ເຂດອຸດສາຫະກຳຊິ່ນໂຈວຈີນມາເລເຊຍສ້າງຮູບການໃຫມ່ຂອງການຮ່ວມມືລະຫວ່າງຈີນກັບອາຊຽນ
(GMT+08:00) 2011-10-28 15:24:17 cri
ຕາມຂ່າວ cri: ໃນໄລຍະຈັດງານວາງສະແດງສິນຄ້າຈີນອາຊຽນຄັ້ງທີ 8, ນາ ຍົກລັດຖະມົນຕີຈີນແລະມາເລເຊຍໄດ້ ເຂົ້າຮ່ວມພິທີເປີດປ້າຍໃຫ້ເຂດອຸດ ສາຫະກຳຊິ່ນໂຈວຈີນມາເລເຊຍ,ເຂດນີ້ອາດຈະກາຍເປັນແບບຢ່າງຂອງເຂດການຄ້າເສລີຈີນອາຊຽນໃນການຮ່ວມມືແບບຕ່າງຝ່າຍຕ່າງມີຜົນປະໂຫຍດຮ່ວມກັນ, ແລະສ້າງຮູບການໃຫມ່ໃຫ້ແກ່ການຮ່ວມມືລະຫວ່າງຈີນກັບອາຊຽນ.
ທ່ານຈ່າງຊຽວຊິ່ນ, ເລຂາຄະນະພັກເມືອງຊິ່ນໂຈວເຂດກວາງຊີຈີນແນະນຳວ່າ, ເຂດອຸດສາຫະກຳຊິ່ນໂຈວຈີນມາເລເຊຍມີເນື້ອທີ່ກວ້າງ 55 ກິໂລຕາແມັດ,ຈະເປັນບ່ອນຊຸກຍູ້ໃຫ້ນັກທຸລະກິດແລະການລົງທຶນຈາກຈີນ,ມາເລເຊຍແລະປະເທດອື່ນໆ,ເພື່ອຮ່ວມກັນຊົມໃຊ້ໂອກາດພັດທະນາ.
ຂ່າວແຈ້ງວ່າ, ເຂດອຸດສາຫະກຳດັ່ງກ່າວຈະຖືຂະແຫນງການຜະລິດອຸປະກອນ, ຂະແຫນງການຂໍ້ມູນຂ່າວສານເອເລັກໂຕຼນິກ,ພະລັງງານໃຫມ່ແລະວັດຖຸໃຫມ່, ການປຸງແຕ່ງຜະລິດຕະພັນກະສິກຳ,ແລະຂະແຫນງການບໍລິການທັນສະໄຫມເປັນຕົ້ນຕໍ. ປັດຈຸບັນ, ຈີນໄດ້ສຳເລັດການວາງແຜນຜັງລວມຂອງເຂດນນີ້ແລ້ວ,ແລະພວມເລັ່ງລັດກໍ່ສ້າງພື້ນຖານໂຄງລ່າງ, ຍາດແຍ່ງໃຫ້ສ້າງທາງລົດໄຟຄວາມໄວສູງ, ທາງດ່ວນແລະທາງລົດໄຟຂົນສົ່ງສິນຄ້າທີ່ເນັ່ງໄປສູ່ເຂດອຸດສາຫະກຳນີ້.
ມາເລເຊຍກາຍເປັນຄູ່ການຄ້າໃຫຍ່ທີຫນຶ່ງຂອງຈີນໃນບັນດາປະເທດອາຊຽນ 3 ປີລຽນຕິດແລ້ວ.ນັບມາຮອດປີ 2010 ຜ່ານມາ, ຍອດມູນຄ່າການລົງທຶນເຊິ່ງກັນແລະກັນລະຫວ່າງສອງປະເທດມີຫລາຍກວ່າ 6 ຕື້ໂດລາ, ການຮ່ວມມືລະຫວ່າງຈີນກັບມາເລເຊຍມີອະນາຄົດທີ່ກວ້າງຂວາງ.
