ ແລະ ບາດເຈັບກໍຕາມ, ແຕ່ຫັຼງຈາກລັດຖະບານພັກເພື່ອໄທທີ່ນຳພາໂດຍນາງຍິ່ງລັກ ຊີນນະວັດຂຶ້ນກຳອຳນາດແລ້ວ, ການພົວພັນລະຫວ່າງໄທ ກັບ ກຳປູເຈຍໄດ້ຮັບການຟື້ນຟູຄືນຢ່າງວ່ອງໄວ. ນັບແຕ່ກາງເເດືອນກັນຍານີ້ເປັນຕົ້ນມາ, ເຈົ້າໜ້າທີ່ຂັ້ນສູງສອງປະເທດໄດ້ໄປມາຫາສ່ກັນູເລື້ອຍໆ, ຈາກທ່ານນາງຍິ່ງລັກຊີນນະວັດຢ້ຽມຢາມກຳປູເຈຍ, ຮອດທ່ານທັດສິນ ຊີນນະວັດ ອ້າຍຂອງທ່ານນາງຍິ່ງລັກ ທັງເປັນອະດີດນາຍົກລັດຖະມົນຕີໄທຢ້ຽມຢາມກຳປູເຈຍ,ແລະຮອດການແຂ່ງຂັນເຕະບານມິດຕະພາບທີ່ຫາກໍ່ສິ້ນສຸດລົງນັ້ນ,ລ້ວນແຕ່ສະແດງໃຫ້ເຫັນຜົນສະທ້ອນອັນດີທີ່ສຳຄັນຕໍ່ການຟື້ນຟູການພົວພັນລະຫວ່າງສອງປະເທດຫຼັງຈາກກຳລັງທ່ານທັກສິນກັບຄືນວົງການທາງການເມືອງ
ນອກນີ້, ສະພາບແຂງກະດ້າງຂອງການເຈລະຈາກ່ຽວກັບບັນຫາຊາຍແດນລະຫວ່າງສອງປະເທດກໍ່ໄດ້ຮັບການລຸລັ່ງຢ່າງແທ້ຈິງ. ວັນທີ 23 ກັນຍານີ້, ຢູ່ນະຄອນຫຼວງພະນົມເປັນ, ທ່ານເຕຍບັນ ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງປ້ອງກັນຊາດກຳປູເຈຍ ແລະ ພົນເອກ ຍຸດທະສັກ ສະສິປຣະພາ ລັດຖະມົນຕີວ່າການກະຊວງປ້ອງກັນຊາດໄທກ່າວວ່າ, ສອງຝ່າຍຈະເຄົາລົບການຕັດສິນຂອງສານສາກົນລາໄຮແຫ່ງໂຮນລັງ, ຖອນທະຫານອອກຈາກເຂດທີ່ມີຂໍ້ພິພາດເຊິ່ງໃກ້ກັບຜາສາດແປຣວິເຮຍທີ່ຢູ່ຊາຍແດນລະຫວ່າງສອງປະເທດ.
ນັກວິເຄາະເຫັນວ່າ, ທ່ວງທ່າຂອງການພົວພັນໄທ-ກຳປູເຈຍດີຂຶ້ນໃນຫວ່າງມໍ່ໆນີ້ຍັງແມ່ນອາໄສນຳການພົວພັນທາງບຸກຄົນລະຫວ່າງທ່ານທັກສິນ ຊິນນະວັດ ອະດີດນາຍົກລັດຖະມົນຕີໄທ ກັບ ທ່ານຮຸນແຊນ ນາຍົກລັດຖະມົນຕີກຳປູເຈຍໃນລະດັບສູງສົມຄວນ, ຕາບໃດຫາກອົງການອຳນາດການປົກຄອງທີ່ນິຍົມທັກສິນຖືກໂຄ່ນລົ້ມ່ແລ້ວ, ອະນາຄົດຂອງບັນຫາຊາຍແດນລະຫວ່າງສອງປະເທດກຳປູເຈຍ-ໄທຍັງບໍ່ສາມາດຄາດຄະເນໄດ້.
