ຄວາມເຊື່ອມໂຍງເຂົ້າກັນຂອງອາຊຽນປະເຊີນກັບຄວາມກົດດັນຈາກປະຊາກອນເພີ່ມຂຶ້ນ
(GMT+08:00) 2011-10-31 19:26:01 cri
ວັນທີ31ຕຸລານີ້, ປະຊາກອນທົ່ວໂລກໄດ້ມີເຖິງ 7ຕື້ຄົນ. ໃນປີ2009,ຕົວເລກສະຖິຕິສະແດງໃຫ້ເຫັນວ່າ, ຍອດຈຳນວນປະຊາຊົນຂອງພາກພື້ນອາຊຽນໄດ້ມີເຖິງ 5ຮ້ອຍລ້ານກວ່າຄົນ. "ຈະແກ້ໄຂບັນຫາປະຊາກອນກັບບັນຫາການພັດທະນາແນວໃດ",ແມ່ນບັນຫາທີ່ຈຳເປັນຕ້ອງແກ້ໄຂໃນການສ້າງປະຊາຄົມອາຊຽນ.
ຈຳນວນປະຊາກອນເພີ່ມຂຶ້ນຢ່າງວ່ອງໄວໄດ້ນຳເອົາຄວາມກົດດັນມາສູ່ຊັບພະຍາກອນທຳມະຊາດແລະສິ່ງແວດລ້ອມຊີວະພາບ,ທັງໄດ້ນຳເອົາສິ່ງທ້າທາຍມາສູ່ການພັດທະນາ ແລະສະຖຽນລະພາບຂອງບັນດາປະເທດອາຊຽນ. ຕົວຢ່າງວ່າ,ຍອດຈຳນວນປະຊາກອນຂອງອິນໂດເນເຊຍມີປະມານ 238ລ້ານຄົນ,ແລະອັດຕາເຕີບໂຕຂອງຈຳນວນປະຊາກອນສະເລ່ຍຕໍ່ປີໄດ້ມີຮອດ 1,4%. ດ້ານໜຶ່ງ, ມີປະຊາກອນເຄິ່ງໜຶ່ງກວ່າອາຍຸຕ່ຳກວ່າ 30ປີ ;ອິນໂດເນເຊຍຈະໄດ້ຮັບຜົນປະໂຫຍດຕໍ່ໄປຍ້ອນສະພາບການນີ້ແລະກໍ່ມີກຳລັງບົ່ມຊ້ອນຢ່າງຫຼວງຫຼາຍໃນການພັດທະນາເສດຖະກິດ. ອີກດ້ານໜຶ່ງ,ຈຳນວນປະຊາກອນຢ່າງຫຼວງຫຼາຍໄດ້ເຮັດໃຫ້ເກີດມີບັນຫາທາງດ້ານສັງຄົມຕ່າງໆ,ເຊັ່ນ: ບັນຫາດ້ານທັນຍາຫານ,ພະລັງງານ,ການປິ່ນປົວ,ການສຶກສາແລະອື່ນໆ.
ຕາມແຜນການອາຊຽນຈະສຳເລັດການສ້າງຕັ້ງປະຊາຄົມອາຊຽນໃນປີ2015,ພາຍໃຕ້ຂອບເຂດທີ່ກວ້າງໃຫຍ່ແຫ່ງນີ້, ການເຄື່ອນຍ້າຍຂອງປະຊາກອນຈະກາຍເປັນບັນຫາທີ່ຫີຼກເວັ້ນບໍ່ໄດ້,ສະນັ້ນ,ບັນຫາປະຊາກອນຈະກີດຂວາງການສ້າງສາແລະການພັດທະນາປະຊາຄົມອາຊຽນຫຼືບໍ່? ທ່ານຈ່າງສຸຍກ່າງ, ຮອງຫົວໜ້າຫ້ອງການອາຊີໃຕ້ແລະອາຊີຕາເວັນອອກສຽງໃຕ້ຂອງສະຖາບັນຄົ້ນຄວ້າການພົວພັນສາກົນທັນສະໄໝໃໝ່ຈີນກ່າວວ່າ:
"ບັນຫາປະຊາກອນແມ່ນສາເຫດຕົ້ນຕໍທີ່ພາໃຫ້ອາຊຽນມີຄວາມແຕກຕ່າງກັນຫຼາຍຂຶ້ນຢູ່ພາຍໃນ,ຕົວຢ່າງວ່າ,ລວມຍອດຜະລິດຕະພັນພາຍໃນຫຼືGDPສະເລ່ຍຕໍ່ຫົວຄົນຂອງສິງກະໂປໃນປະຈຸບັນມີເຖິງ 2ໝື່ນໂດລາ,ສ່ວນມຽນມາທີ່ເປັນປະເທດດ້ອຍພັດທະນາຍັງຢູ່ໃນລະດັບຕ່ຳສະເລ່ຍຕໍ່ຫົວຄົນຫຼາຍຮ້ອຍໂດລາ.ການຫຼຸດຄວາມແຕກຕ່າງກັນທາງດ້ານການພັດທະນາ,ບັນລຸສະພາບການທີ່ມີຄວາມດຸ່ນດ່ຽງເຊິ່ງກັນແລະກັນ,ຈຶ່ງຈະສາມາດບັນລຸປະຊາຄົມອາຊຽນທີ່ມີການເມືອງ,ເສດຖະກິດແລະຄວາມໂປ່ງໄສ."
ເນື່ອງໃນໂອກາດທີ່ປະຊາກອນຂອງໂລກມີເຖິງ 7ຕື້ຄົນ,ພວກເຮົາຍິ່ງຮູ້ດີວ່າ,ມະນຸດຄວນຮັບມືກັບສິ່ງທ້າທາຍ,ກຳກາລະໂອກາດເປັນຢ່າງດີ,ເຮັດໃຫ້ຄວາມຈະເລີນຮຸ່ງເຮືອງສອດຄ່ອງກັບການພັດທະນາຂອງຕົນ,ບັນລຸຄົນແລະສະພາບແວດລ້ອມພັດທະນາແບບຍືນຍົງແລະກົມກຽວກັນຢ່າງແທ້ຈິງ. ເວົ້າສຳລັບບັນດາປະເທດອາຊຽນແລ້ວ,ແມ່ນການແກ້ໄຂໂອກາດແລະວິກິດການກ່ຽວກັບບັນຫາປະຊາກອນເປັນຢ່າງດີນັ້ນ,ຈຶ່ງຈະສາມາດກ້າວໄປສູ່ຄວາມຈະເລີນຮຸ່ງເຮືອງແລະການພັດທະນາທີ່ຮອບດ້ານຢ່າງແທ້ຈິງ.