ການຄ້າຂາອອກຂອງອາຊຽນມີຄວາມເພິ່ງພາອາໃສນຳອາເມລິກາຫນ້ອຍລົງ
(GMT+08:00) 2011-09-30 18:02:04 cri
ຫວ່າງມໍ່ໆນີ້,ນັກຂ່າວໄດ້ລົງເຄື່ອນໄຫວສຳຫລວດຢູ່ຕະຫລາດສິນຄ້າຂາອອກຂອງປະເທດຕ່າງໆໃນອາຊຽນ,ຜູ່ຊ່ຽວຊານທີ່ຖືກສຳພາດຈຳນວນຫນຶ່ງເຫັນວ່າ:ປະເທດທີ່ເປັນຕະຫລາດຈະເລີນໃຫມ່ຂອງອາຊີປາຊິກຟິກເມື່ອໄດ້ຜ່ານຜ່າວິກິດການທາງດ້ານເສດຖະກິດເຖິງສອງເທື່ອໃນປີ 1997 ແລະປີ 2008 ແລ້ວ, ໂຄງປະກອບທາງດ້ານການຄ້າຕໍ່ຕ່າງປະເທດມີຄວາມດຸນດ່ຽງຫລາຍຂຶ້ນ, ການຄ້າການລົງທຶນພາຍໃນປະເທດສົດໃສຂຶ້ນກວ່າເກົ່າ, ໄດ້ດຶງດູດການລົງທຶນຈາກຕ່າງປະເທດຫລາຍຂຶ້ນ. ເວລາຕໍ່ມາ,ປັດໄຈເຫລົ່ານີ້ໄດ້ເຮັດໃຫ້ປະເທດທີ່ເປັນຕະຫລາດຈະເລີນໃຫມ່ຂອງອາຊີມີຄວາມສາມາດຕ້ານກັບຄວາມສ່ຽງຫລາຍຂຶ້ນ, ແລະໄດ້ປ່ຽນແປງຖານະຍຸດທະສາດຂອງອາຊຽນໃນເຂດອາຊີປາຊິກຟິກກໍ່ຄືທົ່ວໂລກ.
ບົດລາຍງານທີ່ສຳນັກງານເລຂາອາຊຽນເປີດເຜີຍໃນເດືອນນີ້ມີຄວາມເຫັນໄປໃນແງ່ດີວ່າ: ໂດຍມີການຄ້າສິນຄ້າຂາອອກແລະຄວາມຕ້ອງການພາຍໃນປະເທດເປັນການຊັກນຳ, ເສດຖະກິດຂອງອາຊຽນໄດ້ຟື້ນຕົວຄືນໃຫມ່. ການຄ້າສິນຄ້າລວມຂອງອາຊຽນໄດ້ເພີ່ມຂຶ້ນ 32,9%, ການລົງທຶນໂດຍກົງຂອງຕ່າງປະເທດບັນລຸ 75 ຕື້ 800 ລ້ານໂດລາ, ເພີ່ມຂຶ້ນຫນຶ່ງເທົ່າຕົວເມື່ອທຽບກັບປີ 2009.
ຕົວເລກເຫລົ່ານີ້ກໍ່ສະແດງໃຫ້ເຫັນເຖິງການປ່ຽນແປງຂອງຖານະຍຸດທະສາດທາງດ້ານການຄ້າຂອງອາຊຽນເຫມືອນກັນ. ການວິເຄາະເຫັນວ່າ:ອາຊຽນໄດ້ຄວາມເພິ່ງພາອາໄສຕໍ່ເສດຖະກິດອາເມລິກາຫນ້ອຍລົງ, ແຕ່ບໍ່ຫມາຍຄວາມວ່າປະເທດສະມາຊິກອາຊຽນໄດ້ຫລຸດຜ່ອນການພົວພັນກັບອາເມລິກາທາງການເມືອງແລະການທະຫານ. ກົງກັນຂ້າມ, ຍ້ອນວ່າເສດຖະກິດໄດ້ອາໄສນຳຈີນຫລາຍຂຶ້ນ, ສະນັ້ນ, ປະເທດກໍ່ຍິ່ງຕ້ອງການການສະຫນັບສະຫນູນຈາກອາເມລິກາເອີລົບໃນດ້ານການເມືອງແລະການທະຫານຫລາຍຂຶ້ນ, ເພື່ອດຸນດ່ຽງກັບຜົນສະທ້ອນຂອງຈີນ.
ທ່ານສາສະດາຈານຮັງຈິ່ງ, ຫົວຫນ້າສະຖານບັນຄົ້ນຄວ້າອາຊີກັບໂລກາພິວັດຂອງມະຫາວິທະຍາໄລແຫ່ງຊາດສິງກະໂປເຫັນວ່າ:ອາຊຽນທີ່ມີເສດຖະກິດຈະເລີນແລະການເມືອງຫມັ້ນທ່ຽງນັ້ນມີຜົນດີຕໍ່ການພັດທະນາຂອງຈີນຫລາຍກວ່າຜົນເສຍ, ໃນດ້ານການແລກປ່ຽນດ້ານເສດຖະກິດການຄ້າ,ຈີນກັບປະເທດອາຊຽນມີກຳລັງບົ່ມຊ້ອນຫລາຍກວ່າປະເທດອື່ນ, ບົດບາດອັນຕັ້ງຫນ້າແລະທ່າແຮງຂອງຈີນໃນການພັດທະນາຂອງອາຊຽນແມ່ນປະເທດອື່ນເຂົ້າແທນບໍ່ໄດ້.
