ໃນຕອນເຊົ້າວັນທີ 9 ພະຈິກນີ້, ງານພົບປະສັງສັນສຳພັນຄົນເຊື້ອສາຍຈີນຈາກສປປລາວ ຫວຽດນາມ ແລະກຳປູເຈຍ ຄັ້ງທີ່ V ໄດ້ຈັດຂື້ນຢ່າງເປັນທາງການທີ່ນະຄອນຫຼວງວຽງຈັນ ໂດຍພາຍໃຕ້ຫົວຂໍ້ທີ່ວ່າ"ເຕົ້າໂຮມກຳລັງ, ສາມັກຄີປອງດອງ, ຮ່ວມສ້າງໂອກາດໃໝ່". ຜູ້ໃຫ້ກຽດເຂົ້າຮ່ວມຄັ້ງນີ້ມີ ທ່ານ ດຣ ທອງລຸນ ສິສຸລິດ ກຳມະການກົມການເມືອງສູນກາງພັກ, ຮອງນຍົກລັດຖະມົນຕີ ລັດຖະມົນຕີວ່າການຖະຊວງການຕ່າງປະເທດລາວ, ທ່ານນາງປູຈຽນກົວ ເອກອັກຄະລັດຖະທູດຈີນປະຈຳລາວ, ທ່ານເລັ່ງ ສະຫວັນວາລີ ປະທານກອງປະຊຸຸມ, ປະທານສະມາຄົມຈີນ, ທ່ານສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ, ປະທານກິດຕິມະສັກຂອງສະມາຄົມຈີນແລະບັນດາແຂກເຂົ້າຮ່ວມເກືອບ 2000 ຄົນທີ່ມາຈາກ 17 ປະເທດໃນໂລກ. ໃນນັ້ນ ຊາວຈີນທີ່ຢູ່ຕ່າງປະເທດແມ່ນ 1200 ຄົນ.
ທ່ານ ດຣ ທອງລຸນ ສີສຸລິດ ຮອງຍາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດລາວໄດ້ໃຫ້ກຽດຂື້ນກ່າວຄຳປາໃສ, ທ່ານໄດ້ຕາງໜ້າລັດຖະບານລາວສະແດງຄວາມຕ້ອນຮັບອັນອົບອຸ່ນແກ່ຊາວເຊື້ອສາຍຈີນທີ່ເຄີຍດຳລົງຊີວິດຢູ່ລາວ ຫວຽດນາມແລະກຳປູເຈຍ ເຊິ່ງປະຈຸບັນໄດ້ດຳລົງຊີວິດຢູ່ທົ່ວໂລກ ກັບມາພົບປະສັງສັນແລະປຶກສາຫາລືກັນ ເພື່ອຫາວິທີແລະເງື່ອນໄຂໃນການປະກອບສ່ວນເຂົ້າໃນການພັດທະນາປະເທດທີ່ຕົນກຳລັງດຳລົງຊິວິດຢູ່. ໃນປະເທດລາວ, ພີ່ນ້ອງຊາວຈີນຕ່າງດ້າວກໍ່ໄດ້ມີການປະກອບສ່ວນອັນສຳຄັນເຂົ້າໃນການປົກປັກຮັກສາປະເທດລາວຄືກັນກັບບ້ານເກີດເມືອງນອນຂອງຕົນແລະທັງໃຫ້ການສະໜັບສະໜູນລັດຖະບານລາວໃນການພັດທະນາເສດຖະກິດ, ການສຶກສາ, ການລົງທຶນ, ສ້າງໂຮງຈັກໂຮງງານ, ຮ້ານຄ້າຂາຍ ແລະອື່ນໆໃນທົວປະເທດ, ອາດເວົ້າໄດ້ວ່າ ທຸກພາລະກຳປະຫວັດສາດທີ່ເກີດຂື້ນໃນຜື່ນແຜນດິນລາວແຫ່ງນີ້ ພີ່ນ້ອງເຊື້ອສາຍຈີນໄດ້ປະກອບສ່ວນຢ່າງຕັ້ງໜ້າທັງໃນອາດີດ, ປັດຈຸບັນແລະເຊື່ອວ່າຈະມີຂື້ນໃນອານາຄົດຕໍ່ໄປ.
ກອງປະຊຸມດັ່ງກ່າວນີ້ຈັດຂື້ນເປັນປະຈຳທຸກໆ 2ປີ, ຄັ້ງນີ້ແມ່ນຄັ້ງທີ V ເຊິ່ງລາວໄດ້ຮັບກຽດເປັນເຈົ້າພາບ, ສ່ວນວ່າຄັ້ງທີ I ແລະຄັ້ງທີ II ໄດ້ຈັດຢູ່ສະຫະລັດອາເມລິກາ, ຄັ້ງທີ III ຈັດຢູ່ປະເທດຈີນແລະຄັ້ງທີ IV ຈັດຢູ່ປະເທດກຳປູເຈຍ.
