ຕາມຂ່າວສານຈີນ: ຕອນຄ່ຳວັນທີ 27 ກັນຍານີ້, ທ່ານໂຢຊິຮິໂກະ ໂນດະ ນາຍົກລັດຖະມົນຕີຍີ່ປຸ່ນໄດ້ເຈລະຈາກັບທ່ານອະກີໂນ ປະທານາທິບໍດີຟິລິບປິນທີ່ໄປຢ້ຽມຢາມຍີ່ປຸ່ນ. ຫຼັງຈາກການເຈລະຈາ, ສອງຝ່າຍໄດ້ອອກຖະແຫຼງການຮ່ວມໂດຍກ່າວວ່າ, "ທະເລຈີນໃຕ້ມີສັນຕິພາບ ແລະ ສະຖຽນລະພາບແມ່ນບັນຫາສຳຄັນທີ່ສຸດ,ເຄົາລົບຫຼັກມາດຖານສາກົນໃນດ້ານເດີນເຮືອຢ່າງເສລີ ແລະ ແກ້ໄຂຂໍ້ຂັດແຍ່ງໂດຍສັນຕິຈະມີຜົນດີຕໍ່ທົ່ວພາກພື້ນ".
ທ່ານໂຢຊິຮິໂກ ໂນດາກ່າວວ່າ, ຍີ່ປຸ່ນກັບຟິລິປິນມີທັດສະນະຄຸນຄ່າພື້ນຖານ ແລະ ຜົນປະໂຫຍດຍຸດທະສາດຮ່ວມ, ຫວັງໃຫ້ສອງຝ່າຍຮັດແໜ້ນການຮ່ວມມືໃນຂອບການຮ່ວມມືພາກພື້ນ, ປະກອບສ່ວນເຂົ້າໃນສະຖຽນລະພາບ ແລະ ຄວາມຈະເລີນຂອງພາກພື້ນ. ທ່ານອະກີໂນກ່າວເນັ້ນວ່າ, ຫວັງໃຫ້ສອງຝ່າຍເພິ່ມທະວີການຮ່ວມມືຢ່າງຮອບດ້ານໃນດ້ານຮັບປະກັນ ແລະ ປ້ອງກັນຄວາມປອດໄພທາງທະເລ.
ນອກນີ້, ສອງຝ່າຍຍັງໄດ້ມີຄວາມຮັບຮູ້ຄືກັນຫຼາຍຂໍ້ ເຊັ່ນ,ຍົກສູງລະດັບການຫາລືນະໂຍບາຍສອງປະເທດຂັ້ນລັດຖະມົນຕີຊ່ວຍວ່າການເປັນການສົນທະນາຍຸດທະສາດ, ກົມປ້ອງກັນຄວາມສະຫງົບເທິງທະເລຍີ່ປຸ່ນສະໜັບສະໜູນກອງຕຳຫຼວດແຄມຝັ່ງທະເລຟິລິບປິນໃນການຍົກສູງຄວາມສາມາດ, ພ້ອມທັງຊຸກຍູ້ການແລກປ່ຽນລະຫວ່າງເຈົ້າໜ້າທີ່ປ້ອງກັນຄວາມສະຫງົບຂອງສອງປະເທດເປັນຕົ້ນ.ນອກນີ້, ຖະແຫຼງການຮ່ວມຍັງສະເໜີອອກມາວ່າ, ໃນຖານະທີ່ເປັນປະເທດພັນທະມິດຂອງອາເມລິກາ,ຍີ່ປຸ່ນ ກັບ ຟິລິປິນຈະສືບຕໍ່ຮ່ວມມືກັນຢ່າງໃກ້ຊິດໃນກອງປະຊຸມສຸດຍອດອາຊີຕາເວັນອອກທີ່ຈະຈັດຂຶ້ນຢູ່ອິນໂດເນເຊຍໃນເດືອນພະຈິກປີນີ້.
