ນ້ຳ​ຍັງ​ສືບ​ຕໍ່​ຖ້ວມ​ເຂດ​ຕ່າງໆ​ທາງ​ພາກກາງ​ແລະ​ບໍລິ​ເວນ​ໃກ້​ຄຽງ​ນະຄອນຫຼວງ​ບາງກອກ​ຂອງ​ໄທ

ຕາມ​ຂ່າວສາ​ນຊິນ​ຮວາ: ວັນ​ທີ 18 ຕຸລາ​ນີ້, ກົມປ້ອງ​ກັນ​ແລະ​ບັນ​ເທົາ​ສາທາລະນະໄພ​ຂອງ​ກະຊວງມະຫາດ​ໄທຂອງ​ໄທ​ແຈ້ງ​ໃຫ້ຮູ້​ວ່າ, ​ໄພ​ນ້ຳ​ຖ້ວມ​ທີ່​​ແກ່ຍາວ​ມາ​ເປັນ​ເວລາ​ເກືອບ 3 ເດືອນນັ້ນ​​ໄດ້​ເຮັດ​ໃຫ້ມີຄົນ​ເສຍ​ຊີວິດ 315 ຄົນ ​ແລະອີກ 3 ຄົນ​ຫາຍສາບ​ສູນ.
ວັນ​ທີ 17 ຕຸລາ​ນີ້, ຄູ​ກັນ​ນ້ຳ​ທີ່​ນິຄົມອຸດສາຫະກຳນະວະ​ນະຄອນຈັງຫວັດ​ປະທຸມ​ທານີ​ທີ່​ຢູ່ໃກ້​ກັບ​ນະ​ຄອນ​ຫຼວງບາງກອກ​ໄດ້​ຂາດ​ອອກ. ​ເຈົ້າ​ໜ້າ​ທີ່​ຂອງ​ໄທ​​​ໄດ້ໃຊ້​ລົດ​ໃຫຍ່ ​ແລະ ລົດຍົນ​ອື່ນໆ 200 ຄັນ​ໃນ​ການຍ້າຍ​ກຳມະກອນ​ເກືອບ 2 ​ແສນ​ຄົນ​ທີ່​ຢູ່​ໃນ​ນິຄົມອຸດສາຫະກຳນະວະ​ນະຄອນ​ໄປ​ຢູ່​ເຂດ​ທີ່​ປອດ​ໄພ.

ມື້​ດຽວ​ກັນ ທ່ານນາງ​ຍິ່ງ​ລັກ ຊີ​ນນະ​ວັດ ນາຍົກລັດຖະມົນຕີ​ໄທ​ກ່າວ​ວ່າ, ການສ້າງສາ​ຄືນ​ໃໝ່​ສຳລັບ​ໄພ​ນ້ຳ​ຖ້ວມ​ຄັ້ງ​ຮ້າຍ​ແຮງ​ທີ່​ສຸດ​ໃນປີ​ນີ້​ອາດ​ຈະ​ຕ້ອງການ ​ໃຊ້​ເງິນ​ເຖິງ 330 ລ້ານ​ໂດ​ລາ, ສູງ​ກວ່າ​ງົບປະມານ​ທີ່​ລັດຖະບານ​ຄາດຄະ​ເນ​ໄວ້ກ່ອນໜ້ານີ້​ເຖິງ 1/5.

ທ່ານ​ທີຣະ​ໄຊ ພູວະນາດ​ນະຣານຸບາ​ນ ລັດຖະມົນຕີ​ວ່າການ​ກະຊວງ​ການ​ເງິນ​ໄທ​ກ່າວ​ວ່າ, ທະນາຄານ​​ແຫ່ງ​ຊາດ ​ແລະ ຄະນະ​ກຳມະການ​ພັດທະນາ​ສັງຄົມ​ໄທຄາດ​ວ່າ, ​ໄພ​ນ້ຳ​ຖ້ວມ​ຈະ​ເຮັດ​ໃຫ້​ຈັງຫວະ​ການເຕີບ​ໂຕ​ທາງ​ດ້ານເສດຖະກິດ​ປີ​ນີ້​ ​ຫຼຸດ​ລົງ 1,7%, ສູງ​ກວ່າ 0,9% ທີ່​ຄາດ​ຄະ​ເນ​ກ່ອນ​ໜ້າ​ນີ້.

ປັດຈຸບັນ, ​ເຂດ​ປະສົບ​ໄພ​ນ້ຳ​ຖ້ວມ​ຢູ່ໄທສ່ວນ​ຫຼາຍ​ແມ່ນຈັງຫວັດ​ຕ່າງໆ​ທາງພາກ​ກາງ,ແລະ​​ເຂດ​ທີ່​ຢູ່ໃກ້​ກັບ​ນະຄອນຫຼວງບາງ​ກອກ, ລັດຖະບານ​ໄທ​ກຳລັງ​ເລັ່ງລັດ​ເສີມ​ສ້າງຄູ​ກັນ​ນ້ຳ​​ໃຫ້​ແໜ້ນ​ໜາ, ​ເຮັດ​ໃຫ້​ແມ່​ນ້ຳ​ລ່ອງ​ຊ່ອງ​ກັນ,​ເພື່ອ​ຮັບປະກັນ​ຄວາມ​ປອດ​ໄພ​ຂອງ​ຕົວ​ເມືອງ​ຕ່າງໆ.