ຫລາຍປະເທດໃນອາຊີອາຄະເນໄດ້ດັດປັບຄາດຫມາຍເສດຖະກິດໃຫ້ຕ່ຳລົງຍ້ອນຜົນກະທົບຈາກໄພນ້ຳຖ້ວມ
(GMT+08:00) 2011-10-25 11:43:44 cri
ຕາມຂ່າວ cri:ໄພນ້ຳຖ້ວມທີ່ຫນັກຫນ່ວງແບບບໍ່ເຄີຍມີມາກ່ອນທີ່ເກີດຂຶ້ນໃນເດືອນກໍລະກົດ ປີນີ້ໄດ້ເຮັດໃຫ້ຫລາຍໆປະເທດໃນອາຊີຕາເວັນອອກສຽງໃຕ້ເຊັ່ນ: ໄທ,ກຳປູຈເຍ,ມຽນ ມາ, ລາວແລະຟິລິບປິນເປັນຕົ້ນປະສົບກັບຄວາມເສຍຫາຍຢ່າງຫນັກຫນ່ວງທາງດ້ານຊັບສິນຂອງລັດແລະປະຊາຊົນ. ໄປຄຽງຄູ່ກັບໄພນ້ຳຖ້ວມນັບມື້ນັບຫນັກຫນ່ວງຂຶ້ນ,ແລະແຜ່ລາມໄປເປັນບໍລິເວນທີ່ກວ້າງຂວາງກວ່າເກົ່າ, ມັນບໍ່ພຽງແຕ່ແມ່ນໄພທຳມະຊາດເທົ່ານັ້ນ,ມັນຍັງໄດ້ສົ່ງຜົນກະທົບເຖິງເສດຖະກິດຂອງຂົງເຂດນີ້ຢ່າງຮ້າຍແຮງຕື່ມອີກ.
ໄທແມ່ນໃຈກາງທີ່ປະສົບໄພເທື່ອນີ້.ໄພນ້ຳຖ້ວມທີ່ເກີດຂຶ້ນຢູ່ໄທໄດ້ແກ່ຍາວມາເປັນເວລາສາມເດືອນກວ່າ,ປັດຈຸບັນໄດ້ເຮັດໃຫ້ມີຜູ່ເສຍຊີວິດແລ້ວ 356 ຄົນ. ນອກນີ້, ປະຊາຊົນຢ່າງຫນ້ອຍ 1 ແສນ 1 ຫມື່ນຄົນຈຳເປັນຕ້ອງຍ້າຍໄປຢູ່ສູນຫລົບໄພຊົ່ວຄາວ 1700 ກວ່າແຫ່ງພາຍໃນປະເທດ, ກະຊວງແຮງງານຂອງໄທຄາດຄະເນວ່າ, ມີແຮງງານປະມານ 6 ແສນ 5 ຫມື່ນຄົນຈະບໍ່ມີວຽກເຮັດງານທຳແລະບໍ່ມີລາຍໄດ້ຍ້ອນໄພເທື່ອນີ້.
ປັດຈຸບັນ, ຜົນເສຍຫາຍດ້ານເສດຖະກິດຍ້ອນໄພນ້ຳຖ້ວມທີ່ເກີດຂຶ້ນຢູ່ໄທຍັງບໍ່ສາມາດປະເມີນໄດ້.ທ່ານພອນສິນ ປາຈາຣິນທານະກູນ, ຮອງເລຂາສະມາຄົມການຄ້າໄທກ່າວວ່າ, ຄວາມເສຍຫາຍດ້ານເສດຖະກິດໂດຍກົງຍ້ອນໄພນ້ຳຖ້ວມເທື່ອນີ້ຄາດວ່າຈະຫລາຍກວ່າ 400 ຕື້ບາດ.ຖ້າວ່າໄພນ້ຳຖ້ວມຈະແຜ່ລາມໄປຮອດກາງເມືອງນະຄອນຫລວງບາງກອກແລະສູນເສດຖະກິດຂອງບາງກອກແລ້ວ, ຄາດວ່າຄວາມເສຍຫາຍດ້ານເສດຖະກິດຈະສູງເຖິງ 120 ຕື້ບາດຕໍ່ເດືອນ.
