ກອງປະຊຸມລະດັບລັດຖະມົນຕີການຮ່ວມມືພັດທະນາແບບທົດແທນຈີນ-ມຽນມາຈັດຂຶ້ນຢູ່ມຽນມາ
(GMT+08:00) 2011-11-02 17:40:46 cri
ຕາມຂ່າວສານຊີນຮວາ: ວັນທີ1ພະຈິກນີ້, ກອງປະຊຸມລະດັບລັດຖະມົນຕີການຮ່ວມມືພັດທະນາການປູກພືດທົດແທນຈີນ-ມຽນມາໄດ້ຈັດຂຶ້ນຢູ່ເມືອງມູຊີ ຊານສະເຕດຂອງມຽນມາ. ທ່ານຈ່າງຊິ່ນເຟິ່ງ, ຮອງຫົວໜ້າຄະນະກຳມະການປາບປາມຢາເສບຕິດແຫ່ງຊາດຈີນທັງເປັນລັດຖະມົນຕີຊ່ວຍວ່າການກະຊວງປ້ອງກັນຄວາມສະຫງົບຈີນແລະທ່ານໂຈຊານມິນ, ລັດຖະມົນຕີຊ່ວຍວ່າການກະຊວງພາຍໃນມຽນມາຕ່າງກໍ່ໄດ້ນຳພາຄະນະຜູ້ແທນເຂົ້າຮ່ວມກອງປະຊຸມ.
ກອງປະຊຸມໄດ້ທົບທວນຄືນສະພາບການແລະປະສິດທິຜົນຂອງການຮ່ວມມືໃນການພັດທະນາການປູກພືດທົດແທນຂອງສອງປະເທດໃນຊຸມປີ1990,ໂດຍສະເພາະແມ່ນໃນປີ2007 ເຊິ່ງນັບແຕ່ໄດ້ເຊັນສັນຍາໃນແຜນການເຄື່ອນໄຫວການປູກພືດທົດແທນເປັນຕົ້ນມາ,ໄດ້ລົງເລິກແລກປ່ຽນຄວາມຄິດຄວາມເຫັນກ່ຽວກັບການຊຸກຍູ້ການຮ່ວມມືພັດທະນາການປູກພືດທົດແທນຈີນ-ມຽນມາຕື່ມອີກ,ແລະໄດ້ມີຄວາມເຫັນເປັນເອກະສັນກັນ,ເຊັນ "ບົດບັນທຶກຊ່ວຍຈຳກອງປະຊຸມລະດັບລັດຖະມົນຕີການຮ່ວມມືພັດທະນາແບບທົດແທນຈີນ-ມຽນມາ".
ກອງປະຊຸມເຫັນວ່າ,ໃນຊຸມປີຜ່ານມານີ້,ຈີນແລະມຽນມາໄດ້ຮ່ວມມືກັນໃນການກະທຳຕົວຈິງ, ສົ່ງເສີມວິສາຫະກິດໄປດຳເນີນການປູກພືດ ທົດແທນຢູ່ພາກເໜືອມຽນມາດ້ວຍຮູບການຕ່າງໆ,ເຮັດໃຫ້ຊາວກະສິກອນຫຼຸດຜ່ອນການປູກຝິ່ນລົງເທື່ອລະກ້າວ,ຊຸກຍູ້ການພັດທະນາເສດຖະກິດແລະສັງຄົມຂອງມຽນມາ,ໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານປາບປາມຢາເສບຕິດໃນພາກພື້ນແຫ່ງນີ້ແລະໃນໂລກ. ສອງຝ່າຍໄດ້ເຫັນດີເພີ່ມທະວີການຮ່ວມມືໃນການປູກພືດຊະນິດອື່ນແທນການປູກຝິ່ນຕື່ມອີກ,ຊຸກຍູ້ການຮ່ວມມືໃນດ້ານການປູກພືດທົດແທນການປູກຝິ່ນລະຫວ່າງຈີນ-ມຽນມາໃຫ້ພັດທະນາໄປໜ້າຢ່າງປອດແລະເປັນລະບຽບຮຽບຮ້ອຍ.
ປະຈຸບັນ, ການປູກພືດທົດແທນການປູກຝິ່ນຢູ່ພາກເໜືອມຽນມາໄດ້ນັບມື້ນັບຂະຫຍາຍກວ້າງອອກ,ວິສາຫະກິດທີ່ດຳເນີນທຸລະກິດທົດແທນຂອງຈີນຢູ່ມຽນມາມີ 100ກວ່າແຫ່ງ, ການລົງທຶນຫຼາຍກວ່າ 1ຕື້ຢວນ,ເນື້ອທີ່ການປູກພືດທົດແທນການປູກຝິ່ນໄລ່ລວມແລ້ວມີ1ແສນ3ໝື່ນ3ພັນເຮັກຕາ,ຜູ້ທີ່ໄດ້ຮັບຜົນປະໂຫຍດຢູ່ພາກເໜືອມຽນມາໄດ້ຫຼາຍກວ່າ 1ແສນ3ໝື່ນຄົນ. ໂຄງການດັ່ງກ່າວຍັງໄດ້ຊຸກຍູ້ການປັບປຸງການກໍ່ສ້າງພື້ນຖານໂຄງລ່າງຢູ່ທ້ອງຖິ່ນນັ້ນ,ໄດ້ຮັບປະສິດທິຜົນທີ່ພົ້ນເດັ່ນທີ່ສຸດຢ່າງຈະແຈ້ງ.
