ດ່ານພາສີນຳເຂົ້າລົດຢູ່ທ່າເຮືອແຫ່ງທີ5ຂອງຈີນໄດ້ເປີດບໍລິການແລ້ວ
(GMT+08:00) 2011-11-02 18:12:04 cri
ຂ່າວສານຈີນລາຍງານວ່າ: ດ່ານພາສີນຳເຂົ້າລົດຢູ່ທ່າເຮືອເຂດປອດພາສີຊິນໂຈ່ວກວາງຊີຊຶ່ງເປັນດ່ານພາສີນຳເຂົ້າລົດຢູ່ທ່າເຮືອແຫ່ງທີ5ຂອງຈີນໄດ້ຜ່ານການກວດກາຈາກພາກສ່ວນທີ່ກ່ຽວຂ້ອງຂອງລັດຖະບານຈີນໃນວັນທີ1ພະຈິກນີ້,ໄດ້ເປີດບໍລິການຢ່າງເປັນທາງການແລ້ວ.ນີ້ເປັນດ່ານພາສີນຳເຂົ້າລົດຢູ່ທ່າເຮືອແຫ່ງໃໝ່ທີ່ຈີນເປີດບໍລິການພາຍຫຼັງຈີນໄດ້ຢຸດເຊົາການສຳຫຼວດອະນຸມັດເປີດດ່ານພາສີນຳເຂົ້າລົດມາໄດ້15ປີແລ້ວ.ແລະຄາດວ່າຈີນຈະສ້າງດ່ານພາສີແຫ່ງນີ້ໃຫ້ເປັນດ່ານພາສີສົ່ງອອກແລະນຳເຂົ້າລົດທີ່ສະດວກວ່ອງໄວທີ່ສຸດຂອງຈີນໃນການຫັນໜ້າໄປສູ່ອາຊຽນ.ສະນັ້ນ,ເຂດທ່າເຮືອປອດພາສີຊິນໂຈ່ວຈຶ່ງກາຍເປັນເຂດທ່າເຮືອປອດພາສີທີ່ມີບົດບາດສຳຄັນຂອງດ່ານພາສີນຳເຂົ້າລົດພຽງແຫ່ງດຽວຂອງຈີນໃນປະຈຸບັນ.
ທ່ານສິງໄຫຊາວ ຫົວໜ້າໜ່ວຍງານກວດກາອະນຸມັດເປີດດ່ານພາສີກ່າວວ່າ,ເມືອງຊິນໂຈ່ວເປັນໃຈກາງທາງດ້ານຄົມມະນາຄົມຢູ່ແຄມທະເລຕາເວັນຕົກສຽງໃຕ້ຂອງຈີນ,ມີທ່າເຮືອທີ່ເໝາະສົມ,ສາມາດເປີດບໍລິການຕໍ່ເຂດພາກຕາເວັນຕົກສຽງໃຕ້ຂອງຈີນແລະພາກພື້ນອາຊີອາຄະເນ,ການສ້າງຕັ້ງດ່ານພາສີນຳເຂົ້າລົດຢູ່ເມືອງຊິນໂຈ່ວເປັນມາດຕະການສຳຄັນຂອງລັດຖະບານຈີນໃນການຊຸກຍູ້ການຂະຫຍາຍຕົວຂອງເຂດການຄ້າເສລີຈີນ-ອາຊຽນ.ທ່ານສິງໄຫຊາວຫວັງວ່າ,ເຂດທ່າເຮືອປອດພາສີຊິນໂຈ່ວເພີ່ມການກໍ່ສ້າງພື້ນຖານໂຄງລ່າງທີ່ກ່ຽວຂ້ອງໃຫ້ຫຼາຍຂຶ້ນຕື່ມອີກ,ຍົກສູງຄວາມສາມາດໃນການບໍລິຫານຄຸ້ມຄອງດ່ານພາສີ,ຫຼຸດຕົ້ນທຶນໃນການຈໍລະຈອນສິນຄ້າໃຫ້ແກ່ວິສາຫະກິດຢ່າງແທ້ຈິງ,ອຳນວຍຄວາມສະດວກໃຫ້ແກ່ການແລກປ່ຽນທາງດ້ານການຄ້າ,ພະຍາຍາມກໍ່ສ້າງເຂດທ່າເຮືອປອດພາສີຊິນໂຈ່ວໃຫ້ເປັນທາງຜ່ານແລະສູນກາງໃນການແລກປ່ຽນຊື້ຂາຍທີ່ສະດວກວ່ອງໄວທີ່ສຸດໃນດ້ານການນຳເຂົ້າແລະສົ່ງອອກລົດພ້ອມດ້ວຍອາໄຫຼ່ຊີ້ນສ່ວນລົດຂອງຈີນທີ່ຫັນໜ້າໄປສູ່ອາຊຽນ.
