ໄພນ້ຳຖ້ວມຢູ່ໄທອາດຈະເຮັດໃຫ້ລາຄາເຂົ້າຂອງໂລກຖີບຕົວສູງຂຶ້ນ
(GMT+08:00) 2011-11-03 15:11:28 cri
ໜັງສືພິມເຢິນມິນຢື້ປ້າວຂອງຈີນລາຍງານວ່າ, ວັນທີ1ພະຈິກນີ້, ທະນາຄານໂລກໄດ້ເປີດເຜີຍບົດລາຍງານຈ້ອງມອງລາຄາສະບຽງອາຫານສະບັບຫຼ້າສຸດ, ບົດລາຍງານຊີ້ອອກວ່າ, ໄພນ້ຳຖ້ວມຢູ່ປະເທດໄທຈະນຳເອົາຄວາມບໍ່ແນ່ນອນມາໃຫ້ຕະຫຼາດສະບຽງອາຫານທົ່ວໂລກໃນໄລຍະສັ້ນ.
ເຈົ້າໜ້າທີ່ກະຊວງກະເສດແລະສະຫະກອນໄທຄາດຄະເນໃນເບື້ອງຕົ້ນວ່າ, ໄພນ້ຳຖ້ວມອາດຈະເຮັດໃຫ້ຜົນຜະລິດເຂົ້ານາປີຂອງໄທຈາກ25ລ້ານໂຕນຫຼຸດລົງຮອດ19ລ້ານໂຕນ, ເຊິ່ງຫຼຸດລົງເກືອບ25%. ຍ້ອນວ່າແນວເຂົ້າຖືກນ້ຳເຊາະ, ອາດຈະມີຜົນກະທົບຕໍ່ຜົນຜະລິດເຂົ້ານາແຊງ, ເຊິ່ງຜົນຜະລິດເຂົ້ານາແຊງຂອງໄທປະມານຢູ່ລະຫວ່າງ7ລ້ານໂຕນ. ຕາມການຄາດຄະເນວ່າ, ໄພນ້ຳຖ້ວມຄັ້ງນີ້ຈະເຮັດໃຫ້ຜົນຜະລິດທາງດ້ານສະບຽງອາຫານຂອງໄທຫຼຸດລົງ16ຫາ24%.ໄທແມ່ນປະເທດທີ່ສົ່ງອອກເຂົ້າສານຫຼາຍທີ່ສຸດຂອງໂລກ, ເຊິ່ງກວມ30%ຂອງຍອດປະລິມານສົ່ງອອກເຂົ້າສານໃນຕະຫຼາດທົ່ວໂລກ.
ນັກວິເຄາະເຫັນວ່າ, ລາຄາເຂົ້າຂອງໄທແພງຂຶ້ນຈະສົ່ງຜົນກະທົບເຖິງລາຄາເຂົ້າໃນຕະຫຼາດສາກົນ, ເຮັດໃຫ້ການສະໜອງເຂົ້າຂອງທົ່ວໂລກຫຼຸດລົງ, ແລະເຮັດໃຫ້ລາຄາເຂົ້າຂອງໂລກຖີບຕົວສູງຂຶ້ນ.
