ພາຍຫຼັງທີ່ຈີນໄດ້ສຳເລັດການປະຕິບັດໜ້າທີ່ຍານອາວະກາດ "ທຽນກົ່ງເລກ1"ເຊື່ອມຕໍ່ກັບຍານອາວະກາດ "ເສີນໂຈ່ວເລກ8"ຢ່າງສຳເລັດຜົນໃນວັນທີ3ພະຈິກນີ້ແລ້ວ, ຜູ້ນຳ,ຜູ້ແທນທາງການແລະປະຊາຊົນ,ສື່ມວນຊົນຂອງປະເທດຈຳນວນໜຶ່ງໄດ້ຕີລາຄາຢ່າງຕັ້ງໜ້າຕໍ່ເລື່ອງນີ້,ສະແດງຄວາມຍ້ອງຍໍສັນລະເສີນຕໍ່ຜົນສຳເລັດອັນໃຫຍ່ຫຼວງຂອງຈີນໃນຂົງເຂດການບິນອາວະກາດບັນທຸກມະນຸດ.
ທ່ານຮຸນແຊນ, ນາຍົກລັດຖະມົນຕີກຳປູເຈຍໄດ້ສະແດງຄວາມຊົມເຊີຍຢ່າງສຸດອົກສຸດໃຈຕໍ່ຜົນສຳເລັດອັນໃຫຍ່ຫຼວງຂອງຈີນໃນຂົງເຂດການບິນອາວະກາດບັນທຸກມະນຸດ. ທ່ານກ່າວເນັ້ນວ່າ, ຜົນສຳເລັດທາງດ້ານການບິນອາວະກາດຂອງຈີນມີຜົນດີຕໍ່ຄວາມກ້າວໜ້າແລະການພັດທະນາຂອງພາກພື້ນແລະທົ່ວໂລກ,ການພັດທະນາແລະຄວາມກ້າວໜ້າຂອງຈີນມີຜົນດີຕໍ່ປະເທດຕ່າງໆໃນໂລກ.
ທ່ານໂສງເຕີໂຫຼງ, ປະທານກຸ່ມໜັງສືພິມສາກົນລາຍວັນຂອງອິນໂດເນເຊຍກ່າວວ່າ,ມີຄວາມເຊື່ອໝັ້ນວ່າປະຊາຊົນຈີນສາມາດປະກອບສ່ວນຢ່າງໃຫຍ່ຫຼວງເຂົ້າໃນການພັດທະນາທາງດ້ານວິທະຍາສາດເຕັກນິກແລະການສ້າງຄວາມຜາສຸກໃຫ້ແກ່ມະນຸດໃນໂລກຢ່າງແນ່ນອນ ໂດຍຜ່ານການບິນອາວະກາດບັນທຸກມະນຸດແລະການສຳຫຼວດອາວະກາດ.
ໜັງສືພິມລຽນເຮີຈາວປ້າວຂອງສິງກະໂປລາຍງານວ່າ,ຖັດຈາກອາເມລິກາແລະຣັດເຊຍ,ຈີນໄດ້ກາຍເປັນປະເທດທີສາມທີ່ມີເຕັກນິກທາງດ້ານການເຊື່ອມຕໍ່ຍານອາວະກາດຢ່າງເປັນເອກະລາດນີ້ມີຄວາມໝາຍສຳຄັນຫຼາຍ.