ໄພນ້ຳຖ້ວມຫນັກທີ່ບໍ່ເຄີຍມີມາກ່ອນຍັງໄດ້ສ້າງຄວາມເສຍຫາຍຕໍ່ເນື້ອທີ່ການຜະລິດຢ່າງຫລວງຫລາຍ.ເຈົ້າຫນ້າທີ່ຂອງລັດຖະບານໄທກ່າວວ່າ, ປັດຈຸບັນ, ພາຍໃນປະເທດໄທໄດ້ມີເນື້ອທີ່ນາ 1 ລ້ານເຮັກຕາຖືກນ້ຳຖ້ວມແລ້ວ, ເນື້ອທີ່ນາທີ່ປະສົບໄພນັ້ນກວມ 1/10 ຂອງເນື້ອທີ່ນາໃນທົ່ວປະເທດ.ກະຊວງການຄ້າຂອງໄທກ່າວວ່າ, ຄາດວ່າເປົ້າຫມາຍທີ່ຈະຜະລິດເຂົ້າ 24-25 ລ້ານໂຕນໃນຫມົດປີນີ້ນັ້ນແມ່ນບໍ່ສາມາດບັນລຸຜົນເປັນຈິງໄດ້ແລ້ວ.
ທີ່ຈິງແລ້ວ, ເກືອບທົ່ວເຂດອາຊີຕາເວັນອອກສຽງໃຕ້ໄດ້ເກີດຝົນຕົກຫນັກທີ່ບໍ່ເຄີຍມີມາກ່ອນໃນປີນີ້, ນອກຈາກໄທແລ້ວ, ກຳປູເຈຍ, ຟິລິບປິນ, ຫວຽດນາມແລະປະເທດລາວກໍ່ໄດ້ເກີດໄພນຳຖ້ວມຫນັກ.ເຮັດໃຫ້ເສດຖະກິດທົ່ວເຂດອາຊີຕາເວັນອອກ ສຽງໃຕ້ຕົກຢູ່ໃນຄວາມຫຍຸ້ງຍາກດ້ານເສດຖະກິດປະເທດເຫລົ່ານີ້ ຕ່າງກໍ່ໄດ້ດັດປັບຄາດຫມາຍການເຕີບໂຕທາງເສດຖະກິດໃນປີນີ້ແລະປີຫນ້າໃຫ້ຕ່ຳລົງ.
ໄພນ້ຳຖ້ວມເທື່ອນີ້ຍັງອາດຈະພາໃຫ້ລາຄາອາຫານໃນທົ່ວໂລກສູງຂຶ້ນ.ເພາະວ່າປະເທດອາຊີຕາເວັນອອກສຽງໃຕ້ແມ່ນປະເທດສຳຄັນໃນການສົ່ງອອກເຂົ້າ.ເມື່ອສັງເກດຈາກຕົວເລກທີ່ທາງການຂອງປະເທດຕ່າງໆເປີດເຜີຍນັ້ນເຫັນວ່າ, ໄພນ້ຳ ຖ້ວມໄດ້ເຮັດໃຫ້ປະເທດເຫລົ່ານີ້ມີເນື້ອທີ່ນາ 1 ລ້ານ 5 ແສນເຮັກຕາຖືກທຳລາຍຫລືຢູ່ໃນຄວາມສ່ຽງທີ່ຈະຖືກນ້ຳຖ້ວມ.
ສູນວິໄຈກະເສດຕະກອນໄທທີ່ເປັນອົງການຄັງປັນຍາທີ່ມີຊື່ສຽງຂອງໄທເຫັນວ່າ, ໄພນ້ຳຖ້ວມເທື່ອນີ້ຈະມີການປ່ຽນແປງລາຄາຂອງການຄ້າເຂົ້າໃນທົ່ວໂລກແຕ່ທ້າຍປີ 2011 ຫາຕົ້ນປີ 2012.ສູນນີ້ຄາດວ່າ, ແຕ່ໄຕມາດທີ 4 ຂອງປີ 2011 ຫາກາງປີ 2012, ລາຄາເຂົ້າທົ່ວໂລກຈະສືບຕໍ່ສູງຂຶ້ນ, ຕໍ່ຈາກນັ້ນ,ລາຄາເຂົ້າຈະຂຶ້ນຢູ່ນຳປະລິມານການຜະລິດເຂົ້າຂອງໄທແລະຫວຽດນາມທີ່ປ້ອນເຂົ້າສູ່ຕະຫລາດກ່ອນກາງປີຫນ້າ.
